ഞാൻ മരിക്കില്ല എന്ന് എനിക്കുറപ്പായിരുന്നു, പക്ഷേ ഈ അവസ്ഥ എന്റെ മകളെ ബാധിക്കരുത് എന്ന് മനസ്സിലുറപ്പിച്ചു; അതിജീവനത്തെ കുറിച്ച് ​ഗൗതമി

Authored by: അശ്വിനി പി|Samayam Malayalam•4 Jun 2025, 1:40 pm

ഹിസ് ഹൈനസ് അബ്ദുള്ള, ധ്രുവം പോലുള്ള സിനിമകളിലൂടെ മലയാളികൾക്കും ഏറെ പ്രിയപ്പെട്ട നടിയാണ് ഗൗതമി. എൺപതുകളിൽ തുടങ്ങിയ സിനിമാ ജീവിതം ഇപ്പോൾ നാല് പതിറ്റാണ്ടുകൾ പിന്നിട്ടു നിൽക്കുന്നുയ. തെലുങ്കിൽ തുടങ്ങി, തമിഴ്, മലയാളം, ഹിന്ദി ഭാഷകളിൽ എല്ലാം സിനിമകൾ ചെയ്തു. ഇത്രയും കാലം ഇന്റസ്ട്രിയിൽ നിൽക്കാൻ സാധിക്കുമെന്ന് ഒരിക്കലും കരുതിയിരുന്നില്ല എന്ന് ഗൗതമി പറയുന്നു.

എൻജിനിയറിങിന് പഠിച്ചുകൊണ്ടിരിയ്ക്കുമ്പോഴാണ് ബന്ധു നിർമിച്ച തെലുങ്ക് ചിത്രത്തിലൂടെ അഭിനയ ലോകത്തേക്ക് വന്നത്. തുടർന്ന് തമിഴ് സിനിമകളിൽ നിന്ന് തുടരെ അവസരങ്ങൾ വന്നു, ഗുരു ശിഷ്യൻ എന്ന രജിനികാന്ത് ചിത്രത്തിന് ശേഷം ഇതാണ് തന്റെ കരിയർ എന്ന് ഉറപ്പിച്ച ഗൗതമി പിന്നീട് സിനിമകളിൽ സജീവമാവുകയായിരുന്നു.

Also Read: 57 കാരനായ അച്ഛന്റെ 28 കാരിയായ നായികയുമായുള്ള സൗഹൃദം! മീനാക്ഷി ദിലീപിനൊപ്പമുള്ള ഒരു നല്ല ദിവസത്തെ കുറിച്ച് നമിത പ്രമോദ്, വയറും മനസ്സും നിറഞ്ഞു

സിനിമകൾക്ക് പുറമെ ഗൗതമി പിന്നീട് രാഷ്ട്രീയത്തിലും സജീവമായി. ഇതിനിടയിൽ ഗൗതമിയ്ക്ക് കാൻസർ രോഗവും പിടിപെട്ടിരുന്നു. അതിനെ അതിജീവിച്ച് തിരിച്ചുവന്നത് എങ്ങനെയാണ് എന്ന് ഗലാട്ട തമിഴിന് നൽകിയ അഭിമുഖത്തിൽ സംസാരിക്കവെ ഗൗതമി വെളിപ്പെടുത്തി. ചില ലക്ഷണങ്ങൾ കണ്ടപ്പോൾ തന്നെ രോഗം സംശയിച്ചു, ഡോക്ടറെ കണ്ടിരുന്നു. രോഗം സ്ഥിരീകരിച്ചതിന് ശേഷം കരഞ്ഞ് ബഹളമുണ്ടാക്കാനൊന്നും നിന്നില്ല.

വിഷമിച്ചിരിയ്ക്കുന്നതും, കരഞ്ഞ് നിലവിളിക്കുന്നതും സമയം കളയുകയേയുള്ളൂ, അതുകൊണ്ട് യാതൊരു ഗുണവും ഇല്ല എന്ന തിരിച്ചറിവ് എനിക്കുണ്ടായിരുന്നു. അത് മാത്രമല്ല, കാൻസർ എന്നെ കൊണ്ടുപോകില്ല, ഞാൻ മരിക്കില്ല എന്ന ഉറപ്പും എനിക്കുണ്ടായി. എന്റെ അവസ്ഥ മകളെ തളർത്തരുത് എന്ന ബോധമാണ് അപ്പോൾ എനിക്ക് കൂടുതൽ ധൈര്യം നൽകിയത്. ഞാനൊരു സിംഗിൾ പാരന്റ് ആണ്. എനിക്ക് എന്തെങ്കിലും സംഭവിച്ചു കഴിഞ്ഞാൽ, അല്ലെങ്കിൽ എന്റെ ഈ അവസ്ഥ ഏറ്റവും അധികം ബാധിക്കുന്നത് മകളെയാണ്. അത് പാടില്ല, അവൾക്ക് വേണ്ടി തിരിച്ചുവരണം എന്ന് മനസ്സിലുറപ്പിച്ചു, അത് എനിക്ക് ധൈര്യം നൽകി.
മകൾക്ക് അന്ന് നാല് വയസ്സാണ്. അമ്മയ്ക്ക് അസുഖമുണ്ട് എന്നും, അതിന് ശസ്ത്രക്രിയ വേണം എന്നും, അത് കാരണം മുടികൊഴിയും, അമ്മ ക്ഷീണിക്കും എന്നൊക്കെ നേരത്തെ അവളോട് പറഞ്ഞു. നോർമലാണ് എന്ന രീതിയിൽ മകൾക്കൊരു ധാരണയുണ്ടാക്കി. അതുകൊണ്ട് തന്നെ അപ്പോഴത്തെ എന്റെ അവസ്ഥ അവളരെ അധികം ബാധിച്ചിരുന്നില്ല- ഗൗതമി പറഞ്ഞു.