കൂടെയുണ്ട് എന്ന ഒരു വാക്കിന്റെ ശക്തി! ഇരുട്ടിലേക്ക് വഴുതി വീണവരെ തിരിച്ചുകൊണ്ടുവരാം; ലൂഏർ പറയാൻ ശ്രമിക്കുന്നത്

Authored by: അശ്വിനി പി|Samayam Malayalam•30 Jun 2025, 4:11 pm

പുതിയ കാലത്തിന്റെ യുവത്വം പാതിയും ലഹരിയ്ക്ക് അടിമപ്പെട്ടിരിയ്ക്കുന്നു എന്ന് കണക്കുകൾ പോലും നോക്കാതെ പറയാൻ സാധിക്കുന്ന ഒരു കാലത്താണ് നമ്മൾ ജീവിയ്ക്കുന്നത്. അത്രയധികം കേസുകളും ദിനപ്രതി റിപ്പോർട്ട് ചെയ്യുന്നു. ആൺ - പെൺ വേർതിരിവുകളില്ലാതെ ലഹരിക്കടിമപ്പെട്ടുപോകുന്നവർ പലപ്പോഴും ഒരു നിമിഷത്തെ കൗതുകത്തിന്റെ പേരിലോ, അറിവില്ലായ്മ കൊണ്ടോ ചെന്നു പെടുന്നതാവാം. പക്ഷേ കുറ്റപ്പെടുത്തി, ഒറ്റപ്പെടുത്തി അവരെ വീണ്ടും വീണ്ടും ഇരുട്ടിലേക്ക് തള്ളിവിടുന്നതിന് പകരം ഒരു വാക്കു കൊണ്ട് തിരിച്ചു വിളിക്കാനും സാധിക്കും. അതിനെ കുറിച്ചാണ് വിഷുണു ഉദയന്റെ LUEUR (ലൂഏർ) എന്ന ഹ്രസ്വ ചിത്രം സംസാരിക്കുന്നത്.

Also Read: സൈനിക സേവനം പൂർത്തിയാക്കി വന്നാൽ ഉടൻ സോങ് കാങ് ചെയ്യാൻ പോകുന്ന പ്രൊജക്ട്? ഫോർ ഹാന്റ്സിനെ കുറിച്ച് നിങ്ങൾക്ക് അറിയേണ്ടതെല്ലാം!

2018ലെ SIIMA അവാർഡ് കരസ്ഥമാക്കിയ WAFT എന്ന ഹ്രസ്വചിത്രത്തിനുശേഷം വിഷ്ണു ഉദയൻ സംവിധാനം ചെയ്ത ചിത്രമാണ് LUEUR (ലുഏർ). ലഹരിയുടെ ഇരുട്ടിലേക്ക് വഴുതിവീണ സഹോദരനെ ഒറ്റപ്പെടുത്തിയോ എന്ന കുറ്റബോധത്തിൽ നീറുന്ന സഹോദരിയുടെ ചിന്തകളാണ് 2 മിനിട്ട് 8 സെക്കന്റ് ദൈർഘ്യമുള്ള ഹ്രസ്വ ചിത്രത്തിൽ പറയുന്നത്.

Also Read: എല്ലാവരുടെയും മുന്നിൽ വച്ചുള്ള ആ ചുംബനം, ആരാണ് ആ പെൺകുട്ടി? ടെയ്ലർ റസ്സലുമായി വേർപിരിഞ്ഞതിന് ശേഷം ഹാരി സ്റ്റൈൽസിന് പുതിയ ബന്ധം!

പറ്റിപ്പോയ തെറ്റിനെ കുറിച്ച് സഹോദരിയോട് ഏറ്റു പറയുമ്പോൾ വരെയും ബ്ലാക്ക് ആന്റ് വൈറ്റിലാണ് ഫ്രെയിം, കൂടെയുണ്ട് ഞാൻ എന്ന സഹോദരിയുടെ വാക്കുകൾ മുഖത്ത് പ്രതിഫലിക്കുമ്പോൾ വരുന്ന വെളിച്ചം പ്രതീക്ഷയാണ്. വളരെ സിംപോളിക് ആയിട്ടാണ് ലഹരിക്കെതിരെയുള്ള മനോഹരമായ ഹ്രസ്വ ചിത്രം ഒരുക്കിയിരിക്കുന്നത്. കേൾക്കാനും, ചേർത്തു നിർത്താനും കൂടെ ഒരാളെങ്കിലും ഉണ്ടെങ്കിൽ തിരിച്ചുവരാനുള്ള ശക്തി എങ്ങനെയും വരും എന്ന് സിനിമ പറഞ്ഞുവയ്ക്കുന്നു.

വിപിൻ വിജയൻ ഒരുക്കിയ തിരക്കഥയ്ക്ക്, സി ആർ നാരായണനാണ് ക്യാമറ ചലിപ്പിച്ചിരിക്കുന്നത്. ചിത്രസംയോജനം നോയൽ നിർവഹിച്ചപ്പോൾ സംഗീതം പകർന്നത് രാകേഷ് ആണ്. വിഷ്ണു നാറാത്ത്, ശ്രുതി ഭദ്ര എന്നിവരാണ് ചിത്രത്തിൽ അഭിനേതാക്കളായി എത്തിയിരിക്കുന്നത്. ഗ്രീൻ പാരറ്റ് ടാക്കീസിന്റെ യൂട്യൂബ് ചാനലിലൂടെ പുറത്തുവന്ന ഹ്രസ്വ ചിത്രത്തിന് ഇതിനോടകം മികച്ച പ്രതികരണങ്ങളാണ് ലഭിയ്ക്കുന്നത്.