എപ്പോഴെങ്കിലും ഇതൊന്ന് പറയാന്‍ അവസരം നോക്കിയിരിക്കുകയായിരുന്നു ഞാന്‍; ശിവകാര്‍ത്തികേയനെ കുറിച്ച് പ്രേംകുമാര്‍

ചെറിയ ചെറിയ റോളുകളിലൂടെ തമിഴ് ഇന്റസ്ട്രിയില്‍ ഒരുപാട് സിനിമകള്‍ ചെയ്തിട്ടുണ്ട് എങ്കിലും പ്രതീക്ഷിച്ച ഉയരത്തിലേക്ക് എത്താന്‍ കഴിയാതെ പോയ നടനാണ് പ്രേം കുമാര്‍. എന്നാല്‍ അദ്ദേഹത്തിന് ശേഷമൊക്കെ വന്ന ശിവകാര്‍ത്തികേയന്‍ എന്ന നടന്‍ ഇന്ന് തമിഴ് സിനിമാ ലോകത്ത് അടുത്ത സൂപ്പര്‍സ്റ്റാര്‍ എന്ന നിലയിലേക്ക് വളര്‍ന്നു കഴിഞ്ഞു.

ടെലിവിഷന്‍ ആങ്കറിങിലൂടെ തുടങ്ങിയതാണ് ശിവകാര്‍ത്തികേയന്‍. പതിയെ ജൂനിയര്‍ ആര്‍ട്ടിസ്റ്റ് വേഷങ്ങളിലൂടെ നായക നിരയിലേക്ക് എത്തി. ഇന്ന് എസ് കെ എന്ന ഷോര്‍ട്ടഫോമില്‍ തമിഴകം ഭരിക്കുകയാണ്. ശിവകാര്‍ത്തികേയനെ സംബന്ധിച്ച അധികമാരും അറിയാത്ത ഒരു കാര്യമാണ് പ്രേം കുമാര്‍ ഇന്ന് പറയുന്നത്. ഇത് പറയാന്‍ ഒരവസരം ഞാന്‍ നോക്കിയിരിക്കുകയായിരുന്നു. എപ്പോഴെങ്കിലും ഒരു ഓഡിയോ ലോഞ്ചില്‍ ഇത് പറയണം എന്നായിരുന്നു എന്റെ ആഗ്രഹം എന്ന് പറഞ്ഞുകൊണ്ടാണ് പ്രേം കുമാര്‍ ചിത്ര ലക്ഷ്മണിന്റെ ടോക്ക് ഷോയില്‍ ഇതേ കുറിച്ച് പറയുന്നത്.

Also Read: ബോള്‍ഡ് ഫോട്ടോഷൂട്ട് ആണോ വിവാഹ മോചനത്തിന് കാരണം, ഡിപ്രഷനാണോ; ചോദ്യങ്ങള്‍ക്കെല്ലാം മറുപടി നല്‍കി ഗൗരി കൃഷ്ണന്‍

എനിക്ക് സഹോദരനെ പോലെയാണ് ശിവകാര്‍ത്തികേയന്‍. പോലെ എന്നല്ല, സഹോദരന്‍ തന്നെയാണ്. എന്റെ മകന് നെതര്‍ലാന്റില്‍ പഠിക്കാന്‍ ഒരു അവസരം കിട്ടിയിരുന്നു. പക്ഷേ അതിന് വേണ്ടത്രയും പണം എനിക്കില്ല. എജുക്വേഷന്‍ ലോണ്‍ ഒന്നും സാധ്യമല്ലായിരുന്നു, എനിക്കുള്ളത് ഒരു വീട് മാത്രമാണ്, അതിന് അത്രയും വാല്യുവും ഇല്ല. എന്ത് ചെയ്യണം എന്നറിയാതെ നില്‍ക്കുന്ന ഒരവസരത്തിലാണ് ശിവകാര്‍ത്തികേയനെ കാണുന്നത്.

സാധാരണ ഒരു സംസാരത്തിനിടയില്‍ ഇക്കാര്യം ഞാന്‍ വെറുതേ പറഞ്ഞൂ എന്നേയുള്ളൂ. ചോദിക്കുക പോലും ചെയ്യാതെ അദ്ദേഹം അന്‍പത് ലക്ഷം രൂപ എന്റെ അക്കൗണ്ടിലേക്ക് ഇട്ടു. ഇന്ന് എന്റെ മകന്‍ നാലഞ്ച് ലക്ഷം രൂപ മാസം സമ്പാദിക്കുന്നുണ്ട്. അതിന് കാരണം ശിവകാര്‍ത്തികേയന്‍ മാത്രമാണ്. ആ കാശ് ഞാന്‍ എപ്പോള്‍ തിരിച്ചു കൊടുക്കും എന്ന് പോലും അദ്ദേഹം ചോദിച്ചിട്ടില്ല, കൊടുത്താലും അത് തിരിച്ചു കിട്ടാന്‍ പ്രതീക്ഷിച്ചുകൊണ്ടല്ല അദ്ദേഹം എന്നെ സഹായിച്ചതും. യാതൊന്നും പ്രതീക്ഷിക്കാതെ സഹായിക്കാനുള്ള ആ വലിയ മനസ്സ് അധികമാര്‍ക്കും ഉണ്ടാവില്ല എന്ന് പ്രേംകുമാര്‍ പറയുന്നു.