മുംബൈ ഇന്ത്യൻസിൽ നിന്ന് ഈ നാല് താരങ്ങൾ പുറത്താകും; അടുത്ത സീസണ് മുൻപ് ടീമിൽ വമ്പൻ മാറ്റങ്ങൾ

Curated by: ഗോകുൽ എസ്|Samayam Malayalam•5 Jun 2025, 11:48 pm

2025 സീസൺ ഇന്ത്യൻ പ്രീമിയർ ലീഗിൽ ( IPL 2025 ) തകർപ്പൻ പ്രകടനമായിരുന്നു മുംബൈ ഇന്ത്യൻസിന്റേത്‌. മോശം ഫോമിൽ കളിച്ചുതുടങ്ങിയ ടീം ലീഗിന്റെ രണ്ടാം പകുതിയിൽ സ്വപ്ന ഫോമിലേക്ക് ഉയർന്നു. ലീഗ് ഘട്ടത്തിൽ നാലാം സ്ഥാനത്ത് ഫിനിഷ് ചെയ്തതോടെ പ്ലേ ഓഫ് പ്രവേശനവും അവർക്ക് സാധ്യമായി. എലിമിനേറ്ററിൽ ശുഭ്മാൻ ഗില്ലിന്റെ ഗുജറാത്ത് ടൈറ്റൻസിനെ വീഴ്ത്തി രണ്ടാം ക്വാളിഫയറിലേക്ക് ടീം മുന്നേറിയെങ്കിലും അവിടെ പഞ്ചാബ് കിങ്സിന് മുന്നിൽ വീണു. ആറാം ഐപിഎൽ കിരീടമെന്ന ലക്ഷ്യത്തിലേക്ക് എത്താൻ സാധിച്ചില്ലെങ്കിലും തല ഉയർത്തി തന്നെയാണ് മുംബൈ ഇന്ത്യൻസ് സീസൺ അവസാനിപ്പിക്കുന്നത്.അതേ സമയം പ്ലേ ഓഫിൽ എത്തിയെങ്കിലും അടുത്ത സീസണിൽ മുംബൈ ഇന്ത്യൻസ് ടീമിൽ ചില സുപ്രധാന മാറ്റങ്ങൾ വന്നേക്കുമെന്ന കാര്യം ഉറപ്പാണ്. ഇക്കുറി വമ്പൻ തുകക്ക് സ്വന്തമാക്കിയ ചില കളിക്കാരെ അടുത്ത ലേലത്തിന് മുൻപ് മുബൈ വിട്ടയക്കാൻ സാധ്യത കൂടുതലാണ്. അത്തരത്തിൽ മുംബൈ ടീമിൽ നിന്ന് റിലീസ് ചെയ്യാൻ സാധ്യതയുള്ള നാല് പ്രധാന താരങ്ങളെ നോക്കാം.

2025 സീസൺ ഇന്ത്യൻ പ്രീമിയർ ലീഗിന് മുൻപ് നടന്ന മെഗാലേലത്തിൽ മുംബൈ ഇന്ത്യൻസ് വമ്പൻ തുകക്ക് വാങ്ങിയ കളിക്കാരനാണ് ദീപക് ചഹർ. 9.25 കോടി രൂപയാണ് ചഹറിനായി മുംബൈ മുടക്കിയത്. എന്നാൽ വലിയ പ്രതീക്ഷകളോടെ സ്വന്തമാക്കിയ താരം ഇക്കുറി വൻ ഫ്ലോപ്പായി‌. 14 മത്സരങ്ങളിൽ മുംബൈക്കായി ഇറങ്ങിയ ദീപക് ചഹർ 11 വിക്കറ്റുകളാണ് നേടിയത്. 9.17 ആയിരുന്നു താരത്തിന്റെ ബൗളിങ് എക്കോണമി.


ടീമിന്റെ പ്രതീക്ഷക്കൊത്ത് ഉയരാൻ താരത്തിന് കഴിഞ്ഞില്ല. പരിക്കിനെ തുടർന്ന് പ്ലേ ഓഫിൽ കളിക്കാനും ദീപക് ചഹറിന് കഴിഞ്ഞില്ല‌. ഈ കാര്യങ്ങളെല്ലാം പരിഗണിക്കുമ്പോൾ അടുത്ത സീസണ് മുൻപ് ദീപക് ചഹറിനെ മുംബൈ ടീമിൽ നിന്ന് ഒഴിവാക്കാൻ സാധ്യത വളരെ കൂടുതലാണ്.

അടുത്ത ലേലത്തിന് മുൻപ് മുംബൈ ഇന്ത്യൻസ്, ടീമിൽ നിന്ന് ഒഴിവാക്കുമെന്ന് ഏറെക്കുറെ ഉറപ്പുള്ള താരമാണ് ലിസാഡ് വില്ല്യംസ്. ദക്ഷിണാഫ്രിക്കൻ പേസറായ ലിസാഡിനെ ഇക്കഴിഞ്ഞ മെഗാ ലേലത്തിൽ നിന്നായിരുന്നു മുംബൈ ഇന്ത്യൻസ് വാങ്ങിയത്. 75 ലക്ഷം രൂപയായിരുന്നു താരത്തിന്റെ വില. എന്നാൽ പരിക്കിനെ തുടർന്ന് ഈ സീസണിൽ നിന്ന് അദ്ദേഹം പുറത്താവുകയായിരുന്നു. തുടർന്നാണ് കോർബിൻ ബോഷിനെ മുംബൈ പകരക്കാരനായി സൈൻ ചെയ്തത്.

ആ തീരുമാനം തെറ്റിയോ, തോൽവിക്ക് ശേഷം തുറന്ന് പറഞ്ഞ് ഹാർദിക് പാ‌ണ്ഡ്യ; മുംബൈ ഇന്ത്യൻസിന് തിരിച്ചടിയായത് ഇക്കാര്യം
ഇത്തവണത്തെ ഐപിഎല്ലിൽ മുംബൈ ഇന്ത്യൻസ് പകരക്കാരനായി സൈൻ ചെയ്ത താരമാണ് അഫ്ഗാൻ സ്പിന്നറായ മുജീബുർ റഹ്മാൻ‌. മറ്റൊരു അഫ്ഗാൻ സ്പിന്നറായ എ എം ഗസൻഫാർ പരിക്കേറ്റ് പുറത്തായ സാഹചര്യത്തിലായിരുന്നു ഈ താരത്തെ മുംബൈ ടീമിലെത്തിച്ചത്.‌ ഒരു കളിയിൽ മാത്രമാണ് ഇക്കുറി മുജീബുർ റഹ്മാണ് അവസരം ലഭിച്ചത്.

ഈ മത്സരത്തിൽ രണ്ടോവറുകൾ എറിഞ്ഞ താരം ഒരു വിക്കറ്റ് നേടിയെങ്കിലും അതിനായി വിട്ടുകൊടുത്തത് 28 റൺസാണ്. ഒരു ഐപിഎൽ ടീമിൽ എട്ട് വിദേശ സ്ലോട്ടുകളാണ് ഉള്ളത്. അടുത്ത സീസണിൽ പരിക്ക് മാറി ഗസൻഫർ മടങ്ങിയെത്തുന്നതോടെ മുജീബുർ റഹ്മാനെ ഒഴിവാക്കാൻ മുംബൈ നിർബന്ധിതരാകും.

ഐപിഎല്‍ 2025 കിരീടം ആര്‍സിബിക്ക്; 18 വര്‍ഷത്തെ ചരിത്രത്തില്‍ ആദ്യം, പഞ്ചാബിനെ ആറ് റണ്‍സിന് വീഴ്ത്തി
യുവ വിക്കറ്റ് കീപ്പർ ബാറ്റർ റോബിൻ മിൻസിനെയും മുംബൈ ടീമിൽ നിന്ന് ഒഴിവാക്കാൻ സാധ്യതയുണ്ട്. ഐപിഎൽ മെഗാ ലേലത്തിൽ മുംബൈ ഇന്ത്യൻസ് 3.4 കോടി രൂപക്ക് സ്വന്തമാക്കിയ താരമാണ് മിൻസ്. രണ്ട് മത്സരങ്ങളിൽ ഇക്കുറി അവസരം ലഭിച്ച താരത്തിന് ആകെ ആറ് റൺസ് മാത്രമേ നേടാനായുള്ളൂ. റിലീസ് ചെയ്താലും കുറഞ്ഞ തുകക്ക് താരത്തെ സ്വന്തമാക്കാൻ സാധിച്ചേക്കുമെന്നതിനാൽ ആ നീക്കത്തിന് മുംബൈ ഇന്ത്യൻസ് ശ്രമിച്ചേക്കും.