ഒരു അഷ്ടമി രോഹിണിയിൽ കിട്ടിയ അനുഗ്രഹം, അമ്മയുടെ പൊന്നു മോൻ; മകന് പിറന്നാൾ ആശംസകളുമായി സംയുക്ത വർമ

Authored by: അശ്വിനി പി|Samayam Malayalam•14 Sept 2025, 12:49 pm

വിരലുകളിൽ എണ്ണാവുന്ന അത്രയും സിനിമകൾ മാത്രമേ സംയുക്ത വർമ അഭിനയിച്ചിട്ടുള്ളൂ എങ്കിലും, അതൊക്കെയും വിജയം നേടിയവയായിരുന്നു. ചുരുങ്ങിയ കാലം കൊണ്ട് തന്നെ മലയാള സിനിമയിലും പ്രേക്ഷക മനസ്സിലും ഇടം നേടിയ സംയുക്ത വർമ പുരസ്കാരങ്ങളും അംഗീകാരങ്ങളും നേടിയിട്ടുമുണ്ട്.

എന്നാൽ ബിജു മേനോനുമായുള്ള വിവാഹത്തിന് ശേഷം പൂർണമായും അഭിനയ ലോകത്ത് നിന്ന് വിട്ടു നിൽക്കുകയാണ് നടി. അഭിനയിക്കാൻ പ്രേക്ഷകരും ബിജു മേനോനും നിർബന്ധിച്ചാലും സംയുക്ത വർമയ്ക്ക് താത്പര്യമില്ല. അഭിനയം നിർത്തിയതിന് ശേഷം കുറേക്കാലം സംയുക്തയെ എവിടെയും കണ്ടിരുന്നില്ല. എന്നാൽ ഇപ്പോൾ സോഷ്യൽ മീഡിയയിൽ സജീവമാണ് നടി. തന്റെയും കുടുംബത്തിന്റെയും വിശേഷങ്ങൾ സംയുക്ത അവിടെ പങ്കുവയ്ക്കാറുണ്ട്

ഇപ്പോഴിതാ മകന് പിറന്നാൾ ആശംസകൾ അറിയിച്ച് മനോഹരമായ ഒരു പോസ്റ്റ് പങ്കുവച്ച് എത്തിയിരിക്കുകയാണ് സംയുക്ത വർമ. ഇന്ന് അഷ്ടമി രോഹിണിയാണ്, ഇതുപോലൊരു അഷ്ടമി രോഹിണി നാളിലാണ്, പത്തൊൻപത് വർഷങ്ങൾക്ക് മുൻപ് സംയുക്തയ്ക്ക് ദക്ഷിനെ കിട്ടിയത്. അക്കാര്യമാണ് സംയുക്ത പോസ്റ്റിൽ കുറിക്കുന്നത്.

Also Read: അക്ബറിന്റെ ഉമ്മ ആദിലയെയും നൂറയെയും വീട്ടിൽ കയറ്റുമോ? ലക്ഷ്മിയുടെ പരമാർശത്തിന് ഉമ്മയുടെ പ്രതികരണം

ദക്ഷ് ചെറുതായിരുന്നപ്പോൾ എടുത്ത ഒരു ഫാമിലി ഫോട്ടോ പങ്കുവച്ചുകൊണ്ടാണ് സംയുക്തയുടെ ഇൻസ്റ്റഗ്രാം പോസ്റ്റ്. ഇതുപോലൊരു പുണ്യ അഷ്ടമി രോഹിണി ദിവസം ഞങ്ങൾക്ക് നിന്നെ കിട്ടി അനുഗ്രഹീതരായി. ഹാപ്പി ബർത്ത് ഡേ ദക്ഷ്, അമ്മയുടെ കുഞ്ഞു വാവ- എന്നാണ് ഫോട്ടോയ്ക്കൊപ്പം സംയുക്ത കുറിച്ചത്.

മഴ, മധുരനൊമ്പരക്കാറ്റ്, മേഘമൽഹാർ എന്നിങ്ങനെയുള്ള സിനിമകളിൽ ഒന്നിച്ചഭിനയിച്ചതിലൂടെ പ്രണയത്തിലായതാണ് ബിജു മേനോനും സംയുക്ത വർമയും. 2002 ൽ ആയിരുന്നു ഇരുവരുടെയും വിവാഹം. വിവാഹം കഴിഞ്ഞ് നാല് വർഷത്തെ കാത്തിരിപ്പിന് ശേഷമായിരുന്നു ദക്ഷിന്റെ ജനനം. അതിന് ശേഷം സംയുക്ത വർമ വീണ്ടും കുടുംബത്തിലേക്ക് കൂടുതൽ ഒതുങ്ങിക്കൂടി.


പ്രസവമൊക്കെ കഴിഞ്ഞതിന് ശേഷമുള്ള ശാരീരിക മാറ്റം തന്നെ മാനസികമായി തളർത്തിയിരുന്നതായി ഒരിക്കൽ സംയുക്ത വർമ പറഞ്ഞിരുന്നു. അതിൽ നിന്ന് പുറത്ത് കടക്കാൻ സഹായിച്ചത് യോഗയാണ്. ഇപ്പോൾ യോഗയാണ് സംയുക്ത വർമയ്ക്ക് ഏറ്റവും ഇഷ്ടപ്പെട്ട കാര്യം