ഞാന്‍ ഉറങ്ങിയില്ലെങ്കില്‍ ആരെയും ഉറങ്ങാന്‍ സമ്മതിക്കില്ല; ഒരു ചാര്‍ജറിന്റെ പേരില്‍ ശിവകാര്‍ത്തികേയന്റെ ഉറക്കം കളഞ്ഞ ഹന്‍സിക

Authored byഅശ്വിനി പി | Samayam Malayalam | Updated: 25 Apr 2025, 8:40 pm

പൊതുവെ സിനിമ സെറ്റുകളില്‍ സഹതാരങ്ങളെ കളിയാക്കുന്നതും എന്റര്‍ടൈന്‍ ചെയ്യുന്നതും എല്ലാം എസ് കെ എന്ന് ആരാധകര്‍ വിളിക്കുന്ന ശിവകാര്‍ത്തികേയന്‍ ആണ്. സെറ്റില്‍ ഓരോ കോമഡികള്‍ ശിവ ചെയ്യുന്നതിനെ കുറിച്ച് പല താരങ്ങളും നേരത്തെ തുറന്ന് സംസാരിച്ചിട്ടുണ്ട്. എന്നാല്‍ ശിവകാര്‍ത്തികേയന്റെ തന്നെ ഉറക്കം കെടുത്തിയ നടിയാണ് ഹന്‍സിക മോട്വാണി. ഒരു അവാര്‍ഡ് ഷോയില്‍ ഹന്‍സിക തന്നെയാണ് കഴിഞ്ഞ ദിവസം ആ കഥ വെളിപ്പെടുത്തിയത്.

മാന്‍ കരാട്ടൈ എന്ന ചിത്രത്തിലെ ഒരു പാട്ട് രംഗത്തിന്റെ ചിത്രീകരണത്തിന് ശേഷം പ്രൈവെറ്റ് ജെറ്റില്‍ ശിവകാര്‍ത്തികേയനും ഹന്‍സികയും ഡാന്‍സ് കൊറിയോഗ്രാഫര്‍ ബൃന്ദ മാസ്റ്ററും തിരിച്ചുവരികയാണ്. ഛത്തീസ്ഗഡില്‍ നിന്ന് ചെന്നൈയിലേക്കാണ് യാത്ര. കുറച്ചധികം മണിക്കൂറുകള്‍ എടുക്കും. ഷൂട്ടിങിന്റെ ക്ഷീണം കാരണം ശിവകാര്‍ത്തികേയന്‍ മയങ്ങിപ്പോയി, ബൃന്ദ മാസ്റ്ററും ഉറക്കത്തിലാണ്. ഹന്‍സികയ്ക്ക് മാത്രം ഉറക്കം വന്നില്ലത്രെ. ഇനിയും മണിക്കൂറുകള്‍ നീണ്ട യാത്രയുണ്ട്. നടിയ്ക്ക് ബോര്‍ അടിക്കുകയും ചെയ്യുന്നു.

Also Read: ഒളിച്ചോടിപ്പോയി കല്യാണം കഴിച്ചു, ഭര്‍ത്താവിന്റെ മരണം, വെള്ള വസ്ത്രത്തിലേക്കുള്ള മാറ്റം; രണ്ട് മക്കള്‍ക്കൊപ്പം ജീവിതം തിരിച്ചുപിടിച്ചതിനെ കുറിച്ച് ശാന്തിപ്രിയ

ബോറടി മാറ്റാന്‍ എന്ത് ചെയ്യും എന്നാലോചിച്ചപ്പോള്‍. എല്ലാവരെയും പ്രാങ്ക് ആക്കാം എന്ന് താന്‍ തീരുമാനിച്ചു എന്ന് ഹന്‍സിക തന്നെ പറയുന്നു. ഞാന്‍ ഉറങ്ങിയില്ലെങ്കില്‍ ആരും ഉറങ്ങേണ്ട, എനിക്ക് മാത്രം എന്താ ഉറക്കം വരാത്തത് എന്ന് ചിന്തിച്ച ശേഷം ഹന്‍സിക ഉടനെ ബഹളമുണ്ടാക്കി, ഫ്‌ളൈറ്റ് ഉടനെ യൂടേണ്‍ അടിക്കണം, തിരിച്ചു പോകണം എന്നായി ഹന്‍സിക. പൈലറ്റിനോട് ബഹളം വയ്ക്കുന്നത് കേട്ട് ബൃന്ദ മാസ്റ്ററും ശിവകാര്‍ത്തികേയനും ഉണര്‍ന്നു.

എന്താ പ്രശ്‌നം എന്ന് ചോദിച്ചപ്പോള്‍, ഫ്‌ളൈറ്റ് തിരിക്കണം എന്ന വാശിയില്‍ തന്നെയായിരുന്നു ഹന്‍സിക. വേണമെങ്കില്‍ പൈലറ്റില്‍ ഒഴിക്കാന്‍ പെട്രോള്‍ വരെ ഞാന്‍ വാങ്ങിത്തരാം എന്ന് ഹന്‍സിക പറഞ്ഞുവത്രെ. എന്താണ് കാരണം എന്ന് ചോദിച്ചപ്പോള്‍ അവസാനം ഹന്‍സിക പറഞ്ഞു, എന്റെ ഒരു ചാര്‍ജര്‍ താമസിച്ച ഹോട്ടലില്‍ വച്ചു മറന്നു, അത് നാട്ടിലൊന്നും കിട്ടില്ല, വിദേശത്ത് നിന്ന് കൊണ്ടുവന്നതാണ്, അതെനിക്കിപ്പോള്‍ വേണം എന്ന്. അവസാനം പ്രശ്‌നം എങ്ങനെ പരിഹരിച്ചു എന്ന് നടി പറഞ്ഞിട്ടില്ല, എന്തായാലും എല്ലാവരുടെയും ഉറക്കം നഷ്ടപ്പെടുത്തിയതില്‍ ഹാപ്പിയായിരുന്നുവത്രെ.