ടോസ് നേടുന്നവർക്ക് കാര്യങ്ങൾ കൂടുതൽ എളുപ്പം; ഫൈനൽ പോരാട്ടത്തിലെ പിച്ച് ആരെ തുണയ്ക്കും

Authored by: അനുഷ ഗംഗാധരൻ|Samayam Malayalam•3 Jun 2025, 1:54 pm

ഐപിഎൽ ആരാധകർ എല്ലാം അക്ഷമരായി കാത്തിരിക്കുകയാണ് ഫൈനൽ മാമാങ്കത്തിനായി. ഇന്ത്യൻ പ്രീമിയർ ലീഗ് 2025 ഫൈനൽ പോരാട്ടത്തിൽ ഏറ്റുമുട്ടുന്നത് ഇതുവരെ കപ്പ് സ്വന്തമാക്കാത്ത രണ്ട് ടീമുകളാകുമ്പോൾ, ചരിത്രം പിറക്കുന്ന മത്സരത്തിൽ ആവേശം കൂടും. റോയൽ ചലഞ്ചേഴ്‌സ് ബെംഗളൂരുവും (ആർസിബി) പഞ്ചാബ് കിങ്‌സുമാണ് (പിബികെഎസ്) ഫൈനലിൽ ഏറ്റുമുട്ടുന്ന രണ്ട് ടീമുകൾ. 2014 ലാണ് പഞ്ചാബ് കിങ്‌സ് അവസാനമായി ഫൈനൽ മത്സരത്തിനായി മൈതാനത്ത് ഇറങ്ങുന്നത്. എന്നാൽ കപ്പ് നേടാൻ സാധിച്ചില്ല. ആർസിബിയാകട്ടെ 2016 ലാണ് അവസാനമായി ഫൈനലിൽ ഇറങ്ങുന്നത് ഈ മത്സരത്തിൽ വെറും 8 റൺസിനാണ് കിരീടം നഷ്ടമായത്. ഇന്ന് കന്നി കിരീടത്തിനായി ഇരുവരും ഏറ്റുമുട്ടുമ്പോൾ അവിടെ ചരിത്രം പിറക്കുമെന്ന് അതുകൊണ്ടു തന്നെ പറയാൻ സാധിക്കും.

അഹമ്മദാബാദ് നരേന്ദ്ര മോദി സ്റ്റേഡിയത്തിൽ ഇന്ന് രാത്രി 7 30 നാണ് മത്സരം. ഈ മത്സരത്തിൽ ഇരുവരും ഏറ്റുമുട്ടുന്ന പിച്ച് റിപ്പോർട്ട് ഒന്ന് പരിശോധിക്കാം.

ആർസിബി - പിബികെഎസ് പിച്ച് റിപ്പോർട്ട്

അഹമ്മദാബാദ് നരേന്ദ്ര മോദി സ്റ്റേഡിയത്തിൽ ആണ് ഇന്ന് ഫൈനൽ പോരാട്ടം നടക്കുക. ഐപിഎൽ 2025 രണ്ടാം ക്വാളിഫയർ മത്സരത്തിൽ മുംബൈ ഇന്ത്യൻസും പഞ്ചാബ് കിങ്‌സും ഏറ്റുമുട്ടിയതും ഇതേ പിച്ചിൽ തന്നെയാണ്. മഴയെ തുടർന്ന് വൈകിയാണ് മത്സരം ആരംഭിച്ചത് എങ്കിലും ബാറ്റർമാർക്ക് വെടിക്കെട്ട് പ്രകടനം നടത്താൻ സാധിച്ചു. 200 ൽ അധികം റൺസാണ് ഇരു ടീമുകൾക്കും അടിച്ചെടുക്കാൻ സാധിച്ചത്.

പൊതുവെ നരേദ്ര മോദി സ്റ്റേഡിയം ബാറ്റിങ് പറുദീസ എന്ന് തന്നെയാണ് അറിയപ്പെടാറുള്ളത്. അതുകൊണ്ടുതന്നെ ഇന്ന് വെടിക്കെട്ട് ബാറ്റിങ് പ്രകടനം താരങ്ങൾ കാഴ്ചവെക്കാനുള്ള സാധ്യത കൂടുതലാണ്. പിച്ചിന്റെ ചരിത്രം പരിശോധിക്കുമ്പോൾ ഇതുവരെ 45 ഐപിഎൽ മത്സരങ്ങളാണ് ഇവിടെ നടന്നത്. ഇതിൽ ആദ്യം ബാറ്റ് ചെയ്‌ത ടീം 21 തവണയാണ് ജയിച്ചത്. രണ്ടാമത് ബാറ്റിങ് തുടങ്ങിയ ടീം 22 തവണ ജയിക്കുകയും ഒരു തവണ മത്സരം ടൈ ആകുകയും ഒരു തവണ റദ്ദാവുകയും ചെയ്‌തു.

രണ്ടാം ക്വാളിഫയർ മത്സരത്തിന്റെ ഫലം പരിശോധിച്ചാൽ, രണ്ടാമത് ബാറ്റ് ചെയ്‌ത പഞ്ചാബ് കിങ്‌സാണ് ജയിക്കുന്നതും ഫൈനൽ ഉറപ്പിക്കുന്നതും. ഇന്ന് നടക്കുന്ന മത്സരത്തിൽ ടോസ് നേടുക എന്നതും നിർണായകമാണ്. ടോസ് നേടുന്ന ടീം ആദ്യം ബൗളിങ് തെരഞ്ഞെടുക്കാനുള്ള സാധ്യതയും കൂടുതലാണ്.