കെട്ടിടം പണി കഴിഞ്ഞിട്ടേ കെട്ടൂ എന്ന് വിശാൽ, 9 വർഷം പോയി; സായി ധൻഷികയുമായുള്ള വിവാഹം ഇനിയും വൈകുമോ?

Authored by: അശ്വിനി പി|Samayam Malayalam•16 Jul 2025, 3:46 pm

തമിഴ് സിനിമാ ലോകത്ത് ഏറ്റവും അധികം ആവർത്തിച്ച് ചോദിച്ച ചോദ്യങ്ങളിലൊന്നായിരുന്നു വിശാൽ എപ്പോൾ കല്യാണം കഴിക്കും എന്ന്. അവസാനം എല്ലാ ചോദ്യങ്ങൾക്കും ഒടുവിൽ ഇക്കഴിഞ്ഞ മെയ് മാസത്തിൽ അതിനുള്ള ഉത്തരം വിശാൽ നൽകിയിരുന്നു. നടി സായി ധൻഷികയുമായുള്ള വിവാഹം തീരുമാനിച്ചു എന്ന സന്തോഷ വാർത്ത നിമിഷ നേരം കൊണ്ടാണ് സോഷ്യൽ മീഡിയയിൽ വൈറലായത്. പെണ്ണ് റെഡി, ഇനി കെട്ട് എന്ന് എന്നായി അടുത്ത ചോദ്യം.

ഇത്ര വർഷമായി വിശാൽ കല്യാണം എപ്പോൾ എന്ന ചോദ്യത്തിന് നൽകുന്ന മറുപടി, താരസംഘടനയായ നടികർ സംഘത്തിന്റെ കെട്ടിടം പണി പൂർത്തിയായാൽ തനിക്ക് വിവാഹം ഉണ്ടാവും എന്നാണ്. കഴിഞ്ഞ ഒൻപത് വർഷത്തോളമായി നടികർ സംഘം കെട്ടിടത്തിന്റെ പണി നടന്നുകൊണ്ടിരിയ്ക്കുകയാണ്. അതിനിടയിൽ വിശാലിന്റെ ജീവിതത്തിൽ രണ്ട് സ്ത്രീകൾ വന്നുപോയി. നടി വരലക്ഷ്മിയുമായുള്ള പ്രണയം വിവാഹം വരെ എത്തി ബ്രേക്കപ് ആയതാണ്. അനിഷ അല്ല റെഡ്ഡി എന്ന പെൺകുട്ടിയുമായി വിശാലിന്റെ വിവാഹ നിശ്ചയം കഴിഞ്ഞിരുന്നു. എന്നാൽ അതും വിവാഹത്തിലേക്ക് എത്തിയില്ല.

Also Read: നിശ്ചയം കിഞ്ഞിട്ട് ഏഴ് മാസം, അവസാനം ആ കാര്യത്തിൽ തീരുമാനമായി; സെലീന ഗോമസിന്റെയും ബെന്നി ബ്ലാങ്കോയുടെയും കല്യാണം എപ്പോൾ, എങ്ങനെ?

ഒരുപാട് ഗോസിപ്പുകൾക്കും സസ്പെൻസുകൾക്കും ഒടുവിലാണ് സായി ധൻഷികയുമായുള്ള പ്രണയ ബന്ധം പരസ്യപ്പെടുത്തിയത്. ജൂലൈയിൽ നടികർ സംഘം കെട്ടിടത്തിന്റെ പണി പൂർത്തിയാകുമെന്നും ആഗസ്റ്റിലോ സെപ്റ്റംബർ ആദ്യമോ കല്യാണം ഉണ്ടാവും എന്നാണ് നേരത്തെ അറിയിച്ചിരുന്നത്. എന്നാൽ ജൂലൈ പാതി ദൂരം പിന്നിട്ടിട്ടും നടികർ സംഘം കെട്ടിടത്തിന്റെ പണി പൂർത്തിയായിട്ടില്ല. ജൂലൈയിൽ കെട്ടിടത്തിന്റെ ഉദ്ഘാടനം നടക്കും എന്ന് പറഞ്ഞതും വെറുതെയായി. ഇതിനിടയിലാണ് വിശാലിന്റെ കല്യാണം എപ്പോഴുണ്ടാവും എന്ന ചോദ്യം വീണ്ടും സജീവമായത്.


അടുത്തിടെ നൽകിയ ഒരു പൊതുപരിപാടിയിൽ അതിനുള്ള ഉത്തരം വിശാൽ നൽകുകയുണ്ടായി. ആഗസ്റ്റ് 29 ന് വിശാലിന്റെ ജന്മദിനമാണ്. അന്ന് ഒരു ഗുഡ് ന്യൂസ് അറിയിക്കും എന്നാണ് ഇപ്പോൾ നടൻ പറഞ്ഞിരിയ്ക്കുന്നത്. അത് കല്യാണത്തിന്റെ ഡേറ്റ് ആണോ, അതോ നടികർ സംഘം കെട്ടിട ഉദ്ഘാടനത്തിന്റെ ഡേറ്റ് ആണോ എന്നാണ് ഇപ്പോൾ ആരാധകരുടെ ചോദ്യം. അത് ആ സസ്പെൻസിൽ നിർത്തി വിശാൽ അവസാനിപ്പിച്ചു.