കിടിലൻ റെക്കോഡ് സ്വന്തമാക്കി കൃണാൽ പാണ്ഡ്യ, ഇത് ലോകത്ത് ആർക്കുമില്ലാത്ത നേട്ടം; വീണ്ടും ഫൈനലിലെ താരം

Curated by: ഗോകുൽ എസ്|Samayam Malayalam•4 Jun 2025, 2:21 am

ഇന്ത്യൻ പ്രീമിയർ ലീഗിൽ ആദ്യമായി കിരീടം ചൂടിയിരിക്കുകയാണ് ആരാധകരുടെ പ്രിയ‌ ടീമായ റോയൽ ചലഞ്ചേഴ്സ് ബംഗളൂരു. ചൊവ്വാഴ്ച നടന്ന ഫൈനലിൽ പഞ്ചാബ് കിങ്സിനെ ആറ് റൺസിന് വീഴ്ത്തിയാണ് ആർസിബി കന്നി കിരീടത്തിൽ മുത്തമിട്ടത്. അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ആർസിബി, 20 ഓവറിൽ 190/9 എന്ന സ്കോർ നേടിയപ്പോൾ, പഞ്ചാബിന്റെ മറുപടി 184/7 ൽ അവസാനിച്ചു.ഓൾറൗണ്ടർ കൃണാൽ പാണ്ഡ്യയുടെ കിടിലൻ ബൗളിങ് പ്രകടനം ആർസിബിയുടെ ഫൈനൽ വിജയത്തിൽ നിർണായക പങ്ക് വഹിച്ചു. നാല് ഓവറുകളിൽ വെറും 17 റൺസ് മാത്രം വിട്ടുകൊടുത്ത് രണ്ട് വിക്കറ്റുകളാണ് കൃണാൽ വീഴ്ത്തിയത്. ഓപ്പണിങ് ബാറ്റർ പ്രഭ്സിമ്രാൻ സിങ്ങും മികച്ച ഫോമിൽ കളിച്ചുകൊണ്ടിരുന്ന ഓസ്ട്രേലിയൻ താരം ജോഷ് ഇംഗ്ലിസുമാണ് കൃണാൽ പാണ്ഡ്യക്ക് മുന്നിൽ വീണത്.

ഈ കിടിലൻ പ്രകടനം ഫൈനലിലെ മാൻ ഓഫ് ദി മാച്ച് പട്ടവും കൃണാലിന് നേടിക്കൊടുത്തു. ഇതോടെ ഐപിഎല്ലിലെ ഒരു കിടിലൻ റെക്കോഡും കൃണാൽ പാണ്ഡ്യ സ്വന്തമാക്കി. രണ്ട് ഐപിഎൽ ഫൈനലുകളിൽ മാൻ ഓഫ് ദി മാച്ച് പുരസ്കാരം നേടുന്ന ആദ്യ താരമെന്ന റെക്കോഡാണ് കൃണാലിനെ തേടി എത്തിയത്.


ഇതിന് മുൻപ് 2017 സീസൺ ഐപിഎല്ലിലെ ഫൈനലിലായിരുന്നു കൃണാൽ പാണ്ഡ്യ മാൻ ഓഫ് ദി മാച്ച് പുരസ്കാരം നേടിയത്. അന്ന് മുംബൈ ഇന്ത്യൻസിന്റെ താരമായിരുന്നു അദ്ദേഹം. ഫൈനലിൽ റൈസിങ് പൂന സൂപ്പർ ജയന്റ്സായിരുന്നു മുംബൈ ഇന്ത്യൻസിന്റെ എതിരാളികൾ. അന്നത്തെ ഫൈനലിൽ 79/7 എന്ന നിലയിൽ തകർന്ന മുംബൈ ഇന്ത്യൻസിനെ 129 എന്ന പൊരുതാവുന്ന സ്കോറിൽ എത്തിച്ചത് കൃണാൽ പാണ്ഡ്യയായിരുന്നു. 38 പന്തിൽ 47 റൺസായിരുന്നു 2017 ലെ ഫൈനലിൽ കൃണാൽ പാണ്ഡ്യ നേടിയത്. പിന്നാലെ നാലോവർ സ്പെല്ലിൽ 31 റൺസ് മാത്രമാണ് കൃണാൽ വിട്ടു കൊടുത്തതും.

Also Read: ഐപിഎൽ ഫൈനലിൽ വഴിത്തിരിവായത് ഇക്കാര്യം, പഞ്ചാബിനെ തോൽപ്പിച്ചത് ആ താരം; ആർസിബി നന്ദി പറയേണ്ടത് കൃണാലിന്

2025 സീസൺ ഐപിഎല്ലിൽ ഇത് മൂന്നാമത്തെ കളിയിലാണ് കൃണാൽ പാ‌ണ്ഡ്യ കളിയിലെ കേമൻ പട്ടം സ്വന്തമാക്കുന്നത് എന്നതും ശ്രദ്ധേയം. ലീഗ് ഘട്ടത്തിലെ ആദ്യ കളിയിൽ റോയൽ ചലഞ്ചേഴ്സ് ബംഗളൂരുവിന് എതിരെയും, പിന്നീട് ഡെൽഹി ക്യാപിറ്റൽസിന് എതിരെയുമായിരുന്നു കൃണാൽ മാൻ ഓഫ് ദി മാച്ചായത്.

Also Read: ഐപിഎല്ലിൽ ആർസിബിക്ക് ചരിത്ര കിരീടം, ഫൈനലിൽ പഞ്ചാബ് കിങ്സിനെ തകർത്തു; ആരാധകർക്ക് ആഘോഷ രാവ്

കൃണാൽ പാണ്ഡ്യയുടെ നാലാം ഐപിഎൽ കിരീട നേട്ടം കൂടിയാണ് ഈ വർഷത്തേത്. ഇതിന് മുൻപ് മുംബൈ ഇന്ത്യൻസിന് ഒപ്പമായിരുന്നു താരം മൂന്ന് തവണ കിരീടം നേടിയത്. 2017, 2019, 2020 സീസണുകളിലായിരുന്നു ഇത്.