തിലക് വർമയെ റിട്ടയേഡ് ഔട്ടാക്കാൻ തീരുമാനിച്ചതിന് പിന്നിൽ ഈ കാരണം; അവസാനം വെളിപ്പെടുത്തി മുംബൈ ഇന്ത്യൻസ് പരിശീലക‌ൻ

Curated byഗോകുൽ എസ് | Samayam Malayalam | Updated: 5 Apr 2025, 11:50 am

Samayam Malayalamതിലക് വർമ

ഐപിഎല്ലിൽ ഇന്നലെ നടന്ന മത്സരത്തിൽ തിലക് വർമ റിട്ടയേഡ് ഔട്ടായതാ‌ണ് ഇപ്പോൾ ഇന്ത്യൻ ക്രിക്കറ്റിലെ ഏറ്റവും വലിയ സംസാര വിഷയം. ലക്നൗ സൂപ്പർ ജയന്റ്സിന് എതിരായ കളിയിൽ ബാറ്റ് ചെയ്യാൻ വിഷമിക്കുന്നതിനിടെയാണ് തിലക് വർമയെ റിട്ടയേഡ് ഔട്ടാക്കാൻ മുംബൈ ഇന്ത്യൻസ് തീരുമാനിച്ചത്. ഇത് ക്രിക്കറ്റ് ലോകത്തെ ശരിക്കും അമ്പരപ്പിച്ചു. 23 പന്തിൽ 25 റൺസെടുത്ത് നിൽക്കവെയായിരുന്നു തിലക് വർമ റിട്ടയേഡ് ഔട്ടാകുന്നത്. തിലക് പുറത്തായെങ്കിലും മത്സരം ജയിക്കാൻ മുംബൈ ഇന്ത്യൻസിന് കഴിഞ്ഞില്ല എന്നതും ശ്രദ്ധേയം.അതേ സമയം മത്സരശേഷം സംസാരിക്കവെ തിലക് വർമയെ റിട്ടയേഡ് ഔട്ടാക്കാനുള്ള മുംബൈ ഇന്ത്യൻസിന്റെ തീരുമാനം ടീം പരിശീലകൻ മഹേല ജയവർധനെ വിശദീകരിച്ചു. കാര്യങ്ങൾ മുബൈയുടെ വഴിക്ക് വരാതിരുന്നതോടെ ഒരു പുതിയ ബാറ്ററെ ക്രീസിൽ വേണമായിരുന്നുവെന്നും അതിനാലാണ് തിലകിനെ റിട്ടയേഡ് ഔട്ടാക്കാൻ തീരുമാനിച്ചതെന്നും സൂചിപ്പിച്ച ജയവർധനെ, ഇത് തികച്ചും ത‌ന്ത്രപരമായ ഒരു നീക്കമായിരുന്നുവെന്നും കൂട്ടിച്ചേർത്തു.


റൺസ് നേടാൻ തിലക് ശ്രമിച്ചുകൊണ്ടിരുന്നുവെങ്കിലും അതിന് അദ്ദേഹത്തിന് സാധിച്ചില്ലെന്ന് ചൂണ്ടിക്കാട്ടിയ മുംബൈ കോച്ച്, കുറച്ച് സമയം ക്രീസിൽ ചിലവഴിച്ചതിനാൽ അദ്ദേഹം ഫോമിലേക്ക് വരുമെന്ന് പ്രതീക്ഷിച്ച് അവസാന ഓവറുകൾ വരെ ത‌ങ്ങൾ കാത്തിരുന്നുവെന്നും എന്നാൽ അദ്ദേഹം പതറുകയായിരുന്നുവെന്നും പറഞ്ഞു.

Also Read: ഹാർദിക് പാണ്ഡ്യയുടെ ആ നീക്കം മുംബൈ ഇന്ത്യൻസ് ഉടമയേയും കലിപ്പിലാക്കി; ത്രില്ലർ പോരിനിടെ നടന്നത് ഇങ്ങനെ

"ഇത്തരത്തിൽ ഒരാളെ പുറത്താക്കുന്നത് അത്ര നല്ലതല്ല, എന്നാൽ ആ സമയം ഞങ്ങൾക്ക് പുതിയൊരാളെ വേണ്ടിയിരുന്നു. തികച്ചും തന്ത്രപരമായ ഒരു തീരുമാനമായിരുന്നു അത്. ഞങ്ങൾ ഒരാളെ പുറത്താക്കി മറ്റൊരാളെ കൊണ്ടുവന്നു. അതിൽ അധികം വായിക്കാനില്ല, കളി അടിസ്ഥാനമാക്കിയുള്ള തന്ത്രപരമായ ഒരു തീരുമാനം മാത്രമായിരുന്നു അത്." ജയവർധനെ പറഞ്ഞു.

Also Read: മോശം ഫോമിൽ റിട്ടയേഡ് ഔട്ടായി തിലക് വർമ, ഐപിഎല്ലിൽ നാടകീയ രംഗങ്ങൾ; എന്നിട്ടും ടീമിന് തോൽവി, ലക്നൗവിന് ആവേശ‌ ജയം

അതേ സമയം തിലക് വർമയെ റിട്ടയേഡ് ഔട്ടാക്കി പുതിയ ബാറ്ററെ ഇറക്കിയ മുംബൈയുടെ തന്ത്രത്തിനും അവരെ വിജയത്തിൽ എത്തിക്കാനായില്ല. ലക്നൗ സൂപ്പർ ജയന്റ്സിന് എതിരെ 12 റൺസിന്റെ പരാജയമായിരുന്നു മുംബൈ ഇന്ത്യൻസ് നേരിട്ടത്. മത്സരത്തിൽ ആദ്യം ബാറ്റ് ചെയ്ത ലക്നൗ 20 ഓവറുകളിൽ 203/8 എന്ന സ്കോർ നേടിയപ്പോൾ, മുംബൈയുടെ മറുപടി 191/5 ൽ ഒതുങ്ങി.