ഞാൻ വർക്ക് ചെയ്യും, പക്ഷേ അത് പോലെ നിങ്ങൾ ചെയ്യരുത്, ആരോ​ഗ്യത്തിന് പ്രശ്നമാണ്; 8 മണിക്കൂർ ജോലിയെ കുറിച്ച് രശ്മിക

Authored by: അശ്വിനി പി|Samayam Malayalam•29 Oct 2025, 4:48 pm

സിനിമ മറ്റ് ജോലികളെ പോലെയല്ല, ഒൻപത് മണി മുതൽ അഞ്ച് മണി വരെ ചെയ്ത് ഇറങ്ങിപ്പോകാൻ കഴിയുന്ന ഒരു വർക്ക് കൾച്ചറിൽ സിനിമ ചെയ്യാൻ സാധിക്കില്ല. രാത്രിയെന്നോ പകലെന്നോ ഇല്ലാതെയാണ് പലരും അഭിനയിക്കുന്നത്. എന്നാൽ ചില നടിമാർ അതിന് തയ്യാറല്ല. സമീപകാലത്ത് ദീപിക പദുക്കോൺ ചില സിനിമകളിൽ നിന്ന് ഈ ജോലി സമയത്തിന്റെ പേരിനെ ചൊല്ലി പിന്മാറിയത് വാർത്തയായിരുന്നു. ഈ സാഹചര്യത്തിലാണ് രശ്മിക മന്ദാന തന്റെ ജോലി സമയത്തെ കുറിച്ച് സംസാരിക്കുന്നത്.

കഴിഞ്ഞ ദിവസം രശ്മികയുടെ ഏറ്റവും പുതിയ ചിത്രമായ ദ ഗേൾഫ്രണ്ടിന്റെ ഓഡിയോലോഞ്ചിൽ നിർമാതാവ് നടിയെ ഒരുപാട് പ്രശംസിച്ചിരുന്നു. എട്ട് മണിക്കൂർ മാത്രമേ ജോലി ചെയ്യൂ എന്ന നിബന്ധനയുള്ള നടിയല്ല രശ്മിക, ഏത് നേരത്തും അവർ ഷൂട്ടിന് തയ്യാറാണ്, ടീമുമായി നല്ല സഹകരണമായിരുന്നു എന്നൊക്കെയാണ് നിർമാതാവ് പറഞ്ഞത്. നിർമാതാവ് രശ്മികയെ പ്രശംസിച്ചപ്പോൾ മറ്റ് പല നടിമാർക്കും അത് കൊണ്ടിരുന്നു. ഇപ്പോഴിതാ വിഷയത്തിൽ രശ്മിക പ്രതികരിക്കുന്നു.

Also Read: ഒരു മാസത്തെ ദാനപത്യ ജീവിതം ആഘോഷിച്ച് സെലീന ഗോമസും ബെന്നി ബ്ലാങ്കോയും, ബീച്ച് ഫോട്ടോ വൈറലാവുന്നു

നമ്മൾ അമിതമായി ജോലി ചെയ്യുന്നു എന്ന വസ്തുതയെ മഹത്വപ്പെടുത്തുന്നത് നല്ലതല്ലെന്ന് എനിക്ക് തോന്നുന്നു എന്നാണ് രശ്മിക പറഞ്ഞത്. ഞാൻ അമിതമായി ജോലി ചെയ്യുന്നുണ്ട്. പക്ഷേ ഞാൻ നിങ്ങളോട് പറയുന്നു, അത് വളരെ അർത്ഥശൂന്യമാണ്. അത് ചെയ്യരുത്. അത് സുസ്ഥിരമല്ല, ചെയ്യരുത്. നിങ്ങൾക്ക് എന്താണോ കംഫർട്ട് അത് ചെയ്യുക, നിങ്ങൾക്ക് ശരിയായത് ചെയ്യുക. എട്ട് മണിക്കൂർ തൊഴിൽ ചെയ്യും, അതിന് ശേഷം ഒൻപതും പത്തും മണിക്കൂർ ജോലി ചെയ്യാൻ പറയുന്നതിന് തയ്യാറാവരുത്. ഭാവിയിൽ അത് നിങ്ങൾക്ക് പല ബുദ്ധിമുട്ടുകളും ഉണ്ടാക്കും

ഒരു സാധാരണ മനുഷ്യൻ ചെയ്യുന്നതിനെക്കാളും അധികം കാര്യങ്ങൾ ഞാൻ ഏറ്റെടുക്കുന്നതിനാലാണ് എനിക്ക് ഓവർ ടൈം ജോലി ചെയ്യേണ്ടതായി വന്നത്. അതേ സമയം എന്റെ ടീമിനോട്, അവർക്ക് വേണ്ടി ഒന്നും ചെയ്യാൻ എനിക്ക് കഴിയില്ല എന്ന് പറയാനും എനിക്ക് സാധിക്കില്ല. ഏത് സാഹചര്യത്തിലാണ് എന്റെ ടീം എന്നോട് ഓവർ ടൈം ജോലി ചെയ്യാൻ പറയുന്നത് എന്ന് ഞാൻ മനസ്സിലാക്കും. ഇത്ര സമയം കൂടെ മാത്രമേ ആ ലൊക്കേഷൻ നമുക്ക് അനുവദിച്ചിട്ടുള്ളൂ എന്ന് പറഞ്ഞാൽ വേറെ വഴിയില്ല, ഞാൻ അതേറ്റെടുക്കും, ചെയ്യും.


എന്നോട് ഇതിനെ കുറിച്ച് അഭിപ്രായം ചോദിച്ചാൽ ചെയ്യരുത് എന്നേ ഞാൻ പറയൂ, ഒരു അഭിനേത്രി എന്ന നിലയിൽ എനിക്ക് സമയം നോക്കാതെ ജോലി ചെയ്യേണ്ടതായി വരുന്നു. അഭിനേതാക്കൾ മാത്രമല്ല, ഒരു സംവിധായകനും നിർമാതാവും മറ്റ് ടെക്നീഷ്യന്മാരും എല്ലാം സിനിമയ്ക്ക് വേണ്ടി സമയം നോക്കാതെ ജോലി ചെയ്യന്നവരാണ്- രശ്മിക മന്ദാന പറഞ്ഞു