ദുരന്തത്തിൽ ഞെട്ടൽ രേഖപ്പെടുത്തി രോഹിതും കോലിയും, ഒരുമിച്ചു നിൽക്കേണ്ട സമയമെന്ന് റെയ്ന; ഉള്ളുലഞ്ഞ് കായിക ലോകം

മുംബൈ∙ അഹമ്മദാബാദ് വിമാന അപകടത്തിൽ അനുശോചനം രേഖപ്പെടുത്തി ഇന്ത്യൻ ക്യാപ്റ്റൻ രോഹിത് ശർമയും സൂപ്പർ താരം വിരാട് കോലിയും. ദുരന്തത്തിൽ ജീവൻ നഷ്ടപ്പെട്ടവർക്കു വേണ്ടിയും അവരുടെ കുടുംബങ്ങൾക്കു വേണ്ടിയും പ്രാർഥിക്കുന്നതായി രോഹിത് ശർമ ഇൻസ്റ്റഗ്രാമിൽ കുറിച്ചു.

അഹമ്മദാബാദിൽ വിമാനം അപകടത്തിൽ പെട്ടതറിഞ്ഞ് ഞെട്ടിപ്പോയതായി വിരാട് കോലിയും പ്രതികരിച്ചു.‘‘ദുരന്തത്തിൽ ഇരയായവർക്കും അവരുടെ കുടുംബങ്ങൾക്കും വേണ്ടി പ്രാർഥിക്കേണ്ട സമയമാണിത്.’’– വിരാട് കോലി ഇൻസ്റ്റയിൽ കുറിച്ചു. ഒരുമിച്ചു നിൽക്കേണ്ട സമയമാണിതെന്ന് മുൻ ഇന്ത്യൻ താരം സുരേഷ് റെയ്നയും പ്രതികരിച്ചു.

അഹമ്മദാബാദിലെ സർദാർ വല്ലഭ്ഭായ് പട്ടേൽ വിമാനത്താവളത്തിൽനിന്നു ലണ്ടനിലേക്കു പോകുകയായിരുന്ന എയർ ഇന്ത്യയുടെ ബോയിങ് 787–8 വിമാനമാണ് തകർന്നത്. 242 യാത്രക്കാരുമായി ടേക്ക് ഓഫ് ചെയ്ത വിമാനം നിമിഷങ്ങൾക്കുള്ളിൽ തകർന്നു വീഴുകയായിരുന്നു.