ഐപിഎല്‍ അടുത്തയാഴ്ച പുനരാരംഭിക്കും; ഫൈനലിന്റെ തീയതിയും വേദിയും മാറ്റിയേക്കും

Authored byനിഷാദ് അമീന്‍ | Samayam Malayalam | Updated: 11 May 2025, 8:49 pm

സുരക്ഷാ കാരണങ്ങളാല്‍ താല്‍ക്കാലികമായി നിര്‍ത്തിവച്ചിരുന്ന ഇന്ത്യന്‍ പ്രീമിയര്‍ ലീഗ് (ഐപിഎല്‍) മല്‍സരങ്ങള്‍ പുനരാരംഭിക്കുന്നു. ലീഗിലെ ശേഷിക്കുന്ന മല്‍സരങ്ങള്‍ ഈ മാസം തന്നെ പൂര്‍ത്തിയാക്കി ഫൈനല്‍ മെയ് 30 (വെള്ളിയാഴ്ച) അല്ലെങ്കില്‍ ജൂണ്‍ 1 (ഞായര്‍) നടത്താനാണ് നീക്കം. പഹല്‍ഗാമിലെ ഭീകരാക്രമണങ്ങളെ തുടര്‍ന്ന് ഇന്ത്യന്‍ സേന പാകിസ്താനിലെയും പാക് അധിനിവേശ കശ്മീരിലെയും ഭീകരകേന്ദ്രങ്ങളില്‍ പ്രത്യാക്രമണം നടത്തിയ പശ്ചാത്തലത്തിലാണ് ഐപിഎല്‍ നിര്‍ത്തിവച്ചിരുന്നത്. ഇന്ത്യയും പാകിസ്താനും വെടിനിര്‍ത്തല്‍ പ്രഖ്യാപിച്ചതോടെയാണ് ഐപിഎല്‍ പുനരാരംഭിക്കുന്നത്. 'ഓപറേഷന്‍ സിന്ദൂര്‍' ശക്തമായ ശേഷം വ്യാഴാഴ്ച (മെയ് 8) നടന്ന ഡല്‍ഹി ക്യാപിറ്റല്‍സും പഞ്ചാബ് കിങ്‌സും തമ്മിലുള്ള മത്സരം 10.1 ഓവറിനുശേഷം നിര്‍ത്തിവച്ചിരുന്നു.


ഡല്‍ഹി ക്യാപിറ്റല്‍സ്-പഞ്ചാബ് കിങ്‌സ് മല്‍സരം പാതിവഴിയില്‍ നിര്‍ത്തിയെങ്കിലും ഇരു ടീമുകള്‍ക്കും പോയിന്റ് നല്‍കിയിരുന്നില്ല. അതുകൊണ്ട് തന്നെ ഈ മല്‍സരം വീണ്ടും നടത്താനാണ് സാധ്യത. പുതിയ ഷെഡ്യൂള്‍ വൈകാതെ പുറത്തുവരുന്നതോടെ ഇക്കാര്യത്തില്‍ വ്യക്ത ലഭിക്കും.

മെയ് ഒമ്പത് വെള്ളിയാഴ്ച നടക്കേണ്ടിയിരുന്ന റോയല്‍ ചലഞ്ചേഴ്സ് ബെംഗളൂരുവും (ആര്‍സിബി) ലഖ്നൗ സൂപ്പര്‍ ജയന്റ്സും (എല്‍എസ്ജി) തമ്മിലുള്ള മത്സരത്തോടെയാണ് ലീഗ് വീണ്ടും ആരംഭിക്കുക. ഏതാനും ദിവസത്തെ മല്‍സരങ്ങള്‍ മുടങ്ങിയതിനാല്‍ ഫൈനല്‍ മല്‍സരത്തിന്റെ തീയതിയില്‍ മാറ്റംവരുത്തേണ്ടി വരും. നിശ്ചയിച്ചതിലും അഞ്ച് ദിവസം വൈകി മെയ് 30 (വെള്ളിയാഴ്ച) അല്ലെങ്കില്‍ ജൂണ്‍ 1 (ഞായര്‍) എന്നിവയിലൊന്നില്‍ നടക്കും.

വിരാട് കോഹ്ലി വിരമിച്ചാൽ കോളടിക്കുക ഈ മൂന്ന് ഇന്ത്യൻ താരങ്ങൾക്ക്; ലിസ്റ്റിൽ തിരിച്ചുവരവിന് കാത്തിരിക്കുന്ന താരവും
ഫൈനല്‍ മല്‍സരത്തിന്റെ തീയതിക്കൊപ്പം വേദിയും മാറ്റാന്‍ സാധ്യതയുണ്ട്. മെയ് 25 ന് കൊല്‍ക്കത്തയില്‍ നടക്കേണ്ടിയിരുന്ന ഫൈനല്‍ അഹമ്മദാബാദിലേക്ക് മാറ്റിയേക്കുമെന്നാണ് സൂചന.

പ്ലേ ഓഫ് മാച്ചുകളും ഹൈദരാബാദില്‍ നിശ്ചയിച്ച് ക്വാളിഫയര്‍ 1 ഉം എലിമിനേറ്ററും അതേ വേദികളില്‍ തന്നെ നടക്കും. രണ്ടാം ക്വാളിഫയറും ഫൈനലും കൊല്‍ക്കത്തയിലാണ് നിശ്ചയിച്ചിരുന്നതെങ്കിലും ഈഡന്‍ ഗാര്‍ഡന്‍സില്‍ മഴ ഭീഷണി പരിഗണിച്ചാണ് ഫൈനല്‍ അഹമ്മദാബാദിലെ നരേന്ദ്ര മോദി സ്റ്റേഡിയത്തിലേക്ക് മാറ്റാന്‍ ആലോചിക്കുന്നത്.

ഞെട്ടിക്കുന്ന നീക്കം... രോഹിത് ശര്‍മ വിരമിച്ചു; പ്രഖ്യാപനം ക്യാപ്റ്റന്‍ സ്ഥാനത്തു നിന്ന് നീക്കിയെന്ന റിപോര്‍ട്ടിന് പിന്നാലെ
ചെന്നൈ സൂപ്പര്‍ കിങ്‌സ്, രാജസ്ഥാന്‍ റോയല്‍സ്, സണ്‍റൈസേഴ്സ് ഹൈദരാബാദ് എന്നീ ടീമുകള്‍ ഇതിനകം പ്ലേഓഫ് മത്സരത്തില്‍ നിന്ന് പുറത്തായി കഴിഞ്ഞു. ഗുജറാത്ത് ടൈറ്റന്‍സും ആര്‍സിബിയും 16 പോയിന്റുകളുമായി ആദ്യ രണ്ട് സ്ഥാനത്തുണ്ട്. പിബികെഎസ് 15 പോയിന്റുമായി മൂന്നാം സ്ഥാനത്താണ്. 14 പോയിന്റുമായി മുംബൈ ഇന്ത്യന്‍സ് നാലാം സ്ഥാനത്തും 13 പോയിന്റുമായി ഡല്‍ഹി ക്യാപിറ്റല്‍സ് അഞ്ചാം സ്ഥാനത്തുമാണ്.