പട്ടാളക്യാമ്പ് ആകാൻ ബോളിവുഡ്! 2026 ൽ സൈനിക യൂണിഫോമിൽ ഇറങ്ങുന്നത് പത്തുമുൻനിര താരങ്ങൾ

Authored by: ലക്ഷ്മി ബാല |Samayam Malayalam•7 Nov 2025, 9:23 am

സൈന്യത്തിന്റെ കഥകൾക്ക് ഒട്ടും പഞ്ഞമില്ലാത്ത ഇടമാണ് ഇന്ത്യൻ സിനിമാ ഇൻഡസ്ട്രി. ദേശസ്നേഹവും, ആക്ഷനും ചേരുന്ന ആർമി സിനിമകൾക്ക് ഇന്ത്യൻ പ്രേക്ഷകർക്കിടയിൽ ലഭിച്ചിട്ടുള്ള സ്വീകാര്യതയും വളരെ വലുതാണ്. 1964 ൽ റിലീസ് ആയ ഹഖീഖത് ഈ വര്ഷം റിലീസ് ആയ ഗ്രൗണ്ട് സീറോ വരെ നീളുന്നു ബോളിവുഡിലെ പട്ടാളക്കഥകൾ. രാജ്യത്താകമാനം തരംഗം തീർത്ത ബോർഡർ, ഉറി, ഷേർഷാ തുടങ്ങിയ വമ്പൻ ഹിറ്റുകളും ഇതിലുൾപ്പെടുന്നു.

പത്തു മുൻനിര താരങ്ങളാണ് സൈനീക യൂണിഫോമിൽ 2026 നെ വരവേൽക്കാൻ ഒരുങ്ങുന്നതെന്നാണ് റിപ്പോർട്ടുകൾ പറയുന്നത്. പഠാൻ 2 അടക്കമുള്ള സ്പൈ യൂണിവേഴ്‌സ് സിനിമകൾ വേറെയും. ആർമി വേഷങ്ങൾ ചെയ്യുക എന്നത് ബഹുഭൂരിപക്ഷം നായകനടന്മാരുടെയും സ്വപ്നവുമാണ്. പട്ടാളക്കഥകൾ പറയുന്ന ആറോളം സിനിമകളാണ് 2025 നവംബർ മുതൽ റിലീസിനൊരുങ്ങുന്നത്. ചുരുക്കി പറഞ്ഞാൽ ഇനിയുള്ള ഒരു വർഷക്കാലം ഇന്ത്യൻ സിനിമാ പ്രേമികൾക്ക് ദേശസ്നേഹവും, ആക്ഷനും നിറഞ്ഞതായിരിക്കുമെന്നു സാരം.

1962 ലെ ഇന്ത്യ-ചൈന പോരാട്ടത്തിലെ റെസാങ് ലാ യുദ്ധം പ്രമേയമാക്കിയുള്ള ചിത്രം ഇന്ത്യൻ സൈനികരുടെ ധീരമായ ചെറുത്തു നില്പിനെ ബിഗ് സ്‌ക്രീനിൽ എത്തിക്കുന്നു. ചിത്രത്തിന്റെ ട്രെയിലർ ഇതിനോടകം തന്നെ ഏറെ പ്രശംസ പിടിച്ചു പറ്റിയിരുന്നു.

1997 ൽ ചരിത്രം സൃഷ്ടിച്ച ബോർഡർ എന്ന സിനിമയുടെ രണ്ടാം ഭാഗവുമായി സണ്ണി ഡിയോൾ വെള്ളിത്തിരയിൽ എത്തുമ്പോൾ കൂട്ടിനായി യുവതാരങ്ങളായ വരുൺ ധവാൻ, ദിൽജിത് ഡോസാൻജ് എന്നിവരുമുണ്ട്. രണ്ടായിരത്തി ഇരുപത്തിയാറ് ജനുവരി ഇരുപത്തിരണ്ടിനാണ് ചിത്രം റിലീസ് ആകുന്നത്. പന്ത്രണ്ടു കോടി രൂപ മുതൽ മുടക്കിൽ നിർമ്മിക്കപ്പെട്ട ബോർഡർ ഒന്നാം ഭാഗം അൻപത്തിയഞ്ചു കോടി കളക്ഷൻ നേടിയിരുന്നു. ബോളിവുഡ് ചരിത്രത്തിലെ തന്നെ ഏറ്റവും വലിയ ചിത്രമാക്കി മാറ്റാൻ നിർമാതാവ് ആഗ്രഹിക്കുന്ന ബോർഡർ 2 ന്റെ നിർമാണച്ചെലവുകൾ ആയിരം കോടിയോളം വരുമെന്നാണ് അനൗദ്യോഗിക കണക്കുകൾ സൂചിപ്പിക്കുന്നത്.

അടുത്ത വർഷം പകുതിയോടെ റിലീസ് ആകുമെന്ന് പ്രതീക്ഷിക്കുന്ന ഭായ് ജാൻ ചിത്രം ബാറ്റിൽ ഓഫ് ഗാൽവാൻ ആണ് പ്രേക്ഷകർ പ്രതീക്ഷയോടെ കാത്തിരിക്കുന്ന അടുത്ത ചിത്രം. 2020 ൽ ഇന്ത്യ-ചൈന സൈനികർ തമ്മിൽ ലഡാക്കിലെ ഗാൽവാൻ താഴ്‌വരയിൽ വെച്ചുണ്ടായ ഏറ്റുമുട്ടലാണ് ചിത്രത്തിന്റെ പ്രമേയം. ധീര രക്തസാക്ഷി കേണൽ ബി. സന്തോഷ് ബാബുവിന്റെയും 16 ബിഹാർ റെജിമെന്റിലെ സൈനികരുടെയും നെഞ്ചുറപ്പിന്റെ കഥയാണ് ചിത്രത്തിലൂടെ വെള്ളിത്തിരയിലെത്തുന്നത്. ചിത്രത്തിന്റെ പ്രമോഷനുമായി ബന്ധപ്പെട്ട് സൽമാൻ ഖാൻ പോസ്റ്റ് ചെയ്ത ഷർട്ടിടാത്ത ചിത്രം ഇന്റർനെറ്റിൽ തരംഗമായി മാറിയിരുന്നു.

ഇന്ത്യൻ സിനിമയുടെ ബാഹുബലി പ്രഭാസ് നായകനാകുന്ന ഫൗജിയാണ് നിരയിലെ അടുത്ത ചിത്രം. സ്വാതന്ത്ര്യസമരകാലത്ത് ബ്രിട്ടീഷ് ഭരണത്തിനെതിരെ പോരാടുന്ന ഒരു പട്ടാളക്കാരന്റെ കഥയാണ് ഫൗജി എന്നാണ് വിവരം. ഹനു രാഘവപുടി സംവിധാനം ചെയ്ത "ഫൗജി" ഇതിനകം ഭാഗികമായി ചിത്രീകരിച്ചു കഴിഞ്ഞു. പ്രഭാസിന്റെ കരിയറിലെ ആദ്യത്തെ പട്ടാള വേഷം കൂടിയാണ് ഫൗജി.

സഞ്ജയ് ലീലാ ബൻസാലി ഒരുക്കുന്ന ലവ് ആൻഡ് വാർ എന്ന ചിത്രത്തിലൂടെ രൺബീർ കപൂറും, വിക്കി കൗശലും യൂണിഫോം അണിയും. ഉറി, സാം ബഹാദൂർ എന്നീ ചിത്രങ്ങളിലൂടെ പട്ടാളവേഷങ്ങളിൽ തിളങ്ങിയിട്ടുള്ള താരമാണ് വിക്കി. അതേ സമയം രൺബീർ ചെയ്യുന്ന ആദ്യത്തെ പട്ടാളവേഷമാണ് ഈ ചിത്രം. യുദ്ധപശ്ചാത്തലത്തിൽ നടക്കുന്ന ഒരു ത്രികോണ പ്രണയത്തിന്റെ കഥയാണ് ചിത്രമെന്നാണ് വിവരം. രൺബീർ നെഗറ്റീവ് ഷേഡുള്ള കഥാപാത്രത്തെ അവതരിപ്പിക്കും എന്നും റിപ്പോർട്ടുകൾ പറയുന്നു.

അമിതാബ് ബച്ചന്റെ ചെറുമകൻ അഗസ്ത്യ നന്ദ നായകനാകുന്ന ഇക്കീസ് അടുത്ത വർഷം ഡിസംബറിൽ റിലീസ് ആകുമെന്നാണ് വാർത്ത. അമിതാബിന്റെ മകൾ ശ്വേതയുടെ മകനാണ് അഗസ്ത്യ. 1971 ലെ ഇന്ത്യ-പാകിസ്ഥാൻ യുദ്ധത്തിൽ ശത്രുക്കളോട് ഒറ്റയ്ക്ക് പോരാടുകയും വെടിയേറ്റതിനുശേഷവും പോരാട്ടം തുടരുകയും ചെയ്ത, ഏറ്റവും പ്രായം കുറഞ്ഞ പരമവീര ചക്ര ജേതാവായ സെക്കൻഡ് ലെഫ്റ്റനന്റ് അരുൺ ഖേത്രപാലിന്റെ കഥ പറയുന്ന ചിത്രമാണ് ഇക്കീസ്. അഗസ്ത്യയുടെ ആദ്യത്തെ തിയേറ്റർ റിലീസ് ചിത്രം കൂടിയാണിത്.