ഡെവോൺ കോൺവെയെ റിട്ടയേഡ് ഔട്ടാക്കി ചെന്നൈ ‌സൂപ്പർ കിങ്സ്, ഐപിഎല്ലിൽ വീണ്ടും നാടകീയ രംഗങ്ങൾ; നടന്നത് ഇങ്ങനെ

Curated byഗോകുൽ എസ് | Samayam Malayalam | Updated: 9 Apr 2025, 12:08 am

Samayam Malayalamഡെവോൺ കോൺവെ

ലക്നൗ സൂപ്പർ ജയന്റ്സിന് എതിരായ കളിയിൽ തിലക് വർമയെ റിട്ടയേഡ് ഔട്ടാക്കിയ മുംബൈ ഇന്ത്യൻസിന്റെ നീക്കം ക്രിക്കറ്റ് ലോകത്തെ അമ്പരപ്പിച്ചിരുന്നു. തിലകിന്റെ മോശം ഫോമായിരുന്നു ഇത്തരമൊരു കടുത്ത തീരുമാനത്തിലേക്ക് മുംബൈയെ നയിച്ചത്. ഇപ്പോളിതാ ഒരിക്കൽക്കൂടി ഐപിഎല്ലിൽ ഒരു റിട്ടയേഡ് ഔട്ട് സംഭവിച്ചിരിക്കുന്നു. ചെന്നൈ സൂപ്പർ കിങ്സിന്റെ ന്യൂസിലൻഡ് താരം ഡെവോൺ കോൺവെയാണ് ഇപ്പോൾ റിട്ടയേഡ് ഔട്ടായി ക്രിക്കറ്റ് ലോകത്തെ പുതിയ ചർച്ചാ വിഷയമായിരിക്കുന്നത്. പഞ്ചാബ് കിങ്സിന് എതിരായ മത്സരത്തിലായിരുന്നു ചെന്നൈ സൂപ്പർ കിങ്സ്, കോൺവെയെ റിട്ടയേഡ് ഔട്ടാക്കിയത്. മത്സരത്തിൽ 220 റൺസ് വിജയലക്ഷ്യം പിന്തുടർന്ന ചെന്നൈ സൂപ്പർ കിങ്സിന്റെ പതിനെട്ടാം ഓവറിലായിരുന്നു സംഭവം. അത്ര മികച്ച ഫോമിൽ അല്ലായിരുന്ന കോൺവെ ഈ ഓവറിലെ അഞ്ചാം പന്തിന് ശേഷമാണ് റിട്ടയേഡ് ഔട്ടായി പുറത്തേക്ക് പോയത്.

കോൺവെക്ക് പകരം മറ്റൊരു ഇടം കൈയ്യനായ രവീന്ദ്ര ജഡേജ ക്രീസിലേക്ക് വരുകയും ചെയ്തു. 49 പന്തുകളിൽ നിന്ന് ആറ് ഫോറുകളും രണ്ട് സിക്സറുകളുമടക്കം 69 റൺസായിരുന്നു റിട്ടയേഡ് ഔട്ടാകുമ്പോൾ കോൺവെയുടെ സമ്പാദ്യം. 220 റൺസ് ചേസ് ചെയ്ത കളിയിൽ ഇതൊരു മോശം ഇന്നിങ്സ് തന്നെയായിരുന്നു. പ്രത്യേകിച്ച് ആദ്യ ഓവറുകളിൽ റൺസെടുക്കാൻ താരം ശരിക്കും വിയർത്തു. ഈ മോശം ഫോം തന്നെയാണ് നിർണായക ഘട്ടത്തിൽ കോൺവെയെ റിട്ടയേഡ് ഔട്ടാക്കാനുള്ള തീരുമാനത്തിൽ ചെന്നൈയെ എത്തിച്ചത്.


ഐപിഎല്ലിൽ റിട്ടയേഡ് ഔട്ടാകുന്ന അഞ്ചാമത്തെ താരമാണ് ഡെവോൺ കോൺവെ. രാജസ്ഥാൻ റോയൽസിന് വേണ്ടി കളിക്കുമ്പോൾ റിട്ടയേഡ് ഔട്ടായ ആർ അശ്വിനാണ് ഈ ലിസ്റ്റിലെ ഒന്നാമൻ. അഥർവ ടൈഡെ, സായ് സുദർശൻ, തിലക് വർമ എന്നിവരും ഐപിഎല്ലിൽ റിട്ടയേഡ് ഔട്ടായിട്ടുണ്ട്.

Also Read: 39 പന്തില്‍ സെഞ്ചുറി...! ഐപിഎല്ലില്‍ പുതിയ റെക്കോഡ്; ആരാണ് പ്രിയാന്‍ഷ് ആര്യ?

അതേ സമയം ഡെവോൺ കോൺവെയെ റിട്ടയേഡ് ഔട്ടാക്കിയെങ്കിലും മത്സരത്തിൽ ജയം നേടാൻ ചെന്നൈ സൂപ്പർ കിങ്സിനായില്ല എന്നതാണ് ശ്രദ്ധേയം. കോൺവെക്ക് പകരമിറങ്ങിയ രവീന്ദ്ര ജഡേജക്ക് അഞ്ച് പന്തിൽ ഒൻപത് റൺസ് മാത്രമാണ് നേടാനായത്. മത്സരം ചെന്നൈ സൂപ്പർ കിങ്സ് പരാജയപ്പെട്ടത് 18 റൺസിനും.

Also Read: രാജസ്ഥാൻ റോയൽസ് കാത്തിരുന്ന കാര്യങ്ങൾ നടന്നു, സഞ്ജു സാംസണിന്റെ ടീം ഇനി ഡബിൾ സ്ട്രോങ്ങ്; അടുത്ത കളിക്ക് രണ്ടും കൽപ്പിച്ച്

2025 സീസൺ ഇന്ത്യൻ പ്രീമിയർ ലീഗിൽ ചെന്നൈ സൂപ്പർ കിങ്സിന്റെ തുടർച്ചയായ നാലാമത്തെ പരാജയമാണിത്. ടൂർണമെന്റിന്റെ ഉദ്ഘാടന മത്സരത്തിൽ റോയൽ ചലഞ്ചേഴ്സ് ബംഗളൂരുവിനെ തകർത്തു തുടങ്ങിയ ചെന്നൈ പിന്നീട് കളിച്ച നാല് മത്സരങ്ങളിലും തോറ്റു. അഞ്ച് കളികളിൽ ആകെ 2 പോയിന്റ് മാത്രമുള്ള സി എസ്‌ കെ ലീഗ് ടേബിളിൽ ഒ‌ൻപതാം സ്ഥാനത്താണ്. വെള്ളിയാഴ്ച കൊൽക്കത്ത നൈറ്റ് റൈഡേഴ്സി‌ന് എതിരെയാണ് അവരുടെ അടുത്ത പോരാട്ടം.