കറാച്ചിയിൽ ഭീകരാക്രമണം; നാല് സൈനികർ കൊല്ലപ്പെട്ടു, ആറ് ഭീകരരെ വധിച്ചു

4 months ago 17

പാകിസ്ഥാനിലെ ഏറ്റവും വലിയ നഗരമായ കറാച്ചിയിൽ സിന്ധ് റേഞ്ചേഴ്‌സ് ആസ്ഥാനത്തെ ലക്ഷ്യമിട്ട് നടന്ന ഭീകരാക്രമണത്തിൽ നാല് സൈനികർ കൊല്ലപ്പെട്ടു. സുരക്ഷാ സേന നടത്തിയ ശക്തമായ തിരിച്ചടിയിൽ ആറ് ഭീകരരെ വധിക്കുകയും ഒരാളെ ജീവനോടെ പിടികൂടുകയും ചെയ്തു.

കറാച്ചിയിലെ ഗുലിസ്ഥാൻ-ഇ-ജൗഹർ മേഖലയിലുള്ള സിന്ധ് റേഞ്ചേഴ്‌സ് താവളത്തിലേക്ക് സ്ഫോടകവസ്തുക്കൾ നിറച്ച വാഹനം ഇടിച്ചുകയറ്റിയാണ് ആക്രമണം നടത്തിയത്. വാഹനം പൊട്ടിത്തെറിച്ചതിന് പിന്നാലെ ഭീകരർ വെടിവയ്പ്പ് ആരംഭിച്ചതോടെ പ്രദേശത്ത് കടുത്ത ഏറ്റുമുട്ടൽ അരങ്ങേറി.

സുരക്ഷാ സേന ഉടൻ തിരിച്ചടിയുമായി രംഗത്തെത്തുകയും പ്രത്യേക പോലീസ് സംഘങ്ങളെയും കമാൻഡോകളെയും വിന്യസിച്ച് സ്ഥിതിഗതികൾ നിയന്ത്രണവിധേയമാക്കുകയും ചെയ്തു. ആക്രമണത്തിന് പിന്നാലെ പ്രദേശം പൂർണമായും സുരക്ഷാ സേനയുടെ നിയന്ത്രണത്തിലായിട്ടുണ്ട്.

തെഹ്‌രീക്-ഇ-താലിബാൻ പാകിസ്ഥാനിൽ നിന്ന് വേർപിരിഞ്ഞ ‘ജമാഅത്ത്-ഉൽ-അഹ്‌റാർ’ എന്ന ഭീകരസംഘടനയാണ് ആക്രമണത്തിന്റെ ഉത്തരവാദിത്തം ഏറ്റെടുത്തത്. പാകിസ്ഥാനിൽ സുരക്ഷാ സേനയ്‌ക്കെതിരായ ആക്രമണങ്ങൾ വർധിക്കുന്നതിനിടെയാണ് പുതിയ സംഭവം.

സംഭവത്തിൽ സമഗ്ര അന്വേഷണം നടത്താൻ സിന്ധ് മുഖ്യമന്ത്രി സയ്യിദ് മുറാദ് അലി ഷാ നിർദേശം നൽകിയിട്ടുണ്ട്. നിലവിൽ സുരക്ഷാ സേന പ്രദേശത്ത് വ്യാപക പരിശോധന തുടരുകയാണ്. സാധാരണക്കാർക്ക് പരിക്കേറ്റതായി റിപ്പോർട്ടുകളില്ല.

Read Entire Article