ഐപിഎൽ ഫൈനലിൽ ആദ്യ മുൻതൂക്കം പഞ്ചാബ് കിങ്സിന്, ടോസ് നേടി; കിടിലൻ പ്ലേയിങ് ഇലവനുകൾ ഇങ്ങനെ

Curated by: ഗോകുൽ എസ്|Samayam Malayalam•3 Jun 2025, 7:13 pm

2025 സീസൺ ഇന്ത്യൻ പ്രീമിയർ ലീഗിന്റെ ഫൈനലിൽ ടോസ് നേടിയ പഞ്ചാബ് കിങ്സ് നായകൻ ശ്രേയസ് അയ്യർ, റോയൽ ചലഞ്ചേഴ്സ് ബംഗളൂരുവിനെ ബാറ്റി‌ങ്ങിന് അയച്ചു. അവസാന മത്സരത്തിൽ കളിച്ച ടീമിൽ മാറ്റങ്ങളൊന്നുമില്ലാതെയാണ് ഇരു‌ടീമുകളും ഫൈനലിന് ഇറങ്ങുന്നത്.ആർസിബിയുടെ പ്ലേയിങ് ഇലവൻ: ഫിൽ സാൾട്ട്, വിരാട് കോഹ്ലി, മയങ്ക് അഗർവാൾ, രജത് പാട്ടിദാർ, ലിയാം ലിവിങ്സ്റ്റൺ, ജിതേഷ് ശർമ, റൊമാരിയോ ഷെഫേഡ്, കൃണാൽ പാണ്ഡ്യ, ഭുവനേശ്വർ കുമാർ, യഷ് ദയാൽ, ജോഷ് ഹേസൽവുഡ്.

പഞ്ചാബ് കിങ്സ് പ്ലേയിങ് ഇലവൻ: പ്രിയാൻഷ് ആര്യ, ജോഷ് ഇംഗ്ലിസ്, ശ്രേയസ് അയ്യർ, നേഹാൽ വധേര, ശശാങ്ക് സിങ്, മാർക്കസ് സ്റ്റോയിനിസ്, അസ്മതുള്ള ഒമർസായ്, കൈൽ ജാമിസൺ, വിജയകുമാർ വൈശാഖ്, അർഷ്ദീപ് സിങ്, യുസ്വേന്ദ്ര ചഹൽ.


അതേ സമയം ഇന്നത്തെ ഫൈനലിൽ ആരു ജയിച്ചാലും ഐപിഎല്ലിന് പുതിയ ജേതാക്കളെ ലഭിക്കും. 2008 ലെ പ്രഥമ സീസൺ ഐപിഎൽ മുതൽ മത്സര രംഗത്തുണ്ടെങ്കിലും ഇതുവരെ കിരീടം നേടാൻ സാധിച്ചിട്ടില്ലാത്ത രണ്ട് ടീമുകളാണ് പഞ്ചാബ് കിങ്സും റോയൽ ചലഞ്ചേഴ്സ് ബംഗളൂരുവും. കപ്പില്ലാ ടീമെന്ന നാണക്കേടിൽ നിന്ന് ഒരു ടീം ഇന്ന് പുറത്ത് കടക്കുമെന്ന് ചുരുക്കം.

ആർസിബി ഫൈനലിലേക്കുള്ള വഴി: രജത് പാട്ടിദാർ നയിക്കുന്ന റോയൽ ചലഞ്ചേഴ്സ് ബംഗളൂരു ഈ സീസണിന്റെ തുടക്കം മുതൽ മിന്നും ഫോമിലാണ്. ലീഗ് ഘട്ടത്തിൽ രണ്ടാം സ്ഥാനത്ത് ഫിനിഷ് ചെയ്താണ് അവർ പ്ലേ ഓഫിൽ എത്തിയത്. 14 കളികളിൽ 19 പോയിന്റായിരുന്നു ടീമിന്റെ സമ്പാദ്യം. ഒൻപത് കളികളിൽ വിജയം നേടിയ ടീം നാല് മത്സരങ്ങളിൽ തോറ്റു. ഒരു മത്സരം മഴയെ തുടർന്ന് ഉപേക്ഷിച്ചു. ആദ്യ ക്വാളിഫയറിൽ പഞ്ചാബ് കിങ്സായിരുന്നു ടീമിന്റെ എതിരാളികൾ. എട്ട് വിക്കറ്റിന്റെ ഗംഭീര ജയം നേടി ഫൈനലിലേക്ക് മാർച്ച് ചെയ്യാൻ അവർക്കായി. സുയാഷ് ശർമയായിരുന്നു കളിയിലെ കേമൻ.

Also Read: ആര്‍സിബി ഐപിഎല്‍ കിരീടം നേടുമെന്ന് 6.4 കോടി രൂപക്ക് പന്തയം വെച്ചിരിക്കുകയാണ് കനേഡിയന്‍ റാപ്പ് ഗായകന്‍

പഞ്ചാബ് കിങ്സ് ഫൈനലിലേക്കുള്ള വഴി: 2025 സീസണ് മുൻപ് നടന്ന മെഗാലേലത്തോട് കൂടി അടിമുടി മാറിയ പഞ്ചാബ് കിങ്സ് കിടിലൻ പ്രകടനമാണ് ഈ സീസണിൽ ഉടനീളം കാഴ്ച വെച്ചത്. ലീഗ് ഘട്ടത്തിൽ, പോയിന്റ് പട്ടികയിലെ ഒന്നാം സ്ഥാനക്കാരായിരുന്നു അവർ. 14 കളികളിൽ 19 പോയിന്റുമായാണ് ടീം ലീഗ് ഘട്ടം അവസാനിപ്പിച്ചത്. ഒൻപത് മത്സരങ്ങളിൽ വിജയിച്ച ടീം, നാല് മത്സരങ്ങളിൽ തോറ്റു. ഒരു മത്സരത്തിന് ഫലമുണ്ടായില്ല. പോയിന്റ് പട്ടികയിലെ ഒന്നാം സ്ഥാനക്കാരായത് കൊണ്ടുതന്നെ പ്ലേ ഓഫിൽ ആദ്യ ക്വാളിഫയറിലേക്ക് അവരെത്തി. എന്നാൽ അവിടെ ആർസിബിയോട് എട്ട് വിക്കറ്റിന്റെ തോൽവി പഞ്ചാബിന് ഏറ്റുവാങ്ങേണ്ടി വന്നു.

Also Read: ഐപിഎൽ ഫൈനലിന് മുൻപ് ശ്രേയസ് അയ്യരിനെ പേടിപ്പിക്കുന്നത് ഈ കാര്യം. ടീമിന് മുന്നിലെ പ്രധാന ആശങ്ക ഇങ്ങനെ...

രണ്ടാം ക്വാളിഫയറിൽ കരുത്തരായ മുംബൈ ഇന്ത്യൻസാണ്, പഞ്ചാബ് കിങ്സിന്റെ എതിരാളികളായി എത്തിയത്. അവിടെ അഞ്ച് വിക്കറ്റിന് ഹാർദിക് പാണ്ഡ്യയെയും സംഘത്തെയും കീഴടക്കി പഞ്ചാബ് ഐപിഎൽ ഫൈനലിലേക്ക് മുന്നേറി. ക്യാപ്റ്റൻ ശ്രേയസ് അയ്യരായിരുന്നു ഈ കളിയിൽ പഞ്ചാബിന്റെ ഹീറോ.