കളി ജയിപ്പിച്ചെങ്കിലും തിരിച്ചടി; കിടിലൻ പണി കിട്ടിയത് മൈതാനത്തെ ആ പിഴവിനെ തുടർന്ന്

Authored by: അനുഷ ഗംഗാധരൻ|Samayam Malayalam•2 Jun 2025, 11:39 am

അക്ഷരാർഥത്തിൽ ഒറ്റയാൾ പോരാട്ടം നടത്തുന്ന പഞ്ചാബ് ക്യാപ്റ്റൻ ശ്രേയസ് അയ്യരെ ആണ് കഴിഞ്ഞ ദിവസം കാണാൻ സാധിച്ചത്. ഐപിഎൽ 2025 രണ്ടാം ക്വാളിഫയറിൽ പഞ്ചാബിന്റെ ഓപ്പണർമാർക്ക് കാര്യമായ ചലനങ്ങൾ ഒന്നും തന്നെ റൺ വേട്ടയിൽ നടത്താൻ സാധിച്ചില്ല. വൺ ഡൗൺ ആയി ഇറങ്ങിയ ജോഷ് ഇംഗ്ലിസുമായി ഒരു കൂട്ടുകെട്ടുണ്ടാക്കാൻ ശ്രേയസ് ശ്രമിച്ചെങ്കിലും എട്ടാം ഓവറിൽ ആ കൂട്ടുകെട്ട് അവസാനിച്ചു.
തകർന്നിരുന്ന് ഹർദിക് പാണ്ഡ്യ; ഓടിയെത്തി ആശ്വസിപ്പിച്ച് ജൗസ്പ്രീത് ബുംറ; നിരാശയോടെ മുംബൈ ആരാധകർ
പിന്നീട് എത്തിയ നെഹാൽ വധേരയുമായി ശ്രേയസ് തകർപ്പൻ കൂട്ടുകെട്ട് പടുത്തുയർത്തി. ഇതോടെ പഞ്ചാബിന്റെ റൺ വേട്ടയും തകർപ്പൻ ഫോമിൽ മുന്നോട്ട് കുതിച്ചു. മത്സര അവസാനം വരെ പുറത്താകാതെ നിന്ന ക്യാപ്റ്റൻ തന്നെയാണ് പഞ്ചാബിന്റെ വിജയ ശില്പിയും. തകർപ്പൻ സിക്സർ പറത്തിയാണ് താരം മത്സരം അവസാനിപ്പിച്ചത്.

എന്നാൽ മാച്ച് വിന്നിങ് പ്രകടനം കാഴ്ചവെച്ചെങ്കിലും ശ്രേയസിനെ കാത്തിരുന്നത് മറ്റൊന്നാണ്. തകർപ്പൻ പ്രകടനത്തിലൂടെ പഞ്ചാബിനെ ഫൈനലിൽ എത്തിച്ച ശ്രേയസ് അയ്യർക്കെതിരെ പിഴ ചുമത്തിയിരിക്കുകയാണ് ബിസിസിഐ. 24 ലക്ഷം രൂപയുടെ പിഴയാണ് ബിസിസിഐ പഞ്ചാബ് നായകന് മേൽ ചുമത്തിയത്. സ്ലോ ഓവർ റേറ്റിനെ തുടർന്നാണ് പഞ്ചാബ് നായകൻ പിഴ നൽകേണ്ടി വന്നത്. ക്യാപ്റ്റൻ മാത്രമല്ല രണ്ടാം ക്വാളിഫയർ മത്സരത്തിൽ ഇറങ്ങിയ പഞ്ചാബിന്റെ പ്ലേയിങ് ഇലവനിൽ താരങ്ങളും പിഴ നൽകേണ്ടതുണ്ട്. പ്ലെയിങ് ഇലവനിൽ താരങ്ങൾ ആറ് ലക്ഷം രൂപയോ അല്ലെങ്കിൽ അവരുടെ മാച്ച് ഫീസിന്റെ 25 ശതമാനമോ നൽകേണ്ടതുണ്ട്. ഇതിൽ ഏതാണോ ചെറിയ തുക, ആ തുക നൽകാനാണ് നിർദ്ദേശം.

പഞ്ചാബിന്റെ നായകന് മാത്രമല്ല, മുംബൈ ഇന്ത്യൻസ് നായകന് ഹർദിക് പാണ്ഡ്യയ്ക്കും പിഴ അടക്കേണ്ടതുണ്ട്. ശ്രേയസിനെക്കാളും അധികം തുകയാണ് ഹർദിക് പാണ്ഡ്യയ്ക്ക് അടക്കേണ്ടത്. 30 ലക്ഷം രൂപയാണ് ബിസിസിഐ ഫൈൻ ചുമഴ്ത്തിയിരിക്കുന്നത്. ഇവിടെയും ക്യാപ്റ്റൻ മാത്രമല്ല. മുംബൈ ഇന്ത്യൻസിന്റെ മറ്റ് കളിക്കാർക്ക് 12 ലക്ഷം രൂപയോ അല്ലെങ്കിൽ അവരുടെ മാച്ച് ഫീസിന്റെ 50 ശതമാനമോ പിഴ ചുമത്തിയിരിക്കുകയാണ്.

അതേസമയം കഴിഞ്ഞ മത്സരത്തിൽ നിന്ന് പിഴ ലഭിക്കുക മാത്രമല്ല മറിച്ച് റെക്കോഡുകൾ സ്വന്തമാക്കനും ശ്രേയസ് അയ്യറിന് സാധിച്ചിട്ടുണ്ട്. ക്യാപ്റ്റൻ എന്ന സ്ഥാനത്ത് ഇരുന്നുകൊണ്ട് മൂന്ന് വ്യത്യസ്ത ടീമുകളെ ഫൈനലിൽ എത്തിച്ചു എന്ന റെക്കോഡ് ആണ് കഴിഞ്ഞ മത്സരത്തിന് ശേഷം ശ്രേയസിനെ തേടിയെത്തിയത്.

രണ്ടാം ക്വാളിഫയറിൽ മുംബൈ ഇന്ത്യൻസിനെ പരാജയപ്പെടുത്തി ഫൈനലിൽ പ്രവേശിച്ച പഞ്ചാബ് കിങ്‌സ് ഐപിഎൽ 2025 ഫൈനൽ മത്സരത്തിൽ റോയൽ ചലഞ്ചേഴ്‌സ് ബംഗളുരുവിനെ നേരിടും. ജൂൺ മൂന്നിന് നരേന്ദ്ര മോദി സ്റ്റേഡിയത്തിൽ വെച്ചാണ് ഫൈനൽ മത്സരം.