തോൽവിക്ക് പിന്നാലെ ഹാർദിക് പാണ്ഡ്യക്ക് മറ്റൊരു കനത്ത തിരിച്ചടി കൂടി, ആശിഷ് നെഹ്‌റക്കും പണി കിട്ടി; കാരണം ഇങ്ങനെ

Curated byഗോകുൽ എസ് | Samayam Malayalam | Updated: 7 May 2025, 2:19 pm

ഐപിഎല്ലിൽ ഇന്നലെ നടന്ന ആവേശപോരാട്ടത്തിൽ മുംബൈ ഇന്ത്യൻസ്, ഗുജറാത്ത് ടൈറ്റൻസിനോട് പരാജയപ്പെട്ടിരുന്നു‌. ആവേശം അവസാന പന്തിലേക്ക് നീ‌ണ്ട കളിയിലായിരുന്നു മുംബൈ വീണത്‌. ഈ പരാജയം ടീമിന്റെ പ്ലേ ഓഫ് പ്രതീക്ഷകൾക്കും കനത്ത തിരിച്ചടി നൽകുന്നതാണ്.മത്സരത്തിൽ നിരാശാജനകമായ പ്രകടനമായിരുന്നു മുംബൈ ഇന്ത്യൻസ് നായകൻ ഹാർദിക് പാണ്ഡ്യയുടേത്. ബാറ്റിങ്ങിലും ബൗളിങ്ങിലും താരം നിരാശപ്പെടുത്തി. കളിക്ക് ശേഷം മറ്റൊരു തിരിച്ചടിയും ഹാർദിക്കിന് നേരിടേണ്ടി വന്നു‌. ഓവർ നിരക്കിലെ വീഴ്ചയാണ് മുംബൈ ഇന്ത്യൻസ് നായകന് പണി കൊടുത്തത്.


ഈ സീസണിൽ ഇത് രണ്ടാമത്തെ മത്സരത്തിലാണ് മുംബൈ ഇന്ത്യൻസ് ഓവർ നിരക്കിൽ വീഴ്ച വരുത്തുന്നത്‌. ഇതേ തുടർന്ന് നായകൻ ഹാർദിക് പാണ്ഡ്യക്ക് 24 ലക്ഷം രൂപ ബിസിസിഐ പിഴ വിധിക്കുകയായിരുന്നു. ഇമ്പാക്ട് താരമടക്കം ഇന്നലെ കളിച്ച മറ്റ് മുംബൈ താരങ്ങൾക്ക് ആറ് ലക്ഷം രൂപയോ, മാച്ച് ഫീയുടെ 25% തുകയോ ഇതിനൊപ്പം പിഴ ഒടുക്കേണ്ടതായിട്ടുണ്ട്.

ഹാർദിക് പാണ്ഡ്യ എന്താണ് ഈ കാണിച്ചത്, ക്യാപ്റ്റനെ കൂവി മുംബൈ ഇന്ത്യൻസ് ആരാധകർ; വാംഖഡെയിൽ നടന്നത് ഇങ്ങനെ
ഗുജറാത്ത് ടൈറ്റൻസ് പരിശീലകൻ ആശിഷ് നെഹ്‌റക്ക് എതിരെയും ബിസിസിഐ നടപടി സ്വീകരിച്ചിട്ടുണ്ട്. ഐപിഎൽ പെരുമാറ്റ ചട്ടം ലംഘിച്ചതിന് ഒരു ഡീമെറിറ്റ് പോയിന്റും, മാച്ച് ഫീയുടെ 25% തുകയുമാണ് നെഹ്‌റക്ക് ബിസിസിഐ ശിക്ഷ വിധിച്ചത്. എന്നാൽ നെഹ്‌റക്ക് എതിരെ നടപടിയെടുത്തിന്റെ കൃത്യമായ കാരണം ബിസിസിഐ വ്യക്തമാക്കിയിട്ടില്ല. മഴ പല തവണ വില്ലനായ കളിക്കിടെ ഗ്രൗണ്ടിന് പുറത്ത് അസ്വസ്ഥനായിരുന്നു നെഹ്റ. ഓൺഫീൽഡ് അമ്പയർമാരുമായി അദ്ദേഹം കയർത്ത് സംസാരിക്കുന്നതും ഇന്നലെ കണ്ടിരുന്നു‌.

മുംബൈ ഇന്ത്യൻസിന് വേണ്ടി കളിച്ചത് 13 പേർ, കാരണം ആ ക്രിക്കറ്റ് നിയമം; നിർണായക മത്സരത്തിൽ പക്ഷേ ടീമിന് തോൽവി
അതേ സമയം മുംബൈ ഇന്ത്യൻസിന് എതിരെ നേടിയ ജയം ഐപിഎൽ പോയിന്റ് പട്ടികയിൽ ഗുജറാത്ത് ടൈറ്റൻസിനെ ഒന്നാം സ്ഥാനത്ത് എത്തിച്ചു. നിലവിൽ 11 കളികളിൽ 16 പോയിന്റാണ് ശുഭ്മാൻ ഗില്ലിനും സംഘത്തിനുമുള്ളത്. ഒരു കളിയിൽ കൂടി വിജയിക്കാനായാൽ ടീമിന് പ്ലേ ഓഫ് യോഗ്യത ഉറപ്പാക്കാം. മുംബൈ ഇന്ത്യൻസാകട്ടെ തോൽവിയോടെ നാലാം സ്ഥാനത്തേക്ക് വീണു. 12 കളികളിൽ 14 പോയിന്റാണ് അവർക്കുള്ളത്. റോയൽ ചലഞ്ചേഴ്സ് ബംഗളൂരു, പഞ്ചാബ് കിങ്സ് ടീമുകളാണ് ലീഗിൽ രണ്ടും മൂന്നും സ്ഥാനങ്ങളിൽ. ആർസിബിക്ക് 11 കളികളിൽ 16 പോയിന്റും, പഞ്ചാബ് കിങ്സിന് 11 കളികളിൽ 17 പോയിന്റുമാണുള്ളത്.