കപ്പടിച്ചു, പക്ഷേ ആർസിബി ഈ മൂന്ന് താരങ്ങളെ ടീമിൽ നിന്ന് പുറത്താക്കും? അടുത്ത സീസണ് മുൻപ് നിർണായക മാറ്റം ഉറപ്പ്

Curated by: ഗോകുൽ എസ്|Samayam Malayalam•6 Jun 2025, 6:06 pm

2025 സീസൺ ഇന്ത്യൻ പ്രീമിയർ ലീഗിൽ കിരീടം ചൂടിയിരിക്കുകയാണ് വിരാട് കോഹ്ലിയുടെ റോയൽ ചലഞ്ചേഴ്സ് ബംഗളൂരു. കലാശപ്പോരാട്ടത്തിൽ പഞ്ചാബ് കിങ്സിനെ ആറ് റൺസിന് വീഴ്ത്തിയാണ് ബംഗളൂരുവിന്റെ കിരീട നേട്ടം. ഐപിഎല്ലിൽ അവരുടെ ആദ്യ കിരീടം കൂടിയാണിത്. മെഗാ ലേലം മുതൽ നടത്തിയ കൃത്യമായ പ്ലാനിങ്ങുകളുടെ ഫലമാണ് ഇക്കുറി ആർസിബിയുടെ ഷെൽഫിലെത്തിയ ഐപിഎൽ കിരീടം‌. അതേ സമയം കന്നി കിരീടം നേടിയെങ്കിലും അടുത്ത സീസണ് മുൻപ് ആർസിബി ടീമിൽ ചില നിർണായക മാറ്റങ്ങൾ ഉറപ്പാണ്‌. ഇക്കുറി ഫ്ലോപ്പായ ചില താരങ്ങളെ അടുത്ത താരലേലത്തിന് മുൻപ് ആർസിബി ടീമിൽ നിന്ന് ഒഴിവാക്കും. അത്തരത്തിൽ ആർസിബി ടീമിൽ നിന്ന് റിലീസ് ചെയ്യാൻ സാധ്യതയുള്ള മൂന്ന് കളിക്കാരെ നോക്കാം.

അടുത്ത സീസണിലെ താരലേലത്തിന് മു‌ൻപ് റോയൽ ചലഞ്ചേഴ്സ് ബംഗളൂരു ടീമിൽ നിന്ന് പുറത്താക്കപ്പെടാൻ ഏറ്റവും കൂടുതൽ സാധ്യതയുള്ള താരമാണ് ലിയാം ലിവിങ്സ്റ്റൺ. ഇംഗ്ലീഷ് താരമായ ലിവിങ്സ്റ്റണെ കഴിഞ്ഞ മെഗാ ലേലത്തിൽ നിന്നാണ് ആർസിബി സ്വന്തമാക്കിയത്. എന്നാൽ വലിയ പ്രതീക്ഷകളോടെ ടീമിലെത്തിയ ലിവിങ്സ്റ്റൺ ഇക്കുറി വൻ ഫ്ലോപ്പായി. ആർസിബിയുടെ പ്രതീക്ഷകൾക്ക് ഒത്തുയരാൻ അദ്ദേഹത്തിന് കഴിഞ്ഞില്ല. ഈ സീസണിൽ 10 മത്സരങ്ങളിലാണ് ലിവിങ്സ്റ്റൺ ആർസിബിക്കായി ഇറങ്ങിയത്‌. ഈ കളികളിൽ നിന്ന് 112 റൺസും രണ്ട് വിക്കറ്റുകളും മാത്രമാണ് ലിവിങ്സ്റ്റണ് നേടാനായത്.


കഴിഞ്ഞ ഐപിഎൽ മെഗാ ലേലത്തിൽ നിന്ന് ആർസിബി 6.5 കോടി രൂപക്ക് സ്വന്തമാക്കിയ താരമാണ് റാസിഖ് സലം ദർ. എന്നാൽ വലിയ പ്രതീക്ഷകളോടെ എത്തിച്ച താരത്തിന് ആർസിബി ജേഴ്സിയിൽ തിളങ്ങാനായില്ല. രണ്ട് മത്സരങ്ങളിൽ മാത്രം അവസരം ലഭിച്ച ഈ യുവ താരത്തിന് ഒരു വിക്കറ്റാണ് നേടാനായത്. എക്കോണമിയാകട്ടെ 12 ന് അടുത്തും. അടുത്ത ലേലത്തിൽ മികച്ച ഒട്ടേറെ അൺക്യാപ്പ്ഡ് താരങ്ങൾ ലഭ്യമാകും എന്നതിനാൽ ആർസിബി റസിഖിനെ ഒഴിവാക്കാനാണ് സാധ്യത.

Also Read: 18 വര്‍ഷത്തെ ഐപിഎല്‍ ചരിത്രത്തില്‍ ആര്‍സിബിക്ക് കന്നി കിരീടം.

2025 സീസണിൽ ഒരു കോടി രൂപക്ക് റോയൽ ചലഞ്ചേഴ്സ് ബംഗളൂരുവിൽ ചേർന്ന താരമാണ് ദക്ഷിണാഫ്രിക്കൻ പേസ് ബൗളറായ ലുങ്കി എംഗിഡി. രണ്ട് മത്സരങ്ങൾ മാത്രമാണ് ആർസിബിക്കായി ഇക്കുറി താരം കളിച്ചത്. ഇതിൽ ചെന്നൈക്ക് എതിരെ മികച്ച രീതിയിൽ പന്തെറിഞ്ഞ എംഗിഡിക്ക് പക്ഷേ സൺ റൈസേഴ്സ് ഹൈദരാബാദിന് എതിരെ തിളങ്ങനായില്ല. 51 റൺസായിരുന്നു ഈ കളിയിൽ താരം വഴങ്ങിയത്. അടുത്ത താരലേലത്തിൽ നിരവധി വിദേശ പേസ് ബൗളിങ് ഓപ്ഷനുകൾ ലഭ്യമായിരിക്കും എന്നതിനാൽ ഈ സീസണ് ശേഷം എംഗിഡിയെ ആർസിബി റിലീസ് ചെയ്തേക്കും.

Also Read: ഐപിഎല്‍ കിരീട വിജയത്തിനു ശേഷം വികാരാധീനനായി വിരാട് കോഹ്‌ലി

2025 സീസണിൽ ആർസിബിയുടെ സ്ക്വാഡ് ഇങ്ങനെ: രജത് പാട്ടിദാർ ( ക്യാപ്റ്റൻ ), വിരാട് കോഹ്ലി, സ്വസ്തിക് ചികാര, ടിം ഡേവിഡ്, മയങ്ക് അഗർവാൾ, കൃണാൽ പാണ്ഡ്യ, ലിയാം ലിവിങ്സ്റ്റൺ, മനോജ് ഭണ്ഡാഗെ, റൊമാരിയോ ഷെഫേഡ്, സ്വപ്നിൽ സിങ്, മോഹിത് റാതി, ഫിലിപ് സാൾട്ട്, ജിതേഷ് ശർമ, ടിം സീഫർട്ട്, ജോഷ് ഹേസൽവുഡ്, ഭുവനേശ്വർ കുമാർ, റസിഖ് ദർ സലാം, സുയാഷ് ശർമ, യഷ് ദയാൽ, നുവാൻ തുഷാര, അഭിനന്ദൻ സിങ്, ബ്ലെസിങ് മുസരബാനി.