മുംബൈ ഇന്ത്യൻസിന്റെ ഏറ്റവും വലിയ തലവേദന ഇക്കാര്യം; വലിയ ആശങ്ക നൽകി സൂപ്പർ താരത്തിന്റെ ഫ്ലോപ് ഷോ

Curated byഗോകുൽ എസ് | Samayam Malayalam | Updated: 31 Mar 2025, 4:34 pm

Samayam Malayalamമുംബൈ ഇന്ത്യൻസ്

2025 സീസൺ ഇന്ത്യൻ പ്രീമിയർ ലീഗിൽ ദയനീയ തുടക്കമാണ് മുംബൈ ഇന്ത്യൻസിന് ലഭിച്ചിരിക്കുന്നത്. കളിച്ച ആദ്യ രണ്ട് മത്സരങ്ങളിലും അവർ പരാജയപ്പെട്ടു. സീസണിലെ മൂന്നാം മത്സരത്തിൽ തിങ്കളാഴ്ച കൊൽക്കത്ത നൈറ്റ് റൈഡേഴ്സിനെ നേരിടുകയാണ് അവർ. ഏത് വിധേനയും ആദ്യ ജയം നേടുകയെന്ന ലക്ഷ്യവുമായാണ് മുംബൈ ഈ മത്സരത്തിന് ഇറങ്ങുന്നത്. അതേ സമയം സീസണിലെ ആദ്യ രണ്ട് കളികൾക്ക് ശേഷം മുംബൈ ഇന്ത്യൻസിന്റെ ഏറ്റവും വലിയ ആശങ്കകളിലൊന്ന് സൂപ്പർ താരം രോഹിത് ശർമയുടെ മോശം ഫോമാ‌ണ്. മുംബൈ ഇന്ത്യൻസിന്റെ പ്രധാന താരമായ രോഹിത് ശർമ ആദ്യ രണ്ട് കളികളിലും നിരാശപ്പെടുത്തി. ചെന്നൈ സൂപ്പർ കിങ്സിന് എതിരായ ആദ്യ മത്സരത്തിൽ പൂജ്യത്തിന് പുറത്തായ രോഹിത്, രണ്ടാം മത്സരത്തിൽ ഗുജറാത്ത് ടൈറ്റൻസിന് എതിരെ എട്ട് റൺസ് മാത്രമാണ് നേടിയത്.

രോഹിതിന്റെ മോശം പ്രകടനങ്ങൾ ഈ രണ്ട് കളികളിലും മുംബൈ ഇന്ത്യൻസിന് കനത്ത തിരിച്ചടി സമ്മാനിച്ചു. അടുത്ത കളിയിലെങ്കിലും രോഹിത് ഫോമിലേക്ക് മടങ്ങിയെത്തുമെന്ന പ്രതീക്ഷയിലാണ് ഇപ്പോൾ ആരാധകർ.

Also Read: അടുത്ത കളിക്ക് മുൻപ് സുപ്രധാന നീക്കവുമായി സഞ്ജു സാംസൺ; രാജസ്ഥാൻ റോയൽസ് ഡബിൾ സ്ട്രോങ്ങാവാൻ പോകുന്നു

കഴിഞ്ഞ കുറച്ച് വർഷങ്ങളായി ഐപിഎല്ലിൽ അത്ര മികച്ച റെക്കോഡല്ല രോഹിത് ശർമക്കുള്ളത് എന്നതും ശ്രദ്ധേയം. അവസാന 6 സീസണുകളിൽ നിന്ന് 24.8 ബാറ്റിങ് ശരാശരിയിൽ 1738 റ‌ൺസ് മാത്രമാണ് രോഹിതിന് നേടാനായത്. 2020 ൽ 12 കളികളിൽ 332 റൺസ് നേടിയ രോഹിത്, 2021 ൽ 13 കളികളിൽ 381 റൺസാണ് സ്കോർ ചെയ്തത്. 2022 ൽ 14 മത്സരങ്ങളിൽ നിന്ന് ആകെ 268 റൺസ് മാത്രമാണ് മുംബൈ ഇന്ത്യൻസ് താരം നേടിയത്. 2023 ൽ 332, 2024 ൽ 417 എന്നിങ്ങനെയാണ് രോഹിതിന്റെ റൺ നേട്ടം.

മുംബൈ ഇന്ത്യൻസിന്റെ പ്രകടനങ്ങൾ: സീസണിലെ ആദ്യ കളിയിൽ ചെന്നൈ സൂപ്പർ കിങ്സായിരു‌ന്നു മുംബൈ ഇന്ത്യൻസിന്റെ എതിരാളികൾ. ചെന്നൈയിൽ നടന്ന മത്സരത്തിൽ ആദ്യം ബാറ്റ് ചെയ്തത് മുംബൈ. 20 ഓവറുകളിൽ 155/9 എന്ന സ്കോറിൽ അവർ ഒതുങ്ങി. ചെന്നൈയാവട്ടെ 19.1 ഓവറുകളിൽ വിജയലക്ഷ്യം മറികട‌ന്നു. നാല് വിക്കറ്റുകൾ വീഴ്ത്തിയ സിഎസ്കെ താരം നൂർ അഹമ്മദായിരുന്നു മത്സരത്തിലെ കേമ‌ൻ.

Also Read: രാജസ്ഥാൻ റോയൽസിന്റെ ആ സർപ്രൈസ് നീക്കം വൻ വിജയം; സഞ്ജുവിന്റെ ടീമിന്റെ ബാറ്റിങ് ഓർഡർ ഇനി ഇങ്ങനെ തന്നെ

ഗുജറാത്ത് ടൈറ്റൻസിന് എതിരെയായിരുന്നു മുംബൈ ഇന്ത്യൻസിന്റെ രണ്ടാം മത്സരം. അഹമ്മദാബാദിൽ നടന്ന മത്സരത്തിൽ ആദ്യം ബാറ്റ് ചെയ്ത ആതിഥേയർ 196/8 എന്ന മികച്ച സ്കോറാണ് നേടിയത്. മുംബൈ ഇന്ത്യൻസി‌ന്റെ മറുപടിയാകട്ടെ 160/6 ൽ അവസാനിച്ചു. ഗുജറാത്ത് 36 റൺസിന്റെ ജയം നേടിയ കളിയിൽ അവരുടെ പേസ് ബൗളറായ പ്രസിദ് കൃഷ്ണയായിരുന്നു പ്ലേയർ ഓഫ് ദി മാച്ച്.