തോൽവിക്ക് ശേഷം അക്കാര്യം തുറന്ന് സമ്മതിച്ച് ഹാർദിക് പാണ്ഡ്യ; മുംബൈ ഇന്ത്യൻസിന്റെ കളി ഇനി എലിമിനേറ്ററിൽ

Curated by: ഗോകുൽ എസ്|Samayam Malayalam•27 May 2025, 2:32 pm

2025 സീസൺ ഐപിഎല്ലിൽ തങ്ങളുടെ അവസാന ലീഗ് മത്സരത്തിൽ പഞ്ചാബ് കിങ്സിനോട്, മുംബൈ ഇന്ത്യൻസ് പരാജയപ്പെട്ടിരുന്നു. ജയ്പൂരിൽ നടന്ന കളിയിൽ ഏഴ് വിക്കറ്റിനാണ് പഞ്ചാബ് കിങ്സ്, മുംബൈയെ വീഴ്ത്തിയത്. ജയിച്ചിരുന്നെങ്കിൽ ടോപ് 2 ഫിനിഷ് ഉറപ്പാക്കാമായിരുന്ന മുംബൈ ഇന്ത്യൻസ്, തോൽവിയോടെ നാലാം സ്ഥാനത്ത് ലീഗ് ഘട്ടം അവസാനിപ്പിച്ചു. ഇതോടെ പ്ലേ ഓഫ് എലിമിനേറ്ററിലേക്കാണ് അവർ എത്തുന്നത്.നേരത്തെ മത്സരത്തിൽ ആദ്യം ബാറ്റ് ചെയ്ത കളിയിൽ 184/7 എന്ന സ്കോറായിരു‌ന്നു മുംബൈ ഇന്ത്യൻസ് നേടിയത്. പഞ്ചാബ് കിങ്സാകട്ടെ ഒൻപത് പന്തുകൾ ബാക്കി നിൽക്കെ വിജയം നേടുകയും ചെയ്തു. തോൽവിക്ക് ശേഷം സംസാരിക്കവെ 20 റൺസ് കുറവായിരുന്നു മുംബൈ ഇന്ത്യൻസ് നേടിയതെന്ന് ചൂണ്ടിക്കാട്ടിയ ഹാർദിക് പാണ്ഡ്യ, മുംബൈ ഇന്ത്യൻസിന് ഏറ്റവും മികച്ച പ്രകടനം കാഴ്ച വെക്കാൻ സാധിക്കാതെ പോയെന്നും തുറന്ന്‌ സമ്മതിച്ചു.


"വിക്കറ്റിന്റെ സ്വഭാവം വെച്ചുനോക്കിയാൽ ഞങ്ങൾക്ക് തീർച്ചയായും 20 റൺസ് കുറവായിരുന്നു. അത് സംഭവിക്കും, ഞങ്ങൾ നല്ല ക്രിക്കറ്റ് കളിക്കുന്നുണ്ടായിരുന്നു, എന്നാൽ ഞങ്ങൾക്ക് മികച്ച ക്രിക്കറ്റ് കളിക്കാൻ സാധിക്കാത്ത ദിവസങ്ങളിൽ ഒന്നായിരുന്നു ഇത്. ഇത് ഞങ്ങൾക്ക് വലിയ നഷ്ടം സമ്മാനിച്ചു. ഐപിഎൽ അങ്ങനെയാണ്."

" മെസേജ് വളരെ ലളിതമാണ്, ഇതൊരു ചെറിയ പിഴവ് മാത്രമായിരുന്നു. ഇതിൽ നിന്ന് പഠിക്കുക, നോക്കൗട്ടിലേക്ക് പോവുക.‌ ബാറ്റിങ് യൂണിറ്റെന്ന നിലയിൽ ഞങ്ങൾക്ക് തീർച്ചയായും, 20 റൺസ് ഇന്ന് കുറവായിരുന്നു." ഹാർദിക് പാണ്ഡ്യ ചൂണ്ടിക്കാട്ടി.

Also Read: 15 വർഷം പഴക്കമുള്ള സച്ചിന്റെ റെക്കോഡ് തകർന്നു. സൂര്യകുമാർ യാദവ് വേറെ ലെവൽ. സ്വന്തമാക്കിയത് കിടിലൻ നേട്ടം.

അതേ സമയം ഇന്നലെ ജയിച്ചിരുന്നെ‌ങ്കിൽ പോയിന്റ് പട്ടികയിലെ ആദ്യ സ്ഥാനങ്ങളിലൊന്ന് ഉറപ്പാക്കാൻ മുംബൈ ഇന്ത്യൻസിന് സാധിക്കുമായിരുന്നു. ഇത് ഫൈനലിൽ എത്താൻ രണ്ട് അവസരങ്ങളും അവർക്ക് നൽകുമായിരുന്നു. എന്നാൽ തോൽവി അവരെ എലിമിനേറ്ററിലേക്കാണ് എത്തിച്ചത്. ഇതോടെ ഫൈനലിൽ എത്താൻ പ്ലേ ഓഫിൽ രണ്ട് മത്സരങ്ങൾ ( എലിമിനേറ്റർ + ക്വാളിഫയർ 2 ) ജയിക്കേണ്ട അവസ്ഥയിലേക്ക് അവർ എത്തി.

Also Read: നിർണായക മത്സരത്തിന് ശേഷം മുംബൈ ഇന്ത്യൻസിന് തിരിച്ചടി. പഞ്ചാബ് കിങ്സിന് കോളടിച്ചത് ഇങ്ങനെ

മെയ് 30 നാണ് എലിമിനേറ്റർ പോരാട്ടം നടക്കുക. ഗുജറാത്ത് ടൈറ്റൻസോ, റോയൽ ചലഞ്ചേഴ്സ് ബംഗളൂരുവോ ആകും ഈ കളിയിൽ മുംബൈ ഇന്ത്യൻസിന്റെ എതിരാളികൾ. ഇന്നത്തെ ആർസിബി ‌- ലക്നൗ പോരാട്ടത്തി‌ന് ശേഷം ഇക്കാര്യത്തിൽ വ്യക്തത വരും. ഇന്ന് ആർസിബി ജയിക്കുകയാണെങ്കിൽ അവർക്ക് ടോപ് 2 ഫിനിഷ് ഉറപ്പാകും. ഇതോടെ ഗുജറാത്താകും എലിമിനേറ്ററിലേക്ക് വരുക, മറിച്ച് ആർസിബി ഇന്ന് തോറ്റാൽ എലിമിനേറ്ററിൽ മുംബൈ - ബംഗളൂരു പോരാട്ടം നടക്കും.