ഒരുപാട് ആലോചിച്ചെടുത്ത തീരുമാനമാണത്, ഒട്ടും കംഫർട്ട് അല്ലാതെയാണ് ആ റോൾ ചെയ്തത് എന്ന് അനുപമ പരമേശ്വരൻ

Authored by: അശ്വിനി പി|Samayam Malayalam•13 Aug 2025, 7:22 pm

അനുപമ പരമേശ്വരന് ഒരുപാട് വിമർശനങ്ങൾ നേടിക്കൊടുത്ത ചിത്രമാണ് തില്ലു സ്ക്വയർ എന്ന തെലുങ്ക് ചിത്രം. ഒട്ടും പ്രതീക്ഷിക്കാത്ത അത്രയും ഗ്ലാമറായി, ഇന്റിമേറ്റ് രംഗങ്ങളിൽ അനുപമ അഭിനയിക്കും എന്ന് ആരാധകർ ആരും പ്രതീക്ഷിച്ചിരുന്നില്ല. എന്നാൽ ഒരുപാട് ആലോചിച്ച ശേഷമാണ് ആ ചിത്രത്തിൽ അഭിനയിച്ചത് എന്ന് അനുപമ പരമേശ്വരൻ പറയുന്നു

അനുപമ നായകിയാകുന്ന പർദ്ദ എന്ന പാൻ ഇന്ത്യൻ ചിത്രത്തിന്റെ പ്രമോഷനിൽ സംസാരിക്കുകയായിരുന്നു നടി. പർദ്ദയിലെ ഇന്റിമേറ്റ് രംഗങ്ങൾ ചെയ്യുന്നതിൽ തനിക്ക് നാണക്കേട് ഉണ്ടായിരുന്നില്ല എന്ന് അനുപമ പറഞ്ഞപ്പോഴാണ്, തില്ലു സ്ക്വയറിലെ വേഷം എന്തുകൊണ്ട് ഏറ്റെടുത്തു എന്ന ചോദ്യം വന്നത്.

Also Read: പ്രസ് മീറ്റിൽ വിതുമ്പി കരഞ്ഞ് അനുപമ പരമേശ്വരൻ; ഇത് നിസ്സാരമല്ല, ഒരു സ്ത്രീ എന്ന നിലയിൽ തന്റെ സിനിമയ്ക്ക് വേണ്ടി ഒരുപാട് അനുഭവിച്ചു

തില്ലു സ്ക്വയറിന് യെസ് പറയാൻ താൻ ഒരുപാട് സമയമെടുത്തു എന്ന് അനുപമ പറഞ്ഞു. എനിക്ക് രണ്ട് മനസ്സായിരുന്നു. തീരുമാനമെടുക്കാൻ വളരെ പ്രയാസം തോന്നിയ ഒരു സിനിമ കൂടെയാണ്. അത്രയധികം ആത്മവിശ്വാസത്തോടെയല്ല ഞാൻ ആ റോൾ ചെയ്തത്, എന്തെന്നാൽ എന്റെ യഥാർത്ഥ ജീവിതത്തിൽ നിന്നും തീർത്തും വ്യത്യസ്തമാണ് ആ റോൾ. അത്തരം വസ്ത്രങ്ങൾ ഞാൻ റിയൽ ലൈഫിൽ ധരിക്കാറില്ല, അതും എന്റെ ആത്മവിശ്വാസത്തെ ബാധിച്ചു.

Also Read: എനിക്ക് നല്ലൊരു ജീവിതവും ഭർത്താവിനെയും ഒന്നും വിധിച്ചിട്ടില്ല; ആദ്യബന്ധം ഏവിയേഷൻ പഠിക്കുമ്പോൾ; രേണു സുധി

നല്ലതായി കാണാൻ വേണ്ടി ഒരുപാട് സമയമെടുത്ത് എന്തെങ്കിലും ചെയ്യുന്നത് എനിക്കിഷ്ടമില്ലാത്ത കാര്യമാണ്, കുറഞ്ഞ സമയത്തിനുള്ളിൽ ഒരുങ്ങുന്നതാണ് എനിക്ക് കൂടുതൽ കംഫർട്ട് നൽകുന്നത്, അത് എനിക്ക് ആത്മവിശ്വാസവും നൽകും. ആത്മവിശ്വാസം എന്റെ അഭിനയത്തിൽ പ്രതിഫലിക്കുകയും ചെയ്യും. തില്ലു സ്ക്വയർ പോലൊരു സിനിമ ചെയ്യുമ്പോൾ എന്നെ നന്നായി കാണാൻ വേണ്ടി ഒരുപാട് സമയമെടുത്തു, അത് ഏറ്റവും വെല്ലുവിളിയുള്ള കാര്യമായിരുന്നു.


അങ്ങനെ ഒരു റോൾ ചെയ്താൽ ജനം എങ്ങനെ അത് സ്വീകരിക്കും എന്ന കാര്യത്തിലും എനിക്ക് ആശയക്കുഴപ്പം ഉണ്ടായിരുന്നു. ഉറപ്പായും വിമർശനങ്ങളുണ്ടാവും. അത്തരം റോളുകൾ ഞാൻ ചെയ്യുന്നത് ആരാധകർക്ക് ഇഷ്ടമില്ല. പക്ഷേ ആളുകൾ അതിനെ ഇഷ്ടപ്പെട്ടു, നായകനെക്കാൾ ശക്തമായ വേഷമായിരുന്നു അത്- അനുപമ പരമേശ്വരൻ പറഞ്ഞു.