കല്യാണം കഴിക്കണം എന്ന് പറഞ്ഞു വന്ന പെണ്‍കുട്ടിയെ ഓഫീസില്‍ നിന്ന് ഓടിച്ചു, അത്രയും ദേഷ്യം തോന്നി എന്ന് വിശാല്‍

Authored by: അശ്വിനി പി|Samayam Malayalam•25 Nov 2025, 4:05 pm

സിനിമ, ജീവിതം, വര്‍ക്കൗട്ട്, സോഷ്യല്‍ ആക്ടീവിറ്റീസ് എന്നിങ്ങനെ ഓടിക്കൊണ്ടേയിരിക്കുകയാണ് വിശാല്‍ . നടി ധന്‍ഷികയുമായുള്ള വിവാഹ നിശ്ചയം കഴിഞ്ഞു, വിവാഹവും ഉടന്‍ ഉണ്ടാവും. അതിനിടയില്‍ തന്നോട് ആരാധന മൂത്ത്, കല്യാണം കഴിക്കണം എന്ന് പറഞ്ഞ് എത്തിയ പെണ്‍കുട്ടിയെ കുറിച്ച് വിശാല്‍ സംസാരിക്കുന്നു. വളരെ വിചിത്രമായി ആരാധകരില്‍ നിന്നുണ്ടായ അനുഭവം എന്താണ് എന്ന് ചോദ്യത്തിന് മറുപടി നല്‍കുകയായിരുന്നു നടന്‍.

അത്തരം ഒരുപാട് അനുഭവങ്ങളുണ്ട്. തന്നെ വിവാഹം ചെയ്യണം എന്ന് പറഞ്ഞ് പെണ്‍കുട്ടികള്‍ വന്നിരുന്നു. സ്‌ക്രീനില്‍ കാണുന്ന നടനല്ല ജീവിതത്തില്‍ ഞാന്‍ എന്ന് അവരോട് പറയും. അടുത്തിടെ ഒരു പെണ്‍കുട്ടി അവളുടെ രക്തം കൊണ്ട് എന്റെ ഫോട്ടോ വരച്ച്, ഇഷ്ടമാണ് കല്യാണം കഴിക്കണം എന്ന് പറഞ്ഞ് എന്റെ ഓഫീസിലേക്ക് വന്നിരുന്നു. എനിക്ക് വല്ലാത്ത ദേഷ്യം തോന്നി. അങ്ങനെയൊന്നും ഒരിക്കലും ചെയ്യാന്‍ പാടില്ല. ഇത് ചെയ്യരുത് എന്ന് പറഞ്ഞ് ഞാന്‍ അവരോട് എന്റെ ഓഫീസില്‍ നിന്ന് ഇറങ്ങി പോകാന്‍ പറഞ്ഞു. എനിക്കത്തരം കാര്യം ഇഷ്ടമല്ല.

Also Read: ഐറ്റം ഡാന്‍സ് എത്ര വേണമെങ്കിലും കാണും, പക്ഷേ റിയല്‍ ലൈഫില്‍ അങ്ങനെ ഡ്രസ്സ് ഇട്ടാല്‍ കുറ്റം പറയും; ആന്‍ഡ്രിയ പ്രതികരിക്കുന്നു

ഏറ്റവും അഭിമാനം തോന്നിയ ഒരു ഫാന്‍ മൊമന്റുമുണ്ട്. കൊവിഡ് കാലത്ത് ഡിപ്രഷനിലായിരുന്ന ഒരു ആരാധികയെ ആത്മഹത്യയില്‍ നിന്നും രക്ഷപ്പെടുത്താന്‍ എനിക്ക് സാധിച്ചു. ഇന്ന് അവര്‍ വിവാഹിതയും ഒരു കുട്ടിയുടെ അമ്മയുമാണ്. എന്നെ അണ്ണ എന്നാണ് വിളിക്കാറുള്ളത്. അത് ആരാണെന്നും അവരുടെ പേര് എന്താണെന്നും പറയാന്‍ ഞാന്‍ ആഗ്രഹിക്കുന്നില്ല. ഇപ്പോഴും നിങ്ങളെ രക്ഷപ്പെടുത്തിയത് ഞാനാണ് എന്ന നിലയില്‍ പെരുമാറാറില്ല. അവര്‍ക്കത് അറിയാം. അത് വളരെ അഭിമാനം തോന്നിയ സംഭവങ്ങളിലൊന്നാണ് - വിശാല്‍ പറഞ്ഞു.

എത്ര വര്‍ഷം കഴിഞ്ഞാലും എനിക്കായുള്ള പെണ്‍കുട്ടി എത്തും എന്നത് പോലെയാണ് ഇപ്പോള്‍ ധന്‍ഷിക ജീവിതത്തിലേക്ക് വന്നത്. അണ്‍ കണ്ടീഷണല്‍ ലവ് എന്ന് പറഞ്ഞാല്‍ എനിക്ക് ഇന്ന് ധന്‍ഷികയാണ്. പതിനാറ് വര്‍ഷങ്ങളായി ഞങ്ങള്‍ക്ക് പരസ്പരം അറിയാം. പക്ഷേ വിവാഹം കഴിക്കാം എന്ന തീരുമാനത്തിലേക്ക് ഞങ്ങള്‍ എത്തിയത് ഇപ്പോഴാണ്. ഒരുപക്ഷേ ജീവിതത്തില്‍ സംഭവിച്ച ബ്രേക്കപ്പുകള്‍ എല്ലാം ഇതിനു വേണ്ടിയാവാം. ലൈഫില്‍ ഏറ്റവും അധികം വേദനിച്ച ബ്രേക്കപ്പുകള്‍ ഉണ്ടായിരുന്നു. അതില്‍ നിന്നെല്ലാം ഞാന്‍ മുന്നോട്ടുവന്നു. ധന്‍ഷികയില്‍ എനിക്കേറ്റവും ഇഷ്ടം അവരുടെ സിംപ്ലിസിറ്റിയാണ്- വിശാല്‍ പറഞ്ഞു