ഞാൻ മരിക്കുകയാണ്, ഇതിനപ്പുറം ഒന്നുമില്ല എന്ന് കരുതി! തിരി‍ഞ്ഞു നോക്കിയപ്പോൾ കണ്ട മുഖം; ഇമോഷണലായി രജിഷ വിജയൻ

Authored by: അശ്വിനി പി|Samayam Malayalam•13 Oct 2025, 3:26 pm

കർണൻ എന്ന ചിത്രത്തിന് ശേഷം മറ്റൊരു മാരി സെൽവരാജ് ചിത്രത്തിൽ അഭിനയിച്ചതിന്റെ സന്തോഷത്തിലും എക്സൈറ്റ്മെന്റിലുമാണ് രജിഷ വിജയൻ . ധ്രുവ് വിക്രമും അനുപമ പരമേശ്വരനും കേന്ദ്ര കഥാപാത്രങ്ങളായി എത്തുന്ന ബൈസൺ എന്ന ചിത്രത്തിൽ മറ്റൊരു കേന്ദ്ര കഥാപാത്രത്തെ അവതരിപ്പിച്ചിരിയ്ക്കുന്നത് രജിഷ വിജയനാണ്. ചിത്രത്തിന്റെ ഓഡിയോ ലോഞ്ച് ചടങ്ങിൽ നടി വളരെ അധികം ഇമോഷണലായി.

തുടർച്ചയായി രണ്ടാം തവണയും മാരി സെൽവരാജ് സാറിന്റെ സിനിമയിൽ അഭിനയിക്കുക എന്നാൽ, അത് തീർത്തും ഒരു അനുഗ്രഹമാമെന്ന് നടി പറയുന്നു. കാരണം, കർണൻ എന്ന സിനിമ ചെയ്തതു തന്നെ കരിയറിലെ ഏറ്റവും മികച്ചത് എന്ന് കരുതിയതാണ്. ബൈസണിലേക്ക് ചേച്ചിയുടെ റോളാണ് എന്ന് പറഞ്ഞ് വിളിച്ചപ്പോൾ, ചേച്ചിയോ അമ്മയോ അനിയത്തിയോ എന്തുമായിക്കോട്ടെ, ചേച്ചിയുടെ സിനിമയിൽ ഒരു വേഷം കിട്ടിയാൽ മതി എന്നാണ് ഞാൻ പറഞ്ഞത് എന്ന് രജിഷ പറഞ്ഞു.

Also Read: മതത്തിന്റെ പ്രശ്നങ്ങൾ ഉണ്ടായിരുന്നു, എന്തുകണ്ട് കല്യാണം വൈകിപ്പോയി? 15 വർഷത്തെ യാത്ര, കീർത്തി പറയുന്നു

സംവിധായകൻ എന്ന നിലയിൽ മാത്രമല്ല, വ്യക്തി എന്ന നിലയിലും എനിക്ക് മാരി സെൽവരാജ് സർ അത്രയും പ്രിയപ്പെട്ടതാണ്. എനിക്ക് നീന്തൽ അറിയില്ല. കർണന്റെ സമയത്താണ് കുറച്ച് പഠിച്ചത്. ഷോട്ടിന് ആവശ്യമായത് മാത്രം. ബൈസണിലേക്ക് എത്തിയപ്പോൾ ഒരു കുളത്തിലേക്ക് എടുത്ത് ചാടേണ്ട രംഗമുണ്ട്. നീന്താൻ അറിയില്ലേ എന്ന് സർ ചോദിച്ചു, അയ്യയ്യോ മറന്നു പോയല്ലോ, നാല് വർഷമായില്ലേ എന്നൊക്കെ മനസ്സിൽ ചിന്തിച്ചുവെങ്കിലും അറിയാം എന്ന് ഞാൻ പറഞ്ഞു.

എല്ലാ സെക്യൂരിറ്റിയും ഉണ്ടായിരുന്നു, ഷോട്ട് റെഡിയായി, വെള്ളത്തിലേക്ക് ചാടാൻ പറഞ്ഞു, അനുപമ ചാടി, പുറകെ ഞാനും ചാടി. പക്ഷെ എനിക്ക് നീന്താൻ സാധിച്ചില്ല, പാവാടയിൽ കാൽ കുരുങ്ങി. അഞ്ച് സെക്കന്റ്, ഞാൻ വെള്ളത്തിലേക്ക് താണു പോയി, മരണം ഞാൻ ഉറപ്പിച്ചു. ഇനിയില്ല, സെക്കന്റുകൾക്കുള്ളിൽ പലതും മനസ്സിൽ മിന്നി മാഞ്ഞു.

പക്ഷേ ആരൊക്കെയോ ചേർന്ന് എന്നെ രക്ഷപ്പെടുത്തി കരക്കെത്തിച്ചു. ഞാൻ തിരിഞ്ഞു നോക്കുമ്പോൾ എന്റെ പിന്നിൽ മാരി സർ ഉണ്ടായിരുന്നു. കൂളിങ് ഗ്ലാസ്, ഷൂസ്, സോക്സ് ഒന്നും അഴിച്ചുവയ്ക്കാതെ അദ്ദേഹം എന്നെ രക്ഷപ്പെടുത്താൻ വേണ്ടി വെള്ളത്തിലേക്ക് എടുത്തു ചാടി. സെക്യൂരിറ്റിയ്ക്കായി നിന്നവർക്ക് മുന്നെ വെള്ളത്തിൽ ചാടി എന്നെ രക്ഷപ്പെടുത്തിയത് അദ്ദേഹമാണ്. ഒരു മനുഷ്യൻ എന്ന നിലയിൽ അദ്ദേഹത്തോടുള്ള ഇഷ്ടവും ബഹുമാനവും എനിക്ക് കൂടി- രജിഷ വിജയൻ പറഞ്ഞു.