ഫൈനലിന് ശേഷം അക്കാര്യം തുറന്ന് പറഞ്ഞ് വിരാട് കോഹ്ലി; ഇമ്പാക്ട് പ്ലേയറായി ഐപിഎല്ലിൽ കളിക്കില്ലെന്നും വെളിപ്പെടുത്തൽ

Curated by: ഗോകുൽ എസ്|Samayam Malayalam•4 Jun 2025, 1:24 am

ഇന്ത്യൻ പ്രീമിയർ ലീഗിലെ ആദ്യ കിരീടം സ്വന്തമാക്കിയിരിക്കുകയാണ് വിരാട് കോഹ്ലിയും റോയൽ ചലഞ്ചേഴ്സ് ബംഗളൂരുവും. ചൊവ്വാഴ്ച രാത്രി നടന്ന 2025 സീസൺ ഐപിഎല്ലിന്റെ കലാശപ്പോരാട്ടത്തിൽ ശ്രേയസ് അയ്യരിന്റെ പഞ്ചാബ് കിങ്സിനെ പരാജയപ്പെടുത്തിയായിരുന്നു ആർസിബിയുടെ കിരീട ധാരണം. ആവേശകരമായ ഫൈനലിൽ ആറ് റൺസിനായിരുന്നു ആർസിബി ജയിച്ചത്.നീണ്ട 18 വർഷത്തെ കാത്തിരിപ്പ് അവസാനിപ്പിച്ച് വിരാട് കോഹ്ലി ഐപിഎൽ കിരീടം നേടിയതിന് പിന്നാലെ അദ്ദേഹം ഐപിഎല്ലിൽ നിന്ന് വിരമിച്ചേക്കുമെന്ന തരത്തിൽ അഭ്യൂഹങ്ങൾ ഉയർന്നിരുന്നു. എന്നാൽ ഫൈനൽ ജയത്തിന് ശേഷം സംസാരിക്കവെ താൻ ആർസിബിക്ക് വേണ്ടി കളി തുടരുമെന്ന് കോഹ്ലി സൂചിപ്പിച്ചു. ഐപിഎല്ലിൽ തുടരുന്ന കാലത്തോളം ആർസിബിക്ക് വേണ്ടി മാത്രമാകും താൻ കളിക്കുകയെന്നും കോഹ്ലി ചൂണ്ടിക്കാട്ടി. ഉടനെങ്ങും ഐപിഎല്ലിൽ നിന്ന് വിരമിക്കില്ലെന്ന സൂചനകളാണ് കോഹ്ലിയുടെ വാക്കുകളിൽ നിന്ന് ലഭിക്കുന്നത്.


ഐപിഎല്ലിൽ ഇമ്പാക്ട് താരമായി കളിക്കാൻ താൻ ആഗ്രഹിക്കുന്നില്ലെന്നും ഫൈനൽ വിജയത്തിന് ശേഷം വിരാട് കോഹ്ലി വ്യക്തമാക്കി. ഫീൽഡ് ചെയ്യാൻ താൻ ആഗ്രഹിക്കുന്നുണ്ടെന്നും അങ്ങനെ ഒരു ഇമ്പാക്ട് കൊണ്ടുവരാനാണ് ഇഷ്ടപ്പെടുന്നതെന്നുമാണ് കോഹ്ലി പറഞ്ഞത്. ഇതോടെ വരും സീസണുകളിലും ഐപിഎൽ മത്സരങ്ങളിൽ മുഴുനീളം വിരാട് കോഹ്ലിയെ കാണാൻ സാധിക്കുമെന്ന് ഉറപ്പായി.

Also Read: ഐപിഎല്ലിൽ ആർസിബിക്ക് ചരിത്ര കിരീടം, ഫൈനലിൽ പഞ്ചാബ് കിങ്സിനെ തകർത്തു; ആരാധകർക്ക് ആഘോഷ രാവ്

അതേ സമയം 2025 സീസൺ ഐപിഎല്ലിൽ ആർസിബിയുടെ കിരീട നേട്ടത്തിന് പിന്നിൽ നിർണായക പങ്കാണ് വിരാട് കോഹ്ലി വഹിച്ചത്. 15 കളികളിൽ നിന്ന് 54.75 ബാറ്റിങ് ശരാശരിയിൽ 657 റൺസായിരുന്നു കോഹ്ലിയുടെ സമ്പാദ്യം. ഈ സീസണിൽ റൺ വേട്ടയിൽ മൂന്നാം സ്ഥാനത്താണ് കോഹ്ലി‌. എട്ട് അർധസെഞ്ചുറികളാണ് ഇത്തവണ കോഹ്ലി ആർസിബിക്കായി നേടിയത്. 66 ഫോറുകളും 19 സിക്സറുകളും ഇതിഹാസത്തിന്റെ ബാറ്റിൽ നിന്ന് പിറന്നു.

Also Read: ഐപിഎല്ലിൽ കിടിലൻ റെക്കോഡ് സ്വന്തമാക്കി വിരാട് കോഹ്ലി; നേട്ടം കൈവരിച്ചത് ഫൈനലിനിടെ

ഇന്ത്യൻ പ്രീമിയർ ലീഗ് ചരിത്രത്തിലെ എക്കാലത്തെയും ഉയർന്ന റൺ വേട്ടക്കാരൻ കൂടിയാണ് വിരാട് കോഹ്ലി. 2008 ലെ പ്രഥമ സീസൺ ഐപിഎൽ മുതൽ ആർസിബിയുടെ താരമായ കോഹ്ലി, ഇതുവരെ മൊത്തം 267 മത്സരങ്ങളാണ് ഐപിഎല്ലിൽ കളിച്ചിട്ടുള്ളത്. ഇതിൽ 39.55 ബാറ്റിങ് ശരാശരിയിൽ 8661 റൺസ് താരം നേടി. എട്ട് സെഞ്ചുറികളും 63 അർധസെഞ്ചുറികളുമാണ് ഐപിഎല്ലിൽ വിരാട് കോഹ്ലിയുടെ സമ്പാദ്യം.