ഐപിഎല്‍ ലോഗോ ബംഗ്ലാദേശ് താരത്തിന്റെ ചിത്രത്തില്‍ നിന്നോ? എബിഡിയുടെ ഷോട്ടും ചര്‍ച്ചാവിഷയം; വസ്തുത ഇങ്ങനെ

ഇന്ത്യന്‍ പ്രീമിയര്‍ ലീഗിലെ ശ്രദ്ധേയമായ ലോഗോ ഏത് ക്രിക്കറ്ററുടെ ഷോട്ടില്‍ നിന്ന് പ്രചോദനം ഉള്‍ക്കൊണ്ട് തയ്യാറാക്കിയതാണെന്ന ചര്‍ച്ചകള്‍ വീണ്ടും ശക്തമായി. ബംഗ്ലാദേശ് താരം മുസ്തഫിസുര്‍ റഹ്‌മാനെ ഐപിഎല്ലില്‍ നിന്ന് ഒഴിവാക്കുകയും ബംഗ്ലാദേശ് ഇന്ത്യയില്‍ ടി20 ലോകകപ്പ് കളിക്കാനില്ലെന്ന് അറിയിക്കുകയും ചെയ്ത സാഹചര്യത്തിലാണിത്. ബിസിസിഐയുടെ നിര്‍ദേശാനുസരണം മുസ്തഫിസുറിനെ കെകെആര്‍ ഒഴിവാക്കിയതോടെ ഐപിഎല്‍ 2026 രാജ്യത്ത് സംപ്രേക്ഷണം ചെയ്യില്ലെന്നാണ് ബംഗ്ലാദേശിന്റെ തീരുമാനം. ഇതിനിടെയാണ് ബംഗ്ലാദേശ് ആരാധകര്‍ ഐപിഎല്‍ ലോഗോ തയ്യാറാക്കിയത് മുന്‍ ബംഗ്ലാദേശ് ക്രിക്കറ്റ് ടീം ക്യാപ്റ്റന്‍ മഷ്റഫെ മുര്‍ത്തസയില്‍ നിന്ന് പ്രചോദനം ഉള്‍ക്കൊണ്ടാണെന്ന വാദം സോഷ്യല്‍ മീഡിയയില്‍ വീണ്ടും ഉന്നയിച്ചത്. ദക്ഷിണാഫ്രിക്കന്‍ ഇതിഹാസം എബി ഡിവില്ലിയേഴ്സില്‍ നിന്ന് പ്രചോദനം ഉള്‍ക്കൊണ്ടാണ് ലോഗോ തയ്യാറാക്കിയതെന്നും വാദങ്ങളുണ്ട്.


ഏകദേശം രണ്ട് പതിറ്റാണ്ടുകളായി ലോഗോ വലിയ മാറ്റമില്ലാതെ ഉപയോഗിച്ചുവരുന്നു. ഡിസൈനിന്റെ ഉത്ഭവവും ബ്രാന്‍ഡിന് പിന്നിലെ വ്യക്തിയെക്കുറിച്ചുള്ള വസ്തുത പരിശോധിക്കാം. 2008 ല്‍ ഐപിഎല്‍ ആരംഭിച്ചപ്പോഴുള്ള ലോഗോ ആണ് ഇപ്പോഴുമുള്ളത്. ഉജ്വലമായ സ്വാഷ്ബക്ക്‌ലിങ് ഷോട്ട് കളിക്കുന്ന ബാറ്റ്സ്മാന്റെ ചിത്രത്തില്‍ നിന്നാണ് ലോഗോ രൂപപ്പെട്ടത്. വ്യക്തിയെ കേന്ദ്രീകരിക്കാതെ ഷോട്ടിന് പ്രാധാന്യം നല്‍കുന്ന ലോഗോ ബ്രാന്‍ഡ് ഐഡന്റിറ്റിയായി മാറി.

Premier League: മാഞ്ചസ്റ്റര്‍ യുണൈറ്റഡ് കോച്ചിനെ പുറത്താക്കി; അമോറിമിന് പകരക്കാരനാവാന്‍ സാധ്യത ഈ ആറ് പേര്‍ക്ക്
ഡിവില്ലിയേഴ്സിനെ ചിത്രീകരിക്കുന്നു എന്ന വാദത്തിനാണ് ആരാധകര്‍ക്കിടയില്‍ ഏറ്റവും പ്രചാരം. ഗ്രൗണ്ടിന്റെ എല്ലാ കോണുകളിലേക്കും പന്ത് അടിക്കാനുള്ള അസാധാരണമായ കഴിവ് കൊണ്ട് 'മിസ്റ്റര്‍ 360' എന്നറിയപ്പെടുന്ന ഡിവില്ലിയേഴ്സിന്റെ ഷോട്ട് പോസിനോട് ലോഗോയ്ക്ക് സാമ്യതകളുണ്ട്. ഉയര്‍ന്ന ബാക്ക്ലിഫ്റ്റ് ഷോട്ടുകളും കിടയറ്റ സ്‌ട്രോക്കുകളും കൊണ്ട് ആര്‍സിബിയിലും അന്താരാഷ്ട്ര ടി20യിലും ശ്രദ്ധേയമായ കരിയര്‍ എബിഡിക്ക് ഉണ്ട്.

2007 അവസാനത്തിലാണ് ഐപിഎല്‍ ലോഗോ അനാച്ഛാദനം ചെയ്തത്. അന്ന് ഐപിഎല്‍ മല്‍സരങ്ങള്‍ തുടങ്ങിയിട്ടില്ല. ആ സമയത്ത് ഡിവില്ലിയേഴ്സ് അന്താരാഷ്ട്ര ക്രിക്കറ്റില്‍ സജീവമാണെങ്കിലും ശ്രദ്ധേയമായ '360-ഡിഗ്രി' ടി20 ശൈലി അദ്ദേഹം അതുവരെ വികസിപ്പിച്ചിരുന്നില്ല.

15 പന്തില്‍ ഫിഫ്റ്റി, വീണ്ടും വൈഭവിന്റെ വെടിക്കെട്ട്; ഋഷഭിന്റെ യൂത്ത് ഏകദിന റെക്കോഡ് തകര്‍ന്നു
മഷ്റഫെ മുര്‍ത്തസയുടെ ഫോട്ടോയില്‍ നിന്നാണ് ലോഗോ തയ്യാറാക്കിയതെന്ന വാദത്തിനും തെളിവില്ല. 2000 കളുടെ തുടക്കത്തില്‍ ഒരു മത്സരത്തിനിടെ മുര്‍ത്തസ ശക്തമായ ലോഫ്റ്റഡ് ഷോട്ട് കളിക്കുന്നത് ചിത്രം ഈ വാദത്തെ പിന്തുണയ്ക്കുന്നവര്‍ എടുത്തുകാണിക്കുന്നു. കാലുകളുടെയും ബാറ്റിന്റെ കോണിന്റെയും ഒരേ വിന്യാസവും ചൂണ്ടിക്കാട്ടുന്നു. ദൃശ്യ സാമ്യം ശ്രദ്ധേയമാണെങ്കിലും മുര്‍ത്തസയുടെ ചിത്രം ബിസിസിഐയോ ഡിസൈന്‍ ഏജന്‍സിയോ ഉറവിടമാക്കിയതായി ഔദ്യോഗിക രേഖയില്ല.

ലോഗോ ഒരു പ്രത്യേക വ്യക്തിയെയും പ്രതിനിധീകരിക്കുന്നില്ലെന്ന് ബിസിസിഐയും ഐപിഎല്ലിന്റെ ഡിസൈന്‍ ടീമും വ്യക്തമാക്കുന്നു. ആധുനിക ടി20 ബാറ്റ്സ്മാന്റെ പൊതുവായ പ്രാതിനിധ്യമായിട്ടാണ് ഇത് രൂപകല്‍പ്പന ചെയ്തത്. യുകെ ആസ്ഥാനമായുള്ള ഡിസൈന്‍ ഏജന്‍സിയായ വെഞ്ച്വര്‍ത്രീ ആണ് ലോഗോ തയ്യാറാക്കിയത്.

ലീഗിന്റെ ഐഡന്റിറ്റിയെ ഏതെങ്കിലും കളിക്കാരനുമായി ബന്ധിപ്പിക്കാതെ കാലാതീതമായി നിലനില്‍ക്കുന്ന ലോഗോ ഡിസൈനര്‍മാര്‍ രൂപപ്പെടുത്തുകയായിരുന്നു. കായികരംഗത്തെ ഏറ്റവും സമ്പന്നമായ ലീഗുകളില്‍ ഒന്നായി ഐപിഎല്‍ മുന്നേറുമ്പോള്‍ 'ലോഗോ മാന്‍' ആര് എന്ന നിഗൂഢത ഇനിയും തുടരുമെന്ന് കരുതാം.