ചരിത്രമെഴുതി വിരാട് കോഹ്‌ലി; ഈ നേട്ടം കൈവരിക്കുന്ന ആദ്യ താരം; തകര്‍ത്തത് മൂന്ന് കിടലന്‍ റെക്കോഡുകള്‍

Authored by: നിഷാദ് അമീന്‍|Samayam Malayalam•27 May 2025, 11:31 pm

ഐപിഎല്‍ 2025ല്‍ (IPL 2025) മൂന്ന് കിടിലന്‍ ലോക റെക്കോഡുകള്‍ സ്വന്തമാക്കി വിരാട് കോഹ്‌ലി (Virat Kohli). അവസാന ലീഗ് മല്‍സരത്തില്‍ റോയല്‍ ചാലഞ്ചേഴ്‌സ് ബെംഗളൂരുവിനായി അര്‍ധസെഞ്ചുറി നേടിയതോടെയാണിത്. ലക്‌നൗ സൂപ്പര്‍ ജയന്റ്‌സിനെതിരായ മല്‍സരത്തില്‍ (Lucknow Super Giants vs Royal Challengers Bengaluru) കോഹ്‌ലി 30 പന്തില്‍ 54 റണ്‍സ് നേടി. ഐപിഎല്‍ ചരിത്രത്തില്‍ ഏറ്റവും കൂടുതല്‍ അര്‍ധസെഞ്ചുറി നേടിയ കളിക്കാരന്‍, ആര്‍സിബിക്ക് വേണ്ടി 9,000 റണ്‍സ് നേടുന്ന ആദ്യ കളിക്കാരന്‍, അഞ്ച് ഐപിഎല്‍ സീസണുകളില്‍ 6,00 റണ്‍സ് നേടുന്ന ആദ്യ ക്രിക്കറ്റര്‍ എന്നീ റെക്കോഡുകളാണ് കോഹ്‌ലി സ്വന്തമാക്കിയത്.


ഐപിഎല്ലില്‍ കോഹ്‌ലിയുടെ 63ാം അര്‍ധസെഞ്ചുറിയാണിത്. 62 അര്‍ധസെഞ്ചുറികള്‍ നേടിയ ഡേവിഡ് വാര്‍ണര്‍ക്കൊപ്പം റെക്കോഡ് പങ്കിടുകയായിരുന്നു. ഇന്നത്തെ മല്‍സരത്തോടെ ഏറ്റവും കൂടുതല്‍ ഐപിഎല്‍ അര്‍ധസെഞ്ചുറിയെന്ന നേട്ടത്തിന്റെ ഏക അവകാശിയായി കോഹ്‌ലി മാറി. ഐപിഎല്ലില്‍ 46 അര്‍ധസെഞ്ചുറികളുള്ള രോഹിത് ശര്‍മയാണ് നാലാം സ്ഥാനത്തുണ്ടെങ്കിലും കോഹ്‌ലിയേക്കാള്‍ ഏറെ പിന്നിലാണ്. ശിഖര്‍ ധവാന്‍ (51) ആണ് മൂന്നാംസ്ഥാനത്ത്.

'ഇതാണ് എന്റെ പ്രിയപ്പെട്ട ഗോള്‍': 800ലധികം ഗോളടിച്ച ലയണല്‍ മെസ്സിയുടെ തെരഞ്ഞെടുപ്പ്; ഈ ഗോള്‍ ഇനി കലാസൃഷ്ടി
ഐപിഎല്‍ ചരിത്രത്തില്‍ ഏറ്റവും കൂടുതല്‍ അര്‍ധ സെഞ്ചുറി നേടിയ കളിക്കാര്‍:

• വിരാട് കോഹ്ലി - 63
• ഡേവിഡ് വാര്‍ണര്‍ - 62
• ശിഖര്‍ ധവാന്‍ - 51
• രോഹിത് ശര്‍മ - 46
• കെഎല്‍ രാഹുല്‍ - 40
• എബി ഡിവില്ലിയേഴ്സ് - 40

ആര്‍സിബിക്കായി 9,000 റണ്‍സ് നേട്ടം കൈവരിക്കാന്‍ കോഹ്‌ലിക്ക് 24 റണ്‍സ് ആയിരുന്നു വേണ്ടിയിരുന്നത്. ഈ മാച്ചിന് മുമ്പ് 270 ഇന്നിങ്സുകളില്‍ നിന്ന് 8,976 റണ്‍സ് ആയിരുന്നു സമ്പാദ്യം. 256 ഐപിഎല്‍ ഇന്നിങ്സുകളില്‍ നിന്ന് 8,552 റണ്‍സും ചാമ്പ്യന്‍സ് ലീഗ് ടി20യില്‍ 14 ഇന്നിങ്സുകളില്‍ നിന്ന് 424 റണ്‍സും ഉള്‍പ്പെടെയാണിത്.

ഐപിഎല്‍ പതിപ്പില്‍ 600ല്‍ കൂടുതല്‍ റണ്‍സ് അഞ്ച് തവണ നേടുന്ന ഏക കളിക്കാരനായും കോഹ്‌ലി മാറി. ഇത്തവണ 12 മാച്ചുകളില്‍ 548 റണ്‍സുമായി റണ്‍വേട്ടയില്‍ ആറാം സ്ഥാനത്തായിരുന്ന കോഹ്‌ലി ഇന്ന് 54 റണ്‍സ് കൂടി നേടി 602 റണ്‍സുമായി നാലാം സ്ഥാനത്തേക്ക് ഉയര്‍ന്നു. പ്ലേഓഫ് മല്‍സരങ്ങള്‍ കൂടി ബാക്കിയുള്ളതിനാല്‍ കോഹ്‌ലിക്ക് സ്ഥാനം മെച്ചപ്പെടുത്താന്‍ അവസരമുണ്ട്.

വലകള്‍ നിറയുന്നു; 1,000 ഗോളുകള്‍ എന്ന നേട്ടത്തോടടുത്ത് ക്രിസ്റ്റ്യാനോ റൊണാള്‍ഡോ
ഇതിന് മുമ്പ് 2013, 2016, 2023, 2024 ഐപിഎല്‍ സീസണുകളിലാണ് കോഹ്‌ലി 600 കടന്നത്. കെഎല്‍ രാഹുല്‍ നാല് തവണയും (2018, 2020, 2021, 2022) ക്രിസ് ഗെയ്ല്‍ (2011, 2012, 2013), ഡേവിഡ് വാര്‍ണര്‍ (2016, 2017, 2019) എന്നിവര്‍ മൂന്ന് സീസണുകളിലും ഈ നേട്ടം കൈവരിച്ചിട്ടുണ്ട്.

കൂടുതല്‍ തവണ 600 റണ്‍സ് തികച്ചവര്‍

• വിരാട് കോഹ്ലി-5 (2013, 2016, 2023, 2024, 2025)
• കെഎല്‍ രാഹുല്‍-4 (2018, 2020, 2021, 2022)
• ക്രിസ് ഗെയ്ല്‍-3 (2011, 2012, 2013)
• ഡേവിഡ് വാര്‍ണര്‍-3 (2016, 2017, 2019).