ഒരേയൊരു സൂര്യകുമാർ; വീണ്ടും ചരിത്രം കുറിച്ച് ഇന്ത്യയുടെ ടി20 നായകൻ

Authored by: അനുഷ ഗംഗാധരൻ|Samayam Malayalam•22 May 2025, 12:21 am

ഐപിഎൽ 2025 ൽ പുതുചരിത്രം കുറിച്ചിരിക്കുകയാണ് മുംബൈ ഇന്ത്യൻസ് താരം സൂര്യകുമാർ യാദവ്. ഡൽഹി ക്യാപിറ്റൽ - മുംബൈ ഇന്ത്യൻസ് മത്സരത്തിനിടെയാണ് താരം ചരിത്രം കുറിച്ചത്. 43 പന്തിൽ 73 റൺസ് നേടിയാണ് താരം എലൈറ്റ് പട്ടികയിൽ ഒന്നാമതെത്തുന്നത്. ഐപിഎൽ 2025 സീസൺ ആരംഭിച്ചത് മുതൽ 13 മത്സരങ്ങളിലും 25 റൺസിൽ കൂടുതൽ നേടിയ താരം എന്ന റെക്കോഡാണ് ഇന്ത്യയുടെ ടി 20 നായകൻ സ്വന്തം പേരിൽ എഴുതി ചേർത്തത്.
ഡൽഹിയെ എറിഞ്ഞ് തകർത്ത് പ്ലേ ഓഫ് ഉറപ്പിച്ച് മുംബൈ ഇന്ത്യൻസ്; സൂര്യകുമാറും ബുംറയും സാറ്റ്നറും തിളങ്ങി
ടി20 ക്രിക്കറ്റിൽ തുടർച്ചയായി ഏറ്റവും കൂടുതൽ 25+ സ്കോറുകൾ നേടിയ ടെംബ ബവുമയുടെ റെക്കോഡിനൊപ്പമാണ് സൂര്യകുമാർ യാദവ് ഇതോടെ എത്തിയിരിക്കുന്നത്. ഈ സീസണിന്റെ തുടക്കത്തിൽ ആദ്യ പത്ത് മത്സരങ്ങളിൽ തുടർച്ചയായി ഏറ്റവും കൂടുതൽ 25+ റൺസുകൾ നേടിറോബിൻ ഉത്തപ്പയുടെ റെക്കോഡും തകർത്തിരുന്നു.

11 മത്സരങ്ങളിൽ തുടർച്ചയായി 25+ റൺസ് നേടിയതോടെ കുമാർ സംഗക്കാരയെയും മറികടന്ന് താരം മുന്നോട്ടു കുതിച്ചു. ഇന്നിപ്പോൾ ഏഷ്യയിൽ ആദ്യമായി തുടർച്ചയായി 11 മത്സരങ്ങളിൽ 25+ റൺസ് നേടിയ താരം എന്ന റെക്കോഡും സൂര്യകുമാറിനെ തേടി എത്തിയിരിക്കുകയാണ്. അതേസമയം ഡൽഹി ക്യാപിറ്റൽസ് - മുംബൈ ഇന്ത്യൻസ് മത്സരത്തിൽ മുംബൈ ഇന്ത്യൻസ് ആധികാരിക ജയം സ്വന്തമാക്കിയിരിക്കുകയാണ്. ആദ്യം ബാറ്റ് ചെയ്ത മുംബൈ ഇന്ത്യൻസ് നിശ്ചിത 20 ഓവറിൽ 180 നേടി. എന്നാൽ മറുപടി ബാറ്റിങ്ങിന് ഇറങ്ങിയ ഡൽഹി ക്യാപിറ്റൽസ് ദയനീയ പരാജയം ഏറ്റുവാങ്ങി. 59 റൺസ് വ്യത്യാസത്തിലാണ് മുംബൈ ഇന്ത്യൻസ് ജയം സ്വന്തമാക്കിയത്. 181 റൺസ് പിന്തുടർന്ന ഡൽഹി 18.2 ഓവറിൽ 121 റൺസ് നേടി ഓൾ ഔട്ട് ആവുകയായിരുന്നു.

ഇതോടെ പ്ലേ ഓഫ് ഉറപ്പിക്കുന്ന നാലാമത്തെ ടീം ആയി മുംബൈ ഇന്ത്യൻസ് മാറി. അതേസമയം ഐപിഎൽ 2025 സീസണിൽ നിന്ന് ഡൽഹി ക്യാപിറ്റൽസ് പുറത്തായി. ഡൽഹിയുടെ മുൻനിര ബാറ്റർമാർ വളരെ പെട്ടന്ന് തന്നെ പവലിയനിലേക്ക് മടങ്ങിയതാണ് മുംബൈയ്ക്ക് കാര്യങ്ങൾ എളുപ്പമാക്കി നൽകിയത്. മുംബൈയുടെ വിക്കറ്റ് കീപ്പർ റയാൻ റിക്കിൽട്ടൺ മിന്നൽ സ്റ്റാമ്പിങ്‌ കൂടി നടത്തിയതോടെ മുംബൈയ്ക്ക് കാര്യങ്ങൾ എളുപ്പമാവുകയായിരുന്നു.

അതേസമയം ഗുജറാത്ത് ടൈറ്റൻസ്, റോയൽ ചലഞ്ചേഴ്‌സ് ബെംഗളൂരു, പഞ്ചാബ് കിങ്‌സ്, മുംബൈ ഇന്ത്യൻസ് എന്നീ ടീമുകളാണ് ഐപിഎൽ 2025 സീസണിൽ പ്ലേ ഓഫ് ഉറപ്പിച്ചിരിക്കുന്നത്. ജൂൺ 3നാണ് ഐപിഎൽ 2025 സീസണിന്റെ ഫൈനൽ മത്സരം.