പറഞ്ഞാല്‍ പോലും കേള്‍ക്കില്ല, അവിടെ തന്നെയിരിക്കും; നയന്‍താരയുടെ പെരുമാറ്റം ശരിക്കും തന്നെ അത്ഭുതപ്പെടുത്തി എന്ന് സുന്ദര്‍ സി

Authored byഅശ്വിനി പി | Samayam Malayalam | Updated: 22 Apr 2025, 6:34 pm

നയന്‍താരയെ കേന്ദ്ര കഥാപാത്രമാക്കി സുന്ദര്‍ സി മൂക്കുത്തി അമ്മന്‍ 2 എന്ന ചിത്രം പ്രഖ്യപിച്ചതുമുതല്‍ ഓരോ വിവാദ കഥകളാണ് പുറത്തുവരുന്നത്. പൂജ ചടങ്ങിന് നയന്‍താര മീനയെ അവഗണിച്ചു എന്ന ഗോസിപ്പുകള്‍ക്കെല്ലാം പിന്നാലെ, സെറ്റില്‍ വച്ച് കോസ്റ്റിയൂം ഡയരക്ടറുമായി നയന്‍താര വഴക്കിട്ടു എന്നും, ഇത് ഇഷ്ടപ്പെടാതെ സുന്ദര്‍ സി പാക്കപ് പറഞ്ഞു എന്നും, പൊള്ളാച്ചിയില്‍ നടക്കാനിരുന്ന ചിത്രത്തിന്റെ ഷെഡ്യൂള്‍ കാന്‍സല്‍ ചെയ്തു എന്നുമുള്ള വാര്‍ത്തകള്‍ വന്നിരുന്നു

ധരിക്കാന്‍ കൊടുത്ത വേഷം ഇഷ്ടപ്പെടാത്ത നയന്‍താര അസിസ്റ്റന്റ് ഡയരക്ടറുമായി വാക്ക് തര്‍ക്കത്തില്‍ ഏര്‍പ്പെട്ടു. ഇത് ഇഷ്ടപ്പെടാതെ സുന്ദര്‍ സി നയനെ ഷൗട്ട് ചെയ്തു. ഷൂട്ടിങ് സെറ്റില്‍ നിന്ന് നയന്‍ ഇറങ്ങിപ്പോവുകയും പിന്നീട് നിര്‍മാതാക്കളില്‍ ഒരാളായ ഇഷാരി ഗണേഷ് നയനെ പറഞ്ഞ് സമാധാനിപ്പിച്ച് സെറ്റിലേക്ക് വരികയായിരുന്നു എന്നാണ് ആദ്യം പുറത്തുവന്ന വാര്‍ത്തകള്‍.

Also Read: രണ്ട് കുട്ടികളായി, ഇപ്പോള്‍ വെന്തു തണിന്തത് കാട് എന്ന അവസ്ഥയിലാണ് ഞാനും ശ്രീനിയും; പേളി മാണിയുടെ വൈറല്‍ വീഡിയോ

എന്നാല്‍ അങ്ങനെ ഒരു സംഭവമേ ഉണ്ടായിട്ടില്ല, നയന്‍ തീര്‍ത്തും പ്രൊഫഷണലായ ഒരു അഭിനേത്രിയാണ് എന്ന് സോഷ്യല്‍ മീഡിയയിലുടെ ചിത്രത്തിന്റെ മറ്റൊരു നിര്‍മാതാവും സംവിധായകന്റെ ഭാര്യയുമായ ഖുശ്ബു സുന്ദര്‍ അറിയിച്ചു. ഇഷാരി ഗണേഷിനും ഖുശ്ബുവിനും പുറമെ നയന്‍താരയുടെ റൗഡി പിക്‌ചേഴ്‌സിനും ചിത്രത്തിന്റെ നിര്‍മാണത്തില്‍ പങ്കുണ്ട്.

ഈ സാഹചര്യത്തിലാണ് ഇപ്പോള്‍ സുന്ദര്‍ സി തന്റെ പുതിയ സിനിമയായ ഗ്യാങ്സ്റ്ററുടെ പ്രൊമോഷന്‍ പരിപാടികള്‍ നടത്തുന്നത്. അങ്ങനെ ഒരു അഭിമുഖത്തില്‍ നയന്‍താരയെ കുറിച്ചും എന്തുകൊണ്ട് പൊള്ളാച്ചി ഷെഡ്യൂള്‍ കാന്‍സ ചെയ്തു എന്നതിനെ കുറിച്ചും സംസാരിച്ച വീഡിയോ സോഷ്യല്‍ മീഡിയയില്‍ വൈറലാവുകയാണ്.

നയന്‍താരയുമായി ഈ പറഞ്ഞ പ്രശ്‌നങ്ങളൊന്നും ഇല്ല എന്നും, ഇത്തരമൊരു വാര്‍ത്ത എന്തുകൊണ്ട് വന്നു എന്ന് അറിയില്ല എന്നും സുന്ദര്‍ സി വ്യക്തമാക്കി. വളരെ പ്രൊഫഷണലായിട്ടുള്ള അഭിനേത്രിയാണ് നയന്‍താര. ഏത് സാഹചര്യത്തിലും സിനിമയുമായി സഹകരിക്കുന്ന ആള്‍. ഷൂട്ടിങിന് ഇടയില്‍ വലിയ ബ്രേക്ക് വന്നാലും കാരവാനില്‍ പോയിരിക്കുന്ന സ്വഭാവമില്ല, അത് എന്നെ ശരിക്കും അത്ഭുതപ്പെടുത്തി. കുറച്ച് സമയം എടുക്കും, കാരവാനില്‍ ഇരുന്നോളൂ എന്ന് പറഞ്ഞാലും കേള്‍ക്കില്ല. സെറ്റില്‍ തന്നെ ഉണ്ടാവും, എല്ലാം നിരീക്ഷിക്കും. അത് അവരുടെ പ്രൊഫഷണലിസമാണ്- സുന്ദര്‍ സി പറഞ്ഞു.


മൂക്കുത്തി അമ്മന്‍ 2 വിന്റെ പൊള്ളാച്ചി ഷെഡ്യൂള്‍ കാന്‍സല്‍ ചെയ്യനുള്ള കാരണവും സുന്ദര്‍ സി വ്യക്തമാക്കുന്നുണ്ട്. ഈ സിനിമ (ഗ്യാങ്സ്റ്റര്‍) റിലീസിങ് പരിപാടികള്‍ നടക്കുന്നതിനാലും, ഇത് മുടങ്ങിപ്പോകാന്‍ സാധ്യതയുള്ളതുകൊണ്ടുമാണ് താത്കാലികമായി പൊള്ളാച്ചി ഷെഡ്യൂള്‍ കാന്‍സല്‍ ചെയ്തത്. ആ സമയത്തും ചെന്നൈയിലെ ഷൂട്ടിങ് നടക്കുന്നുണ്ടായിരുന്നു- സുന്ദര്‍ സി വ്യക്തമാക്കി