നവാബ് മാളിക അടക്കം കോടികളുടെ സ്വത്തുക്കൾ! ഒരു മാസം ഒരുകോടി; സിദ്ദിഖിയുടെ നേട്ടങ്ങൾ കണ്ണഞ്ചിപ്പിക്കുന്നത്; വിശേഷങ്ങൾ

Authored by: ഋതു നായർ|Samayam Malayalam•6 Nov 2025, 8:14 am

സ്ത്രീ സീരീസിലെ അഞ്ചാമത്തെ ചിത്രമായ തമ്മ ബോക്സ് ഓഫീസിൽ കുതിപ്പ് തുടരുമ്പോൾ കരുത്തുറ്റ വില്ലൻ വേഷത്തിലൂടെ പ്രേക്ഷകരെ ഞെട്ടിച്ചിരിക്കുകയാണ് അഭിനയ രാക്ഷസ്സനായ നവാസുദ്ദിൻ സിദ്ദിഖി . തനിക്ക് ലഭിക്കുന്ന വേഷം എന്ത് തന്നെയായായാലും എതിരെ നിൽക്കുന്നത് ഏതു മഹാനടൻ തന്നെയാണെങ്കിലും പ്രേക്ഷകരെ അതിശയിപ്പിക്കുന്ന എന്തെങ്കിലും അദ്ദേഹത്തിൽ നിന്നും ലഭിച്ചിരിക്കും എന്നത് ഉറപ്പുള്ള കാര്യവുമാണ്.

ഉത്തർപ്രദേശിലെ ബുധാനാ എന്ന ചെറുപട്ടണത്തിൽ ജനിച്ച്, നാഷണൽ സ്‌കൂൾ ഓഫ് ഡ്രാമയിലെ പരിശീലനത്തിന് ശേഷം ബോളിവുഡിൽ അരങ്ങേറ്റം കുറിച്ച നവാസുദ്ദിൻ ഇരുപത്തിയഞ്ചു വർഷങ്ങളുടെ സിനിമാ ജീവിതം പിന്നിടുമ്പോൾ ഒരു പിടി നേട്ടങ്ങളും കയ്യിലുണ്ട്. അതിലൊന്നാണ് ലോകത്തിൽ ഒരേയൊരു താരത്തിന് മാത്രം സ്വന്തമായ ഒരു അപൂർവ റെക്കോർഡ്. കാൻ ചലച്ചിത്ര മേളയിൽ പ്രദർശിപ്പിക്കപ്പെട്ട എട്ടു ചിത്രങ്ങളുടെ ഭാഗമാകാൻ അദ്ദേഹത്തിന് സാധിച്ചിട്ടുണ്ട്. ഇത്രയധികം ചിത്രങ്ങൾ കാനിൽ പ്രദർശിപ്പിക്കപ്പെട്ട മറ്റൊരു താരവും ലോകസിനിമയിൽ തന്നെയില്ല.

1999 ൽ സർഫറോഷ് എന്ന ചിത്രത്തിൽ ഒരു ചെറിയ വേഷം ചെയ്തുകൊണ്ടാണ് നവാസുദ്ദിൻ വെള്ളിത്തിരയിൽ ചുവടു വെയ്ക്കുന്നത്. പിന്നീടുള്ള എട്ടു വർഷക്കാലം അദ്ദേഹത്തിന്റെ കരിയർ ചെറിയ വേഷങ്ങളിൽ മാത്രം ഒതുങ്ങി നിന്നു. അഭിനേതാവാകണം എന്ന ത്വര കൈവിടാതെ വർഷങ്ങളോളം അദ്ദേഹം കാത്തുസൂക്ഷിച്ച പ്രതീക്ഷയാണ് ഇന്ത്യൻ സിനിമയിലെ തന്നെ മികച്ച അഭിനേതാക്കളിൽ ഒരാളെ പ്രേക്ഷകർക്ക് ലഭിക്കാനുള്ള കാരണം.

2007 ൽ അനുരാഗ് കശ്യപ് ഒരുക്കിയ ബ്ളാക്ക് ഫ്രൈഡേ എന്ന ചിത്രം സിദ്ദിഖിക്ക് ശ്രദ്ധ നേടിക്കൊടുത്തു.
2010 ൽ ആമിർ ഖാൻ പ്രൊഡക്ഷൻസ് നിർമ്മിച്ച പീപ്ലി ലൈവ് എന്ന സിനിമയാണ് നവാസുദ്ദിൻ സിദ്ദിഖിയുടെ അഭിനയജീവിതത്തിൽ വഴിത്തിരിവായത്. അനുരാഗ് കശ്യപിന്റെ ഗാങ്സ് ഓഫ് വാസിപൂർ ചിത്രങ്ങൾ അദ്ദേഹത്തെ പ്രശസ്തിയുടെ പാതയിലെത്തിച്ചു. മിസ് ലവ്ലി, ഗാങ്സ് ഓഫ് വാസിപൂർ, ലഞ്ച് ബോക്സ്, ബോംബെ ടാകീസ്, മൺസൂൺ ഷൂട്ട് ഔട്ട്, ലയേഴ്‌സ് ഡയസ്, മിയാൻ കൽ ആനാ, രമൺ രാഘവ് 2.0, മാൻതോ എന്നീ ചിത്രങ്ങൾ കാൻ ചലച്ചിത്ര മേളയിൽ പ്രദർശിപ്പിക്കപ്പെട്ടു. സേക്രഡ് ഗെയിംസ്, മാക്മാഫിയ എന്നീ രണ്ടു വെബ്‌സീരീസുകൾ എമ്മി അവാർഡ് നാമനിർദ്ദേശങ്ങൾ ലഭിച്ചവയായിരുന്നു.

ALSO READ: കോവിഡ് പോസിറ്റീവ് ആയതും ബ്ലഡിൽ ഇൻഫെക്ഷനും ബ്ലീഡിങ്ങും; ബേബി താഴെ വന്നുനിന്ന പോലെ തോന്നിയ അവസ്ഥകൾ... ദുർഗ പറയുന്നു
ഇരുപത്തിയഞ്ചു വർഷങ്ങൾ നീണ്ട സിനിമാ ജീവിതം പിന്നിടുമ്പോൾ ഏകദേശം നൂറ്റിയറുപതു കോടി രൂപയാണ് സിദ്ദിഖിയുടെ ആസ്തിയായി കണക്കാക്കുന്നത്. 2017 ൽ 12.8 കോടി രൂപ മുതൽമുടക്കിൽ ബോംബെയിലെ വെർസോവയിൽ നവാബ് എന്ന മാളിക അദ്ദേഹം സ്വന്തമാക്കിയിരുന്നു.

ബ്രാൻഡ് എൻഡോഴ്സ്മെന്റ്, പൊതുപരിപാടികൾ എന്നിവ വഴി ഏകദേശം ഒരു കോടി രൂപ പ്രതിമാസ വരുമാനം നേടുന്ന താരം ഒരു സിനിമയ്ക്ക് ആറു മുതൽ ഏഴു കോടി രൂപ വരെയാണ് ഈടാക്കുന്നത്. എണ്പത്തിരണ്ടു കോടി രൂപയുടെ നിക്ഷേപവും അദ്ദേഹത്തിനുള്ളതായി കണക്കാക്കുന്നു.