പുതുമയുള്ള കാര്യമൊന്നുമല്ല! ഇതിന് മുന്‍പും ഈ അവഗണനകളൊക്കെ നേരിട്ടതാണല്ലോ! പൃഥ്വിരാജിനൊപ്പമെന്ന് ലിസ്റ്റിന്‍ സ്റ്റീഫന്‍

Edited byഅനുപമ നായർ | Samayam Malayalam | Updated: 1 Apr 2025, 10:31 am

Samayam Malayalamപുതുമയുള്ള കാര്യമൊന്നുമല്ല!

എമ്പുരാന്‍ റിലീസ് ചെയ്തതിന് പിന്നാലെയായി രൂക്ഷ വിമര്‍ശനങ്ങളുമായി ഒരുവിഭാഗം എത്തിയിരുന്നു. സിനിമയിലെ ചില രംഗങ്ങളും, വില്ലന്റെ പേരുമൊക്കെയായിരുന്നു പ്രശ്‌നം. പൃഥ്വിരാജിനും മുരളി ഗോപിക്കും എതിരെ രൂക്ഷമായ സൈബര്‍ ആക്രമണവും നടക്കുന്നുണ്ട്. സിനിമാലോകത്തുള്ളവരും ആരാധകരും പൃഥ്വിയെ പിന്തുണച്ച് എത്തിയിരുന്നു. അദ്ദേഹത്തിന്റെ അടുത്ത സുഹൃത്തുക്കളിലൊരാളായ ലിസ്റ്റിന്‍ സ്റ്റീഫനും പിന്തുണ അറിയിച്ചിരുന്നു. ഫേസ്ബുക്ക് കുറിപ്പിലൂടെയായിരുന്നു ലിസ്റ്റിന്‍ പൃഥ്വിയെക്കുറിച്ചും എമ്പുരാനെക്കുറിച്ചും വാചാലനായത്.

മലയാള സിനിമയ്ക്ക് പരിമിതമായ ബജറ്റേ പ്രായോഗികമാകൂ എന്ന പഴയ നിയമത്തെ കാറ്റിൽ പറത്തി കുതിയ്ക്കുകയാണ് എമ്പുരാൻ. ഇത് ഒരു ഫാൻ ബോയ് വെറുതെ ആവേശം കൊള്ളുന്നതല്ലാ, ഒരു തീയറ്റർ ഉടമ സാക്ഷ്യപ്പെടുത്തുന്നതാണ്. കേരളം കണ്ട ഏറ്റവും വലിയ കലക്ഷനിലേക്ക് എമ്പുരാൻ പറന്നുയരുന്നത് കലയിലും വ്യവസായത്തിലും വലിയ സ്വപ്നങ്ങൾ കാണാനുള്ള സാധ്യത തുറന്നു വച്ചിട്ടാണ്.

Also Read: മോഹന്‍ലാലിന് അബദ്ധം പറ്റിയതല്ല! 6 മണിക്കൂറെടുത്ത് പറഞ്ഞ കഥ കേട്ടതാണ്! വീണ്ടും വൈറലായി പൃഥ്വിരാജിന്റെ വാക്കുകള്‍

മികച്ച ഒരു ടീമിൻ്റെ പരിശ്രമത്തെ സല്യൂട്ടടിച്ച് അഭിനന്ദിക്കേണ്ട നേരത്ത്, അതിൻ്റെ കപ്പിത്താനെ ഉന്നം വെച്ച് തേജോവധം ചെയ്യുന്നത് ആ വ്യക്തിയെ മാത്രമല്ല സിനിമാ ഇൻഡസ്ട്രിയെ തന്നെയാണ് ദോഷമായി ബാധിക്കുന്നത്. ചർച്ചയാവാം , വിയോജിപ്പുകളാവാം, പക്ഷേ പരിഹാസവും, തെറ്റായ പദങ്ങളും ഇല്ലാതെ.

രാജു, ആദ്യമായി ഒരു വഴിവെട്ടുന്നവർക്കെല്ലാം നേരിടേണ്ടി വരുന്ന ചെറിയ കാര്യങ്ങളായി മാത്രം ഇതിനെ കാണുക, സമീപിക്കുക. സിനിമയെ ഇഷ്ടപ്പെടുന്നവരും, ആഗ്രഹിക്കുന്നവരും നിങ്ങളോടൊപ്പം ഉണ്ട്. കാരണം, ഇനിമുതൽ നമ്മുടെ കൊച്ചു കേരളം ഭൂപടത്തിൽ മറ്റെല്ലാ ഭാഷകളോടും കിടപിടിയ്ക്കും. രാജു ഇതിന് മുമ്പും ഈ അവഗണനകൾ ഒക്കെ നേരിട്ടത് ആണല്ലോ. ഇത് ഒന്നും ഒരു പുതുമയുള്ള കാര്യം അല്ല എന്നും ലിസ്റ്റിന്‍ പറയുന്നു.

ഓരോ വെള്ളിയാഴ്ച എത്രയോ സിനിമകൾ ഇറങ്ങുന്നു, അതിൽ ഒന്ന് മാത്രം ആണ് " എമ്പുരാൻ ". സിനിമയെ സിനിമ മാത്രം ആയി കാണുക. മലയാള സിനിമയിലെ കലക്ഷൻ കണക്കുകൾ ഇനി രണ്ടായി വിഭജിക്കപ്പെടും. എമ്പുരാന് മുന്‍പും എമ്പുരാന് ശേഷവും എന്ന്. എമ്പുരാൻ ചരിത്രത്തിലേക്ക്. പൃഥ്വിരാജിനൊപ്പം, സിനിമയ്ക്കൊപ്പം. എന്നും എപ്പോഴും എന്നായിരുന്നു ലിസ്റ്റിന് കുറിച്ചത്.