കേരളത്തിന്റെ അഭിമാനം, ഇന്ത്യന്‍ ക്രിക്കറ്റില്‍ താരോദയം; ഐപിഎല്ലില്‍ മൂന്ന് വിക്കറ്റ് വീഴ്ത്തി വിഗ്നേഷിന്റെ അരങ്ങേറ്റം

Authored byനിഷാദ് അമീന്‍ | Samayam Malayalam | Updated: 24 Mar 2025, 12:50 am

Samayam Malayalamവിഘ്‌നേഷ് പുത്തൂരിനെ അഭിനന്ദിക്കുന്ന സൂര്യകുമാര്‍ യാദവും എംഎസ് ധോണിയും

ഇന്ത്യന്‍ പ്രീമിയര്‍ ലീഗില്‍ ശ്രദ്ധേയ പ്രകടനവുമായി മലയാളി താരം വിഗ്‌നേഷ് പുത്തൂര്‍ (Vignesh Puthur). സീനിയര്‍ തലത്തില്‍ ഇതുവരെ കേരളത്തെ പ്രതിനിധീകരിച്ചിട്ടില്ലാത്ത 23കാരന്‍ ഐപിഎഎല്‍ (IPL 2025) അരങ്ങേറ്റത്തില്‍ മൂന്ന് വിക്കറ്റുകള്‍ വീഴ്ത്തി. സഞ്ജു സാംസണിന് (Sanju Samson) ശേഷം ഇന്ത്യന്‍ ക്രിക്കറ്റില്‍ കേരളത്തിന്റെ പുത്തന്‍ താരമായി ഉയരുകയാണ് ഇടംകൈയ്യന്‍ റിസ്റ്റ് സ്പിന്നര്‍.ചെന്നൈ സൂപ്പര്‍ കിങ്‌സിനെതിരായ മല്‍സരത്തില്‍ മുംബൈ ഇന്ത്യന്‍സിന് വേണ്ടിയാണ് (IPL 2025 CSK vs MI) വിഗ്‌നേഷ് കളത്തിലിറങ്ങിയത്. അരങ്ങേറ്റ മല്‍സരത്തില്‍ ആദ്യ ഓവറില്‍ തന്നെ വിക്കറ്റ് നേടി ഐപിഎല്‍ ചരിത്രത്തിന്റെ ഭാഗമാവുകയും ചെയ്തു. രോഹിത് ശര്‍മക്ക് പകരം ഇംപാക്റ്റ് പ്ലെയറായാണ് വിഗ്‌നേഷിനെ മുംബൈ ഉപയോഗപ്പെടുത്തിയത്.


വിജയിച്ച് കയറിയെങ്കിലും വിഗ്‌നേഷിന്റെ വരവ് സിഎസ്‌കെയെ ശരിക്കും വിറപ്പിച്ചു. മികച്ച ഫോമിലായിരുന്ന സിഎസ്‌കെ നായകന്‍ റുതുരാജ് ഗെയ്ക് വാദിനെ വീഴ്ത്തിയാണ് തുടക്കം. പിന്നാലെ അപകടകാരിയായ ശിവം ദുബെയെയും ദീപക് ഹൂഡയെയും വീഴ്ത്തി വിഘ്‌നേഷ് മലയാളികളുടെ അഭിമാനമായി മാറി.

https://www.instagram.com/reel/DHjKIhisRRV/https://www.instagram.com/reel/DHjKIhisRRV/
ഇന്നിങ്‌സിലെ എട്ടാം ഓവറിലാണ് റുതുരാജിനെ വിഗ്‌നേഷ് വീഴ്ത്തുന്നത്. തന്റെ കന്നി ഓവറിലെ അഞ്ചാം പന്തില്‍. 26 പന്തില്‍ 53 റണ്‍സെടുത്ത് കിടിലന്‍ ഫോമിലായിരുന്ന റുതുവിനെ വില്‍ ജാക്‌സ് ക്യാച്ച് ചെയ്തു. തന്റെ രണ്ടാമത്തെ ഓവറില്‍ ശിവം ദുബെയെയും പുറത്താക്കി. ലോങ് ഓണില്‍ തിലക് വര്‍മയ്ക്ക് ക്യാച്ച്.

ഐപിഎല്‍ 2025 ഉദ്ഘടനം ചെയ്ത് ഷാരൂഖ് ഖാന്‍; മനംകവര്‍ന്ന് ശ്രേയ ഘോഷാലും ദിഷ പട്ടാനിയും
പിന്നാലെ നിലയുറപ്പിക്കും മുമ്പെ ദീപക് ഹൂഡയെയും പുറത്താക്കിയതോടെ എല്ലാ ശ്രദ്ധയും യുവ താരത്തിലായി. നാല് ഓവറില്‍ 32 റണ്‍സ് വിട്ടുകൊടുത്താണ് മൂന്ന് വിക്കറ്റ് നേടിയത്. സിഎസ്‌കെ അനായാസം വിജയത്തിലേക്ക് നീങ്ങുകയായിരുന്ന മല്‍സരത്തില്‍ വിഗ്നേഷ് ഉദ്വേഗ നിമിഷങ്ങള്‍ സൃഷ്ടിച്ചു. 155 റണ്‍സ് എന്ന ചെറിയ വിജയലക്ഷ്യം ആറ് വിക്കറ്റ് നഷ്ടത്തില്‍ സിഎസ്‌കെ പൂര്‍ത്തീകരിക്കുകയും ചെയ്തു.

https://www.instagram.com/reel/DHjQvxBsrBj/https://www.instagram.com/reel/DHjQvxBsrBj/
ഐപിഎല്‍ 2025 ലേലത്തില്‍ 30 ലക്ഷം രൂപ പ്രതിഫലം നിശ്ചയിച്ചാണ് അഞ്ച് തവണ ചാമ്പ്യന്‍മാരായ മുംബൈ ഇന്ത്യന്‍സ് വിഘ്‌നേഷുമായി കരാര്‍ ഉണ്ടാക്കിയത്. മലപ്പുറം സ്വദേശിയായ ഇദ്ദേഹം അണ്ടര്‍ 14, അണ്ടര്‍ 19 കേരള ടീമുകളില്‍ കളിച്ചിട്ടുണ്ട്. പിതാവ് ഓട്ടോറിക്ഷ ഡ്രൈവറാണ്.

വനിതാ ക്രിക്കറ്റ് ലോകകപ്പ് 2025 ആതിഥേയ വേദിയായി തിരുവനന്തപുരവും; ഉദ്ഘാടനം വിശാഖപട്ടണത്ത്
ക്രിക്കറ്റ് കരിയറിനായി തൃശൂരിലേക്ക് താമസം മാറിയ വിഘ്‌നേഷ് സെന്റ് തോമസ് കോളേജിനായി കളിച്ചു. കേരള കോളേജ് പ്രീമിയര്‍ ടി20 ലീഗിലെ മുന്‍നിര ബൗളര്‍മാരില്‍ ഒരാളായിരുന്നു. ജോളി റോവേഴ്സ് ക്രിക്കറ്റ് ക്ലബ്ബിനു വേണ്ടി തിളങ്ങിയതോടെ കേരള ക്രിക്കറ്റ് ലീഗിലെത്തി. ആലപ്പി റിപ്പിള്‍സിനായി മൂന്ന് മത്സരങ്ങളില്‍ നിന്ന് രണ്ട് വിക്കറ്റുകള്‍ നേടി. മുമ്പ് തമിഴ്‌നാട് പ്രീമിയര്‍ ലീഗിലും കളിച്ചിരുന്നു.

മീഡിയം പേസും സ്പിന്നും എറിഞ്ഞിരുന്ന വിഘ്നേഷിനെ പ്രാദേശിക ക്രിക്കറ്റ് താരം മുഹമ്മദ് ഷെരീഫ് ആണ് ലെഗ് സ്പിന്നിലേക്ക് വഴി തിരിച്ചുവിടുന്നത്.