തോൽവിക്ക് ശേഷം അക്കാര്യം തുറന്ന് സമ്മതിച്ച് മുംബൈ ഇന്ത്യൻസ് പരിശീലകൻ; ടീമിന് ഇനി എല്ലാ മത്സരങ്ങളും പ്ലേ ഓഫെന്നും വിലയിരുത്തൽ

Curated byഗോകുൽ എസ് | Samayam Malayalam | Updated: 7 May 2025, 3:34 pm

2025 സീസൺ ഐപിഎല്ലിൽ ( IPL 2025 ) തുടർച്ചയായ ഏഴാം ജയം ലക്ഷ്യമിട്ട് ഇറങ്ങിയ മുംബൈ ഇന്ത്യൻസ്, ഇന്നലെ നടന്ന കളിയിൽ ഗുജറാത്ത് ടൈറ്റൻസിനോട് പരാജയപ്പെട്ടിരുന്നു. വാംഖഡെയിൽ നടന്ന കളിയിൽ മൂന്ന് വിക്കറ്റിന്റെ വിജയമായിരുന്നു ഗുജറാത്ത് സ്വന്തമാക്കിയത്. ജയത്തോടെ ടീമിന്റെ പ്ലേ ഓഫ് പ്രതീക്ഷകൾക്കും ചെറിയ തിരിച്ചടിയേറ്റിട്ടുണ്ട്.ആവേശം അവസാന പന്തിലേക്ക് നീണ്ട മത്സരത്തിലായിരുന്നു മുംബൈ ഇന്ത്യൻസ്, ഇന്നലെ ഗുജറാത്ത് ടൈറ്റൻസിനോട് തോറ്റത്. കളിക്ക് ശേഷം സംസാരിക്കവെ വളരെയധികം നിരാശനായി കാണപ്പെട്ട മുംബൈ ഇന്ത്യൻസ് പരിശീലകൻ മഹേല ജയവർധനെ, തന്റെ ടീം ഒട്ടേറെ തെറ്റുകൾ വരുത്തിയെന്ന് തുറന്ന് സമ്മതിക്കുകയും ചെയ്തു. ഗുജറാത്തിന് എതിരായ കളിയിൽ നിയന്ത്രണം കൈവശമുണ്ടായിരുന്നിട്ടും തങ്ങൾ പരാജയപ്പെട്ടെന്ന് പറഞ്ഞ മുംബൈ കോച്ച്, ഇനിയുള്ള എല്ലാ മത്സരങ്ങളും പ്ലേ ഓഫായിട്ടാണ് തങ്ങൾ കണക്കാക്കുകയെന്നും വ്യക്തമാക്കി.


ഇരുടീമുകളും ഈ മത്സരത്തിൽ നിരവധി തെറ്റുകൾ വരുത്തിയെന്ന് ചൂണ്ടിക്കാട്ടിയ മഹേല ജയവർധനെ, മുംബൈ, ഗുജറാത്തിനേക്കാൾ തെറ്റുകൾ വരുത്തിയെന്നാണ് പറയുന്നത്‌. ഗുജറാത്തിന് എതിരായ മത്സരത്തിൽ 30 റൺസ് കുറവാണ് തങ്ങൾ നേടിയതെന്ന് പറഞ്ഞ ജയവർധനെ, എന്നാൽ നന്നായി ബൗൾ ചെയ്യാനും അവസരങ്ങൾ സൃഷ്ടിക്കാനും തന്റെ ടീമിനായെന്നും ചൂണ്ടിക്കാട്ടി‌.

ഹാർദിക് പാണ്ഡ്യ എന്താണ് ഈ കാണിച്ചത്, ക്യാപ്റ്റനെ കൂവി മുംബൈ ഇന്ത്യൻസ് ആരാധകർ; വാംഖഡെയിൽ നടന്നത് ഇങ്ങനെ
"ഈ വിക്കറ്റിൽ ഞങ്ങൾക്ക് 30 റൺസ് കുറവായിരുന്നു‌‌‌. ടീം നന്നായി പന്തെറിഞ്ഞു, ധാരാളം അവസരങ്ങൾ സൃഷ്ടിച്ചു. നന്നായി ഫീൽഡ് ചെയ്തു. എല്ലാത്തി‌നും ഉപരി നന്നായി പോരാടി‌, അത് നല്ലൊരു സൂചനയാണ്. ഇനി എല്ലാ മത്സരങ്ങളെയും പ്ലേ ഓഫ് മത്സരമായി ഞങ്ങൾ കണക്കാക്കും." മഹേല ജയവർധനെ പറഞ്ഞു.

മഴയ്ക്കും തോല്‍പ്പിക്കാനാവാത്ത പോരാട്ട വീര്യം, മുംബൈക്കെതിരേ അവസാന പന്തില്‍ വിജയം; ഗുജറാത്ത് ടൈറ്റന്‍സ് വീണ്ടും ഒന്നാമത്
അതേ സമയം നിലവിൽ ഗുജറാത്ത് ടൈറ്റൻസാണ് ഐപിഎൽ പോയിന്റ് പട്ടികയിൽ ഒന്നാം സ്ഥാനത്ത്‌. 11 കളികളിൽ 16 പോയിന്റാണ് ടീമിന്റെ സമ്പാദ്യം. 11 കളികളിൽ 16 പോയിന്റുള്ള റോയൽ ചലഞ്ചേഴ്സ് ബംഗളൂരുവാണ് രണ്ടാമത്. പഞ്ചാബ് കിങ്സ് 13 പോയിന്റുമായി മൂന്നാമതും, മുംബൈ ഇന്ത്യൻസ് 14 പോയിന്റുമായി നാലാമതുമുണ്ട്. ഇനി രണ്ട് മത്സരങ്ങളാണ് മുംബൈക്ക് ബാക്കിയുള്ളത്. ഈ മാസം 11 ന് പഞ്ചാബ് കിങ്സിന് എതിരെയും ഈ മാസം 15 ന് ഡെൽഹി ക്യാപിറ്റൽസിന് എതിരെയുമാണ് ടീമിന്റെ മത്സരം.