ഡെൽഹി ക്യാപിറ്റൽസിന് ഹാപ്പി ന്യൂസ്; രണ്ട് വിദേശ താരങ്ങളുടെ കാര്യത്തിൽ സുപ്രധാന അപ്ഡേറ്റ് പുറത്ത്, ടീമിന്റെ കരുത്തര് കൂടും

Curated by: ഗോകുൽ എസ്|Samayam Malayalam•16 May 2025, 7:26 pm

2025 സീസൺ ഇന്ത്യൻ പ്രീമിയർ ലീഗിൽ പ്ലേ ഓഫ് ലക്ഷ്യമിട്ട് രംഗത്തുള്ള പ്രധാന ടീമുകളിൽ ഒന്നാണ് ഡെൽഹി ക്യാപിറ്റൽസ്‌. നിലവിൽ 11 കളികളിൽ 13 പോയിന്റുമായി ലീഗിൽ അഞ്ചാം സ്ഥാനത്താണ് അവർ. ശേഷിക്കുന്ന കളികളിൽ രണ്ടെണ്ണത്തിൽ വിജയിക്കാനായാൽ അവർക്ക് പ്ലേ ഓഫിലേക്ക്‌ യോഗ്യത നേടാൻ സാധിക്കുമെന്നാണ് കരുതപ്പെടുന്നത്.ഇന്ത്യ - പാക് സംഘർഷങ്ങളുടെ പശ്ചാത്തലത്തിൽ നിർത്തിവെച്ചിരിക്കുന്ന ഐപിഎൽ 2025 ശനിയാഴ്ച പുനരാരംഭിക്കാൻ ഇരിക്കുകയാണ്. എന്നാൽ ഏതാനും വിദേശ താരങ്ങളുടെ സേവനം ഈ സീസണിൽ ടീമുകൾക്ക് ലഭിക്കില്ല. അത്തരത്തിൽ പണി കിട്ടുമെന്ന് കരുതപ്പെട്ടിരുന്ന ടീമുകളിൽ ഒന്നാണ് ഡെൽഹി ക്യാപിറ്റൽസ്. ഐപിഎൽ നിർത്തിവെച്ച പശ്ചാത്തലത്തിൽ നാട്ടിലേക്ക് മടങ്ങിയ ദക്ഷിണാഫ്രിക്കൻ സൂപ്പർ താരം ഫാഫ് ഡു പ്ലെസിസ് ശേഷിക്കുന്ന മത്സരങ്ങൾക്കായി മടങ്ങിയെത്തില്ല എന്നായിരുന്നു നേരത്തെ റിപ്പോർട്ടുകൾ‌. ഡെൽഹിക്ക് വലിയ ആശങ്ക സമ്മാനിക്കുന്ന റിപ്പോർട്ടുകളായിരുന്നു ഇത്‌‌.


ഇപ്പോളിതാ ഐപിഎല്ലിലെ ശേഷിക്കുന്ന മത്സരങ്ങൾ കളിക്കാൻ ഡു പ്ലെസിസ് തീരുമാനിച്ചെന്നും ഇക്കാര്യം അദ്ദേഹം ഫ്രാഞ്ചൈസിയെ അറിയിച്ചെന്നും റിപ്പോർട്ട് വന്നിരിക്കുന്നു. ഡുപ്ലെസിസ് അവസാന ഘട്ടത്തിൽ കളിക്കുമെന്ന വാർത്ത ഡെൽഹിക്ക് സമ്മാനിക്കുന്ന ആശ്വാസം ചെറുതല്ല. നിലവിൽ ഡെൽഹി ടീമിന്റെ പ്രധാന സീനിയർ താരവും നേതൃത്വ നിരയിലുമുള്ള കളിക്കാരനുമാണ് ഡു പ്ലെസിസ്.

ആദ്യ നാലിലെത്താൻ നിർണായകമാറ്റവുമായി ഡൽഹി ക്യാപിറ്റൽസ്; ഓസ്‌ട്രേലിയൻ സ്റ്റാർ പേസറിന് പകരം ടീമിലെത്തുന്നത് ബംഗ്ലാദേശ് താരം
നേരത്തെ ഓസ്ട്രേലിയൻ താരം ജേക് ഫ്രേസർ മക്ഗർകിന് പകരക്കാരനായി ബംഗ്ലാദേശ് പേസർ മുസ്താഫിസുർ റഹ്മാനെ ഡെൽഹി സൈൻ ചെയ്തിരുന്നു‌. എന്നാൽ ബംഗ്ലാദേശ് ടീമിനൊപ്പം മത്സരങ്ങൾ ഉള്ളതിനാൽ അദ്ദേഹം മത്സരങ്ങൾക്ക് ലഭ്യമാകുന്ന കാര്യം സംശയമായിരുന്നു. ഇപ്പോളിതാ ഐപിഎൽ കളിക്കാനുള്ള ക്ലിയറൻസ് താരത്തിന്‌ ലഭിച്ചെന്ന് വ്യക്തമായിരിക്കുന്നു. ഇ എസ്‌ എപി എൻ ക്രിക്കിൻഫോ ആണ് ഈ വിവരം പുറത്തുവിട്ടത്. എന്നാൽ ഗ്രൂപ്പ് ഘട്ടത്തിലെ കളികൾക്ക് മാത്രമാകും അദ്ദേഹം ലഭ്യമാവുക.

പഞ്ചാബ് കിങ്‌സും ഡല്‍ഹി ക്യാപിറ്റല്‍സും തമ്മിലുള്ള ഐപിഎല്‍ മാച്ച് പാതിവഴിയില്‍ റദ്ദാക്കി
മൂന്ന് മത്സരങ്ങളാണ് ഐപിഎല്ലിൽ ഇനി ഡെൽഹി ക്യാപിറ്റൽസിന് ശേഷിക്കുന്നത്. ഈ മാസം 18 ന് ഗുജറാത്ത് ടൈറ്റൻസിന്‌ എതിരെയാണ് ഇതിൽ ആദ്യ കളി. 21 ന് മുംബൈ ഇന്ത്യൻസിന് എതിരെയും, 24 ന് പഞ്ചാബ് കിങ്സിന് എതിരെയുമാണ് ശേഷിക്കുന്ന മത്സരങ്ങൾ. ഇതിൽ നിന്ന് കുറഞ്ഞത് നാല് പോയിന്റെങ്കിലും നേടാനായാൽ ടീമിന് ഇത്തവണ പ്ലേ ഓഫ് കളിക്കാം.