തോൽവിയിലും സഞ്ജുവിന്റെ രാജസ്ഥാൻ റോയൽസിനെ ഹാപ്പിയാക്കി അക്കാര്യം; ടീമിന്റെ പോസിറ്റീവ് ഇങ്ങനെ

Curated byഗോകുൽ എസ് | Samayam Malayalam | Updated: 24 Mar 2025, 1:38 am

Samayam Malayalamരാജസ്ഥാൻ റോയൽസ്

2025 സീസൺ ഇന്ത്യൻ പ്രീമിയർ ലീഗിലെ ആദ്യ കളിയിൽ കനത്ത പരാജയമാണ് രാജസ്ഥാൻ റോയൽസ് ഏറ്റുവാങ്ങിയത്. സൺ റൈസേഴ്സ് ഹൈദരാബാദിന് എതിരെ നടന്ന മത്സരത്തിൽ 44 റൺസിനാണ് റോയൽസ് തോറ്റത്. ഹൈദരാബാദിൽ നടന്ന കളിയിൽ ആദ്യം ബാറ്റ് ചെയ്ത സൺ റൈസേഴ്സ് നിശ്ചിത 20 ഓവറിൽ 286/6 എന്ന പടുകൂറ്റൻ സ്കോർ നേടിയപ്പോൾ, റോയൽസിന്റെ മറുപടി 242/6 ൽ അവസാനിച്ചു. ആദ്യ കളിയിൽ ഇതുപോലൊരു കനത്ത പരാജയം നേരിടേണ്ടി വന്നത് രാജസ്ഥാ‌ൻ റോയൽസിന് സമ്മാനിക്കുന്ന നിരാശ ചെറുതല്ല. പ്രത്യേകിച്ച് രാജസ്ഥാന്റെ ബൗളർമാർ ഇത്രക്ക് ദയനീയ പ്രകടനം കാഴ്ച വെച്ചതിൽ ആരാധകർ ശരിക്കും അസ്വസ്ഥരാണ്. അതേ സമയം കനത്ത തോൽവിയിലും സഞ്ജുവിന്റെ റോയൽസിന് ആശ്വാസം നൽകുന്നത് അവരുടെ ബാറ്റിങ് നിരയുടെ പോരാട്ട വീര്യമാണ്. 287 റൺസ് വിജയലക്ഷ്യം പിന്തുടർന്ന കളിയിൽ 242 വരെ എത്താനായത് വരും കളികൾക്ക് മുൻപ് അവർക്ക് നൽകുന്ന ആശ്വാസം ചെറുതല്ല. വരും കളികളിൽ ബൗളർമാരും കൂടി ഫോമിലേക്ക് മടങ്ങിയെത്തിയാൽ രാജസ്ഥാൻ റോയൽസ് വിജയവഴിയിലേക്ക് ശക്തമായി തിരിച്ചെത്തുമെന്ന കാര്യം ഉറപ്പ്. ചുരുക്കിപ്പറഞ്ഞാൽ ആദ്യ കളിയിൽ റോയൽസിന്റെ ഏറ്റവും വലിയ പോസിറ്റീവ് ഈ ബാറ്റിങ് പ്രകടനം തന്നെയാണ്.

സഞ്ജു സാംസണാണ് സൺ റൈസേഴ്സ് ഹൈദരാബാദിന് എതിരെ രാജസ്ഥാൻ റോയൽസിന്റെ വെടിക്കെട്ട് തുടങ്ങിവെച്ചത്. ഓപ്പണിങ്ങ് ബാറ്റിങ്ങിന് ഇറങ്ങിയ സഞ്ജു വെറും 37 പന്തുകളിൽ നിന്ന് 66 റൺസാണ് അടിച്ചുകൂട്ടിയത്. ഏഴ് ഫോറുകളും നാല് സിക്സറുകളും അടങ്ങുന്നതായിരുന്നു താരത്തിന്റെ ഇന്നിങ്സ്. പതിനാലാമത്തെ ഓവറിൽ സഞ്ജു പുറത്താകുമ്പോൾ രാജസ്ഥാന്റെ സ്കോർ ബോർഡിൽ 161 റൺസ് ഉണ്ടായിരുന്നു.

സഞ്ജുവും ജുറലും പൊരുതിയിട്ടും രക്ഷയില്ല; രാജസ്ഥാന്‍ റോയല്‍സിന് ഐപിഎല്‍ 2025 ആദ്യ മാച്ചില്‍ 44 റണ്‍സ് തോല്‍വി
വിക്കറ്റ് കീപ്പർ ബാറ്റർ ധ്രുവ് ജൂറലാണ് ആദ്യ കളിയിൽ രാജസ്ഥാൻ റോയൽസിന്റെ ഏറ്റവും മികച്ച ബാറ്ററായത്. അഞ്ചാം നമ്പരിൽ ക്രീസിലെത്തിയ താരം വെറും 35 പന്തുകളിൽ നിന്ന് 70 റൺസാണ് നേടിയത്. അഞ്ച് ഫോറുകളും ആറ് സിക്സറുകളും താരത്തിന്റെ ബാറ്റിൽ നിന്ന് പിറന്നു. ഇത്തവണത്തെ ഐപിഎൽ മെഗാ ലേലത്തിന് മുൻപ് ജൂറലിനെ 14 കോടി രൂപക്ക് ടീമിൽ നിലനിർത്താനുള്ള രാജസ്ഥാന്റെ തീരുമാനത്തിൽ ക്രിക്കറ്റ് വിദഗ്ദർ അടക്കം നെറ്റി ചുളിപ്പിച്ചിരുന്നു. അവർക്കുള്ള മറുപടി കൂടിയാണ് ആദ്യ കളിയിലെ താരത്തിന്റെ പ്രകടനം.
‌
രാജസ്ഥാൻ റോയൽസ് ബാറ്റിങ് നിരയിലെ ഏക വിദേശ താരമായ ഷിംറോൺ ഹെറ്റ്മെയറും ആദ്യ കളിയിൽ ബാറ്റിങ് വെടിക്കെട്ട് നടത്തി. 23 പന്തുകളിൽ 42 റൺസായിരുന്നു താരത്തിന്റെ സമ്പാദ്യം. ഒരു ഫോറും നാല് സിക്സറുകളും അദ്ദേഹത്തിന്റെ ബാറ്റിൽ നിന്ന് പിറന്നു. ശുഭം ദുബെയും ഹൈദരാബാദിന് എതിരായ മത്സരത്തിൽ ബാറ്റിങ് വെടിക്കെട്ട് നടത്തി. വെറും 11 പന്തിൽ 34 റൺസെടുത്ത് അദ്ദേഹം പുറത്താകാതെ നിന്നു. ഒരു ഫോറും നാല് സിക്സറുകളുമാണ് താരത്തിന്റെ ബാറ്റിൽ നിന്ന് പിറന്നത്.

രാജസ്ഥാന്‍ റോയല്‍സിനെ പഞ്ഞിക്കിട്ട് ഇഷാന്‍ കിഷനും ട്രാവിസ് ഹെഡ്ഡും; ഇഷാന് സെഞ്ചുറി, എസ്ആര്‍എച്ചിന് റെക്കോഡ് ടോട്ടല്‍
ആദ്യ കളിയിലെ കനത്ത പരാജയത്തിനിടെയും രാജസ്ഥാൻ റോയൽസിന്റെ പോസിറ്റീവാണ് ഈ ബാറ്റിങ് പ്രകടനങ്ങൾ. വരും മത്സരങ്ങളിൽ റിയാൻ പരാഗ്, യശസ്വി ജയ്സ്വാൾ, നിതീഷ് റാണ എന്നിവർ കൂടി ഫോമിലെത്തിയാൽ ഐപിഎല്ലിലെ തന്നെ ഏറ്റവും ശക്തമായ ബാറ്റിങ് നിരയുള്ള ടീമായി റോയൽസ് മാറും. തോൽവിയോടെ തുടങ്ങിയ രാജസ്ഥാൻ റോയൽസിന്റെ അടുത്ത മത്സരം ഈ മാസം 26 നാണ്. നിലവിലെ ചാമ്പ്യന്മാരായ കൊൽക്കത്ത നൈറ്റ് റൈഡേഴ്സാണ് ഈ കളിയിൽ ടീമിന്റെ എതിരാളികൾ.