ക്ഷമയും മാന്യതയും സമാധാനവും തികഞ്ഞൊരു മനുഷ്യന്‍! മോഹന്‍ലാലിനെക്കുറിച്ച് ജോയ് മാത്യു

Authored by: നിമിഷ|Samayam Malayalam•3 Jul 2025, 2:13 pm

മോഹന്‍ലാലിനോട് പ്രത്യേകമായൊരു സ്‌നേഹമുണ്ട് മലയാളികള്‍ക്ക്. സിനിമയിലായാലും വ്യക്തി ജീവിതത്തിലായാലും അദ്ദേഹം പലര്‍ക്കും മാതൃകയാണ്. മോനേ എന്ന് വിളിച്ച് സൗമ്യനായി, സ്‌നേഹത്തോടെ പെരുമാറുന്ന ലാലേട്ടനെക്കുറിച്ച് പ്രിയപ്പെട്ടവരെല്ലാം വാചാലരാവാറുമുണ്ട്. പ്രതികരണം ചോദിക്കുന്നതിനിടെ കണ്ണില്‍ കൊണ്ടപ്പോഴും എന്താ മോനേ ഇത് എന്ന് ചോദിച്ച് കാറില്‍ കയറുകയായിരുന്നു അദ്ദേഹം. അദ്ദേഹത്തിന് ഒന്നും പറയാനില്ലെങ്കില്‍ പിന്നെന്തിനാണ് മൈക്കുമായി ഇങ്ങനെ അടുത്ത് ചെല്ലുന്നതെന്നായിരുന്നു വിമര്‍ശനങ്ങള്‍. നിമിഷനേരം കൊണ്ടായിരുന്നു വീഡിയോ വൈറലായത്.

സോഷ്യല്‍മീഡിയയിലൂടെയായി ഈ വീഡിയോ വൈറലായിരുന്നു. ചെയ്ത തെറ്റ് മനസിലാക്കി മാധ്യമപ്രവര്‍ത്തകന്‍ മോഹന്‍ലാലിനെ വിളിച്ച് ക്ഷമ പറയുന്ന ശബ്ദ സന്ദേശവും പുറത്തുവന്നിരുന്നു. എനിക്കൊരബദ്ധം പറ്റിയതാണെന്ന് പറഞ്ഞപ്പോള്‍ അതൊന്നും കുഴപ്പമില്ല, കഴിഞ്ഞ കാര്യമല്ലേ, നോ പ്രോബ്ലം എന്നായിരുന്നു മറുപടി.

Also Read: സിന്ധു ലേബര്‍ റൂമില്‍! ഹെല്‍ത്ത് കാര്‍ഡിന് പകരം പ്രോഗ്രസ് കാര്‍ഡ് കൊടുത്ത കിച്ചു! ജനിച്ച് എട്ടാംനാള്‍ കുട വെച്ച് അടിയും കിട്ടി ഓസിക്ക്! മറക്കാനാവാത്ത ഓര്‍മ്മകള്‍

കണ്ണിന് കുഴപ്പമില്ല, ഉണ്ടായാലും ഒന്നും ചെയ്യാനൊക്കത്തില്ല. നമ്മളോട് ഒരു പോസ്റ്റിടാന്‍ പറയുന്നു, അതുകഴിഞ്ഞ് ഫംഗ്ക്ഷന് വരുന്നു, അതിനിടയ്‌ക്കെന്താണ് ന്യൂസില്‍ വന്നതെന്ന് എനിക്കറിയില്ല. അറിഞ്ഞൂടാത്തൊരു കാര്യത്തെക്കുറിച്ച് ഞാനെങ്ങനെ സംസാരിക്കാനാണ്. എനിക്കറിയില്ല, അറിഞ്ഞിട്ട് പ്രതികരിക്കാം എന്ന് പറഞ്ഞത് അതുകൊണ്ടാണ്. പുരികത്തിന് കൊള്ളാനുള്ളത് കണ്ണില്‍ക്കൊണ്ടു അത്രേയുള്ളൂ ഈ സംഭവം എന്നായിരുന്നു മറുപടി. നിന്നെ ഞാന്‍ നോക്കിവെച്ചിട്ടുണ്ട് കേട്ടോ എന്ന് തമാശരൂപേണയായി പറഞ്ഞായിരുന്നു സംസാരം അവസാനിപ്പിച്ചത്.

സെലിബ്രിറ്റികളടക്കം നിരവധി പേരായിരുന്നു മോഹന്‍ലാലിനെക്കുറിച്ച് വാചാലരായെത്തിയത്. ജോയ് മാത്യുവും ഫേസ്ബുക്കിലൂടെ കുറിപ്പ് പങ്കുവെച്ചിരുന്നു. ക്ഷമ, മാന്യത, സമാധാനം. ഇതും മൂന്നും തികഞ്ഞ ഒരു മനുഷ്യനെ ഇന്നലെ ഒരു വീഡിയോയിൽ കണ്ടു. അയാളുടെ പേര് മോഹൻലാൽ എന്നാണ്. എന്ത് ഭൂലോക വാർത്തക്ക് വേണ്ടിയാണ് അദ്ദേഹത്തെ ഒരു മാധ്യമൻ മൈക്ക് വടി കൊണ്ട് കണ്ണിൽ കുത്തിയത് എന്ന് മനസ്സിലായില്ല. ഒരു നടന്റെ ഏറ്റവും അമൂല്യമായ ഒന്നാണ് കണ്ണുകൾ. ഭാഗ്യത്തിന് മൈക്കുവടി പുരികത്തിനെ കൊണ്ടുള്ളൂ. അദ്ദേഹം ക്ഷമിച്ചു, കാരണം അയാൾ മോഹൻലാലാണ്.

തുടർന്ന് മാധ്യമന്‍ അദ്ദേഹത്തെ ഫോണിൽ വിളിച്ചു സോറി പറയുന്നതും കേട്ടു. മാന്യമായുള്ള മറുപടികൾ കൊണ്ട് അദ്ദേഹം വീണ്ടും അവനെ വിസ്മയിപ്പിച്ചു. കാരണം മറുവശത്ത്‌ മോഹൻലാലാണ് .മൈക്ക് കാണുമ്പോൾ കലിതുള്ളുന്നവരും ഫോൺ വിളിക്കുമ്പോൾ സമനില തെറ്റുന്നവർക്കും മാതൃകയാക്കാൻ പറ്റുന്ന ഒരാൾ അയാളുടെ പേരാണ് മോഹൻലാൽ എന്നായിരുന്നു ജോയ് മാത്യു കുറിച്ചത്.