ഐപിഎല്ലിലെ വമ്പൻ നാണക്കേടിൽ ഷർദുൽ താക്കൂർ; ലീഗിന്റെ ചരിത്രത്തിൽ ഇങ്ങനൊന്ന് ആദ്യം

Curated byഗോകുൽ എസ് | Samayam Malayalam | Updated: 9 Apr 2025, 2:07 pm

Samayam Malayalamഷർദുൽ താക്കൂർ

കൊൽക്കത്ത നൈറ്റ് റൈഡേഴ്സിന് എതിരെ ഇന്നലെ നടന്ന ഐപിഎൽ മത്സരത്തിൽ ലക്നൗ സൂപ്പർ ജയന്റ്സ് പേസർ ഷർദുൽ താക്കൂർ സ്വന്തമാക്കിയത് നാണം കെട്ട ഒരു റെക്കോഡ്. കെകെആർ ഇന്നിങ്സിന്റെ പതിമൂന്നാം ഓവറിലായിരുന്നു‌ ഷർദുൽ താക്കൂർ നാണം കെട്ടത്. ഐപിഎല്ലിന്റെ ചരിത്രത്തിൽ തന്നെ ഇതാദ്യമായാണ് ഇങ്ങനൊരു സംഭവം അരങ്ങേറിയത്.
കൊൽക്കത്ത നൈറ്റ് റൈഡേഴ്സ് ഇന്നിങ്സിന്റെ 13 മത് ഓവറിൽ ഷർദുൽ താക്കൂർ തുടർച്ചയായി അഞ്ച് വൈഡുകളാണ് എറിഞ്ഞത്. ഇതോടെ ഐപിഎല്ലിൽ അഞ്ച് വൈഡുകൾ തുടർച്ചയായി എറിയുന്ന ആദ്യ ബൗളറെന്ന നാണക്കേട് ഷർദുൽ താക്കൂറിന് സ്വന്തമായി. ഐപിഎല്ലിൽ ഒരോവറിൽ അഞ്ച് വൈഡുകൾ എറിയുന്ന രണ്ടാമത്തെ ബൗളർ കൂടിയാണ് ഷർദുൽ താക്കൂർ. ഇന്ത്യൻ സ്റ്റാർ പേസർ മുഹമ്മദ് സിറാജാണ് ഈ നാണക്കേടിൽ പേരെഴുതി ചേർത്ത ആദ്യ താരം. ആർസിബിയുടെ കളിക്കാരനായിരുന്ന മുഹമ്മദ് സിറാജ്, 2023 ൽ മുംബൈ ഇന്ത്യൻസിന് എതിരായ കളിയിലാണ് ഒരോവറിൽ അഞ്ച് വൈഡുകൾ എറിഞ്ഞത്.

Also Read: ഐപിഎല്‍ പൂരത്തില്‍ നിക്കോളാസ് പൂരന് പുതിയ റെക്കോഡ്; വെടിക്കെട്ട് താരങ്ങളില്‍ രണ്ടാമന്‍

ഇന്നലെ കൊൽക്കത്ത നൈറ്റ് റൈഡേഴ്സിന് എതിരെ നടന്ന മത്സരത്തിൽ തന്റെ നാല് ഓവർ സ്പെല്ലിൽ എട്ട് വൈഡ് ബോളുകളാണ് ഷർദുൽ താക്കൂർ എറിഞ്ഞത്. ഇതുമൊരു നാണക്കേടാണ്. ഒരു ഐപിഎൽ മത്സരത്തിൽ ഏറ്റവും കൂടുതൽ വൈഡുകൾ എറിയുന്ന താരമായാണ് ഷർദുൽ മാറിയത്. ഏഴ് വൈഡുകൾ വീതം ഒരു കളിയിൽ എറിഞ്ഞ ഖലീൽ അഹമ്മദിന്റെയും മതീഷ പതിരാനയുടെയും പേരിലായിരുന്നു ഇത്രയും നാൾ ഇക്കാര്യത്തിലെ നാണക്കേട്.

Also Read: അടുത്ത കളിക്ക് മുൻപ് രാജസ്ഥാൻ റോയൽസിനെ പേടിപ്പിക്കുന്നത് ഇക്കാര്യം; സഞ്ജുവിന്റെ ടീമിന് ആശങ്കയായി ഈ കണക്കുകൾ

അതേ സമയം വൈഡെറിഞ്ഞ് നാണക്കേടിന്റെ റെക്കോഡിൽ ഇടം പിടിച്ച ഷർദുൽ താക്കൂർ, ഈ കളിയിൽ രണ്ട് നിർണായക വിക്കറ്റുകൾ വീഴ്ത്തി എന്നതും ശ്രദ്ധേയം. കെകെആറിന്റെ അപകടകാരികളായ ബാറ്റർമാരായ അജിങ്ക്യ രഹാനെയേയും ആന്ദ്രെ റസലിനെയുമാണ് താക്കൂർ വീഴ്ത്തിയത്. ഐപിഎൽ മെഗാ ലേലത്തിൽ അൺസോൾഡായ ഷർദുൽ താക്കൂർ പരിക്കേറ്റ് പുറത്തായ മൊഹ്സിൻ ഖാന് പകരക്കാരനായാണ് ലക്നൗവിൽ എത്തിയത്. അഞ്ച് കളികളിൽ നിന്ന് ഒ‌ൻപത് വിക്കറ്റുകൾ വീഴ്ത്തി മികച്ച ഫോമിലാണ് ഷർദുൽ താക്കൂർ ഇത്തവണ.