നേപ്പാളിലെ പ്രളയത്തിനിടെ കൊള്ള; ഒഴുകിയെത്തിയ ബാങ്ക് ലോക്കർ തകർത്ത് പണം മോഷ്ടിച്ചു, 29 പേർ അറസ്റ്റിൽ

നേപ്പാളിൽ കനത്ത നാശം വിതയ്ക്കുന്ന പ്രളയത്തിനിടെ ബാങ്ക് സേഫ്റ്റി ലോക്കർ തകർത്ത് പണം മോഷ്ടിച്ച സംഭവത്തിൽ 29 പേർ അറസ്റ്റിൽ. പ്രതികളിൽ നിന്ന് 92,68,505 നേപ്പാളി രൂപ (ഏകദേശം 57 ലക്ഷം ഇന്ത്യൻ രൂപ) പൊലീസ് പിടിച്ചെടുത്തു.

റസുവ ജില്ലയിലെ ഭോട്ടെകോഷി മേഖലയിൽ പ്രളയത്തിൽ ഒഴുകിപ്പോയ ബാങ്ക് സേഫ്റ്റി ലോക്കർ ധാഡിംഗ് ജില്ലയിലെ ത്രിശൂലി നദിക്ക് സമീപത്തുനിന്നാണ് നാട്ടുകാർ കണ്ടെത്തിയത്. തുടർന്ന് ചിലർ ലോക്കർ തകർത്ത് പണം കൈക്കലാക്കിയതായി പൊലീസിന് വിവരം ലഭിച്ചു.

വിവരം ലഭിച്ചതിന് പിന്നാലെ പ്രത്യേക പൊലീസ് സംഘം സ്ഥലത്തെത്തി 19നും 49നും ഇടയിൽ പ്രായമുള്ള 29 പേരെ അറസ്റ്റ് ചെയ്യുകയായിരുന്നു. മോഷ്ടിച്ച പണത്തിന്റെ ഭൂരിഭാഗവും ഇവരിൽ നിന്ന് കണ്ടെടുത്തതായാണ് വിവരം.

അതിനിടെ, മറ്റൊരു സംഭവത്തിൽ നാരായണി നദിയിൽ നിന്ന് കണ്ടെത്തിയ പ്രളയത്തിൽ മരിച്ചയാളുടെ ശരീരത്തിൽ നിന്ന് സ്വർണക്കമ്മലുകൾ മോഷ്ടിച്ച രണ്ട് പേരെയും പൊലീസ് അറസ്റ്റ് ചെയ്തു. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതിനെ തുടർന്നാണ് പ്രതികളെ തിരിച്ചറിഞ്ഞത്.

നേപ്പാൾ–ടിബറ്റ് അതിർത്തിക്ക് സമീപമുണ്ടായ ഹിമാനി പൊട്ടിത്തെറിയാണ് വൻ പ്രളയത്തിന് കാരണമായതെന്നാണ് റിപ്പോർട്ടുകൾ. ദുരന്തത്തിൽ നൂറുകണക്കിന് പേർ മരിക്കുകയും ആയിരക്കണക്കിന് പേരെ കാണാതാവുകയും ചെയ്തതായി ദേശീയ ദുരന്ത നിവാരണ അതോറിറ്റി ശനിയാഴ്ച അറിയിച്ചു.