തുടക്കത്തിൽ നിന്നും ബെത്‌ലഹേമിലേക് , മൂന്ന് ചിത്രങ്ങൾ, 300 കോടി — തിയേറ്ററുകൾ കീഴടക്കി മലയാള സിനിമ

ഓണച്ചന്തയിൽ പോയാൽ പൂവും പച്ചക്കറിയും തൊട്ട് പായസക്കൂട്ട് വരെ ഒരൊറ്റക്കുടക്കീഴിൽ കിട്ടുമല്ലോ. കൃത്യം അതേ വൈബിലായിരുന്നു കഴിഞ്ഞ ആഗസ്റ്റിൽ നമ്മുടെ തിയേറ്ററുകൾ! തിയേറ്ററുകൾ ഒരു 'ഓണച്ചന്ത'യായി മാറിയപ്പോൾ, പ്രേക്ഷകർക്ക് മുന്നിൽ ചോയ്‌സുകളുടെ പൂരം തന്നെയായിരുന്നു. ആക്ഷൻ വേണോ, മാസും പവറും വേണോ, അതോ കുടുംബത്തോടൊപ്പം ചിരിച്ച് ആസ്വദിക്കാനുള്ള ഫാമിലി പടം വേണോ? എല്ലാം ഉണ്ടായിരുന്നു ആ തിയേറ്റർ ചന്തയിൽ. റിലീസ് ചെയ്ത മൂന്ന് പ്രധാന ചിത്രങ്ങളും ചേർന്ന് വാരിക്കൂട്ടിയത് ഞെട്ടിക്കുന്ന 300 കോടി രൂപയാണ്!

ഈ സിനിമാച്ചന്തയിലെ ആദ്യത്തെ കട തുറന്നത് വിസ്മയ മോഹൻലാലാണ്. ആഗസ്റ്റ് 7-ന് എത്തിയ 'തുടക്കം' ഓണത്തിന് മുന്നേ തന്നെ തിയേറ്ററുകളിൽ ആവേശത്തിരി കൊളുത്തി. ഒരു മികച്ച മിസ്റ്ററി-ഡ്രാമ അനുഭവം സമ്മാനിച്ച ഈ ചിത്രം, അവധിക്കാലത്തിന് തൊട്ടുമുമ്പ് തന്നെ പ്രേക്ഷകരെ തിയേറ്ററുകളിലേക്ക് പിടിച്ചിരുത്തി. കേരളത്തിൽ നിന്ന് മാത്രം 25 കോടിയും ആഗോളതലത്തിൽ 45 കോടിയും വാരിയെടുത്താണ് ഈ ചിത്രം വിപണിക്ക് ശക്തമായ അടിത്തറയിട്ടത്.

വലിയൊരു സര്‍പ്രൈസുണ്ട്, അത് പുറത്തുവിട്ടാല്‍ വിവാദമാവും എന്ന് അനുമോളും ഭുവനേഷും; ദിവസങ്ങൾക്കുള്ളിൽ നിങ്ങളതറിയും
പിന്നീട് ആഗസ്റ്റ് 20-ന് ചന്തയിലെ ഏറ്റവും വലിയ വെടിക്കെട്ട് പൊട്ടി—'ഖലീഫ'. പൃഥ്വിരാജ് സുകുമാരനും മോഹൻലാലും ടൊവിനോ തോമസും ഒന്നിച്ചെത്തിയ ഈ മാസ്സ് ചിത്രത്തിനായി തിയേറ്ററുകളിൽ ആരാധകർ ആവേശത്തോടെയാണ് കാത്തുനിന്നത്. തിയേറ്ററുകളിൽ ഉത്സവഛായ പരത്തിയ ഈ മൾട്ടി-സ്റ്റാർ മാജിക്, ഹൈ-വോൾട്ടേജ് ആക്ഷൻ രംഗങ്ങളിലൂടെ പ്രേക്ഷകരെ കയ്യിലെടുത്തു. തിയേറ്ററുകളെ ഇളക്കിമറിച്ച ഈ ചിത്രം ചുരുങ്ങിയ ദിവസങ്ങൾക്കുള്ളിൽ 46 കോടി രൂപയാണ് ബോക്സ് ഓഫീസിൽ നിന്ന് തൂത്തുവാരിയത്.

എന്നാൽ ഈ ഓണച്ചന്തയുടെ ഹൈലൈറ്റും ഏറ്റവും വലിയ മധുരവുമുള്ള 'പായസം' എത്തിയത് തൊട്ടടുത്ത ദിവസമാണ്. ആഗസ്റ്റ് 21-ന് എത്തിയ നിവിൻ പോളിയുടെ 'ബെത്‌ലഹേം കുടുംബ യൂണിറ്റ്' ബോക്സ് ഓഫീസിനെ അക്ഷരാർത്ഥത്തിൽ ഞെട്ടിച്ചു. സദ്യയും കഴിഞ്ഞ് കുടുംബസമേതം തിയേറ്ററിലേക്ക് ഒഴുകിയെത്തിയ മലയാളി പ്രേക്ഷകർ ഈ ഫാമിലി എന്റർടെയ്‌നറെ നെഞ്ചിലേറ്റിയപ്പോൾ കളക്ഷൻ കുതിച്ചുയർന്നത് 207 കോടി രൂപയിലേക്കാണ്!

തിയേറ്ററുകളിൽ ചിരിയും ചിന്തയും ഒരുപോലെ നിറച്ച ഈ ചിത്രം ആഗസ്റ്റിലെ സകല കളക്ഷൻ റെക്കോർഡുകളും തകർത്താണ് ഒന്നാമതെത്തിയത്.

മൂന്ന് ചിത്രങ്ങളും മൂന്ന് വ്യത്യസ്ത ജോണർ നിന്നായിരുന്നെങ്കിലും, തിയേറ്ററുകൾക്ക് മുന്നിലെ ക്യൂ ഒരിക്കൽപ്പോലും നേർത്തില്ല എന്നതാണ് ഈ ഓണക്കാലത്തിന്റെ ഏറ്റവും വലിയ പ്രത്യേകത. മൾട്ടിപ്ലക്സുകൾ മുതൽ ചെറിയ തിയേറ്ററുകൾ വരെ പ്രേക്ഷകരെക്കൊണ്ട് നിറഞ്ഞു. ഓൺലൈൻ ടിക്കറ്റ് ബുക്കിംഗ് പ്ലാറ്റ്‌ഫോമുകളിലും ഈ തിരക്ക് പ്രതിഫലിച്ചു, പല ഷോകളും ദിവസങ്ങൾക്ക് മുന്നേ തന്നെ ഹൗസ്ഫുള്ളായി. വിതരണക്കാർക്കും തിയേറ്റർ ഉടമകൾക്കും ഒരുപോലെ ലാഭം സമ്മാനിച്ച ഈ സീസൺ, മലയാള സിനിമാ വ്യവസായത്തിന്റെ വളർച്ചയ്ക്ക് പുതിയ ഊർജ്ജം പകർന്നു എന്ന് പ്രൊഡ്യൂസഴ്സ് വിലയിരുത്തുന്നു.

മത്സരമല്ല, മറിച്ച് വൈവിധ്യമാണ് ഈ ഓണക്കാലത്തെ വിജയമാക്കിയത്. എല്ലാതരം പ്രേക്ഷകർക്കും ഇഷ്ടപ്പെട്ട ചോയ്‌സുകൾ ലഭിച്ചപ്പോൾ തിയേറ്റർ വിപണിയുടെ അതിരുകൾ വലുതായി. ആരും തോൽക്കാതെ, എല്ലാവരും ജയിച്ച ഈ ഓണം മലയാള സിനിമയുടെ ചരിത്രത്തിലെ ഏറ്റവും തിളക്കമുള്ള സുവർണ്ണ അധ്യായമായി മാറിക്കഴിഞ്ഞു.