കോടികൾ വാരുന്ന ഫഹദ് ഫാസിൽ മാജിക്! അഭിനയിക്കുന്ന സിനിമകൾ ഹിറ്റാണ്, പക്ഷേ പ്രൊഡ്യൂസ് ചെയ്യുന്ന സിനിമകൾ ബ്ലോക്ബസ്റ്റർ ഹിറ്റ്!

മലയാള സിനിമയിൽ ഫഹദ് ഫാസിലിന്റെ വളർച്ച ഒരു നടന്റെ വിജയകഥയിൽ മാത്രം ഒതുങ്ങുന്നതല്ല. വ്യത്യസ്തമായ കഥാപാത്രങ്ങളിലൂടെ അഭിനയരംഗത്ത് സ്വന്തമായൊരു ഇടം സൃഷ്ടിച്ച ഫഹദ്, നിർമ്മാണരംഗത്തേക്കും ചുവടുവെച്ചതോടെ സിനിമയോടുള്ള തന്റെ ഇടപെടൽ മറ്റൊരു തലത്തിലേക്ക് എത്തിച്ചിരിക്കുകയാണ്. അതിന്റെ ശ്രദ്ധേയമായ ഉദാഹരണമാണ് അദ്ദേഹത്തിന്റെ നിർമ്മാണ ബാനറായ ഭാവന സ്റ്റുഡിയോസ് .

കഴിഞ്ഞ ഏതാനും വർഷങ്ങളിലെ ഭാവന സ്റ്റുഡിയോസിന്റെ യാത്ര പരിശോധിക്കുമ്പോൾ, വ്യത്യസ്തമായ കഥകളും ജോണറുകളും പരീക്ഷിക്കാനുള്ള സമീപനം ശ്രദ്ധേയമാണ്. പ്രേമലു, ആവേശം, ബെത്‌ലഹേം കുടുംബ യൂണിറ്റ് എന്നീ മൂന്ന് ചിത്രങ്ങളുടെ ബോക്സ് ഓഫീസ് പ്രകടനം മാത്രം പരിശോധിച്ചാൽ പോലും, റിപ്പോർട്ട് ചെയ്യപ്പെട്ട കളക്ഷൻ കണക്കുകൾ ചേർത്ത് 550 കോടിക്ക് മുകളിലാണ്. പ്രേമലു ഏകദേശം 130 കോടിയും ആവേശം 155 കോടിക്ക് മുകളിലും നേടിയപ്പോൾ, ബെത്‌ലഹേം കുടുംബ യൂണിറ്റ് ഏകദേശം 310 കോടി നേടിയതായാണ് റിപ്പോർട്ടുകൾ. കളക്ഷൻ കണക്കുകളിൽ റിപ്പോർട്ടുകൾക്കനുസരിച്ച് ചെറിയ വ്യത്യാസങ്ങൾ ഉണ്ടായേക്കാമെങ്കിലും, തുടർച്ചയായി വലിയ പ്രേക്ഷകശ്രദ്ധയും വാണിജ്യവിജയവും നേടിയ ചിത്രങ്ങൾ ഒരുക്കാൻ ഭാവന സ്റ്റുഡിയോസിന് സാധിച്ചുവെന്നതാണ് ശ്രദ്ധേയം.

ഈ വിജയം നിങ്ങൾ അർഹിക്കുന്നു! തൻറെ ഒന്നാം സ്ഥാനം തട്ടിയെടുത്ത നിവിനോട് കല്യാണി പറഞ്ഞത്; കുടുംബ പ്രേക്ഷകർ അവരുടെ കരുത്ത് തെളിയിച്ചതിലാണ് സന്തോഷം
ഈ വിജയപരമ്പരയുടെ പ്രത്യേകത കളക്ഷനിൽ മാത്രമല്ല, സിനിമകളുടെ വൈവിധ്യത്തിലുമാണ്. പ്രണയവും നർമ്മവും നിറഞ്ഞ യുവത്വത്തിന്റെ കഥയായ പ്രേമലു വലിയ സ്വീകാര്യത നേടിയപ്പോൾ, ആക്ഷനും നർമ്മവും മാസ് ഘടകങ്ങളും ചേർന്ന ആവേശം തികച്ചും വ്യത്യസ്തമായൊരു അനുഭവമാണ് സമ്മാനിച്ചത്. അതിൽ നിന്നും വേറിട്ട കഥയും ട്രീറ്റ്മെന്റുമായാണ് ബെത്‌ലഹേം കുടുംബ യൂണിറ്റ് എത്തിയത്. ഒരേ ഫോർമുല ആവർത്തിക്കുന്നതിനുപകരം വ്യത്യസ്ത ആശയങ്ങളെയും സിനിമാ അനുഭവങ്ങളെയും പിന്തുണയ്ക്കാനുള്ള ശ്രമമാണ് ഇതിലൂടെ പ്രകടമാകുന്നത്.

ഭാവന സ്റ്റുഡിയോസിന്റെ വളർച്ചയിൽ ഫഹദ് ഫാസിലിനൊപ്പം ശ്യാം പുഷ്കരനും ദിലീഷ് പോത്തനും ഉൾപ്പെടുന്ന സൃഷ്ടിപരമായ കൂട്ടായ്മയ്ക്കും ഏറെ പ്രാധാന്യമുണ്ട്. മലയാള സിനിമയിൽ നേരത്തെ തന്നെ ശ്രദ്ധ നേടിയ ഈ കൂട്ടുകെട്ട്, കഥയ്ക്കും കഥാപാത്രങ്ങൾക്കും സംവിധായകന്റെ കാഴ്ചപ്പാടിനും പ്രാധാന്യം നൽകുന്ന സിനിമകൾക്ക് പിന്തുണ നൽകുന്നതിൽ നിർണായക പങ്കുവഹിക്കുന്നു. സംവിധായകർക്ക് അവരുടെതായ ഇടം നൽകുന്നതിലും മൂവരും പ്രത്യേകം ശ്രദ്ധ ചെലുത്തുന്നു. സംവിധായകന്റെയോ മറ്റ് അണിയറപ്രവർത്തകരുടെയോ ആവിഷ്‌കാരസ്വാതന്ത്ര്യത്തിൽ അനാവശ്യമായി ഇടപെടാറില്ലെന്നതും എടുത്തുപറയേണ്ടതാണ്. ഫഹദിന്റെ താരമൂല്യവും ശ്യാം പുഷ്കരന്റെ എഴുത്തും ദിലീഷ് പോത്തന്റെ സിനിമാ പരിചയവും ഒരുമിക്കുമ്പോൾ, പുതിയ തലമുറയിലെ സിനിമകൾക്ക് ഇടം ലഭിക്കുന്ന ഒരു ക്രിയേറ്റീവ് സ്പേസായി ഭാവന സ്റ്റുഡിയോസ് മാറുന്നു.

ഫഹദ് ഫാസിലിന്റെ അഭിനയജീവിതവും മാറ്റങ്ങളുടെയും പരീക്ഷണങ്ങളുടെയും വഴിയിലൂടെയാണ് മുന്നേറിയത്. ചാപ്പാ കുരിശ്, 22 ഫീമെയിൽ കോട്ടയം, അന്നയും റസൂലും, നോർത്ത് 24 കാതം, മഹേഷിന്റെ പ്രതികാരം, തൊണ്ടിമുതലും ദൃക്സാക്ഷിയും, കുമ്പളങ്ങി നൈറ്റ്സ്, ട്രാൻസ് തുടങ്ങിയ ചിത്രങ്ങളിലൂടെ വ്യത്യസ്ത കഥാപാത്രങ്ങളെ അവതരിപ്പിച്ച അദ്ദേഹം മലയാള സിനിമയിലെ ശ്രദ്ധേയനായ നടനായി മാറി. പിന്നീട് മലയാളത്തിന് പുറത്തേക്കും അദ്ദേഹത്തിന്റെ അഭിനയത്തിന് വലിയ ശ്രദ്ധ ലഭിച്ചു.

അഭിനയത്തിലൂടെ നേടിയ വിശ്വാസ്യതയ്ക്കൊപ്പം നിർമ്മാതാവെന്ന നിലയിലും സജീവമാകുകയാണ് ഫഹദ് എന്നത് നമ്മുക്ക് ഇതില്നിന്നുതന്നെ വ്യക്തമാണ്. ക്യാമറയ്ക്ക് മുന്നിലെ പ്രകടനത്തിൽ നിന്ന് സിനിമയുടെ തിരഞ്ഞെടുപ്പ്, നിർമ്മാണം, അവതരണം തുടങ്ങിയ മേഖലകളിലേക്ക് കൂടി അദ്ദേഹത്തിന്റെ ഇടപെടൽ വ്യാപിച്ചു. അതുകൊണ്ടുതന്നെ ഭാവന സ്റ്റുഡിയോസിന്റെ മുന്നേറ്റം ഫഹദിന്റെ കരിയറിലെ മറ്റൊരു പ്രധാന അധ്യായമായി മാറുന്നു. ഒപ്പം ഭാവന സ്റുഡിയോസിന്റെ ചിത്രമാണെകിൽ അതിലൊരു ക്വാളിറ്റിയും ഉണ്ടെന്നാണ് പ്രേക്ഷക വിലയിരുത്തൽ.

ബോക്സ് ഓഫീസ് വിജയങ്ങൾക്കപ്പുറം, വ്യത്യസ്ത സിനിമകൾക്ക് അവസരം നൽകുന്ന നിർമ്മാണ സമീപനമാണ് ഭാവന സ്റ്റുഡിയോസിനെ ശ്രദ്ധേയമാക്കുന്നത്. നടനായി സ്വന്തമാക്കിയ സ്ഥാനത്തെ നിർമ്മാതാവെന്ന നിലയിലും വികസിപ്പിക്കുന്ന ഫഹദ് ഫാസിലിന്റെ യാത്ര, മലയാള സിനിമയിലെ ഒരു നടന്റെ വളർച്ചയ്ക്കപ്പുറം ഒരു സിനിമാ കൂട്ടായ്മയുടെ വളർച്ചയുടെ കഥ കൂടിയായി മാറുകയാണ്.