മോശം ഫോമിൽ റിട്ടയേഡ് ഔട്ടായി തിലക് വർമ, ഐപിഎല്ലിൽ നാടകീയ രംഗങ്ങൾ; എന്നിട്ടും ടീമിന് തോൽവി, ലക്നൗവിന് ആവേശ‌ ജയം

Curated byഗോകുൽ എസ് | Samayam Malayalam | Updated: 5 Apr 2025, 12:08 am

Samayam Malayalamതിലക് വർമ

ഇന്ത്യൻ പ്രീമിയർ ലീഗിലെ മറ്റൊരു ആവേശ പോരാട്ടത്തിൽ കരുത്തരായ മുംബൈ ഇന്ത്യൻസിനെ 12 റൺസിന് വീഴ്ത്തി ലക്നൗ സൂപ്പർ ജയന്റ്സ്. ആവേശം അവസാന ഓവറിലേക്ക് നീണ്ട കളിയിലാണ് ലക്നൗവിന്റെ ത്രില്ലിങ് ജയം. മത്സരത്തിൽ ആദ്യം ബാറ്റ് ചെയ്ത ലക്നൗ സൂപ്പർ ജയന്റ്സ് നിശ്ചിത 20 ഓവറുകളിൽ 203/8 എന്ന സ്കോർ നേടിയപ്പോൾ, മുംബൈ ഇന്ത്യൻസിന്റെ മറുപടി 191/5 ൽ അവസാനിച്ചു. കൂറ്റൻ സ്കോർ പിന്തുടർന്ന കളിയുടെ പത്തൊൻപതാം ഓവറിൽ മോശം ഫോമിൽ ബാറ്റ് ചെയ്ത തിലക് വർമയെ റിട്ടയേഡ് ഔട്ടാക്കാൻ തീരുമാനിച്ച മുംബൈയുടെ നീക്കത്തിനും അവരുടെ തലവര മാറ്റാനായില്ല.തിലക് വർമ റിട്ടയേഡ് ഔട്ട്: തിലക് വർമ റിട്ടയേഡ് ഔട്ടായതാണ് മുംബൈ ഇന്ത്യൻസ് - ലക്നൗ സൂപ്പർ ജയന്റ്സ് മത്സരത്തിലെ ഏറ്റവും ശ്രദ്ധേയ സംഭവം. 204 റൺസ് വിജയലക്ഷ്യം പിന്തുടർന്ന കളിയിൽ അഞ്ചാം നമ്പരിൽ മുംബൈക്കായി ക്രീസിലെത്തിയ തിലക് വർമ, ദയനീയ ഫോമിലാണ് ബാറ്റ് വീശിയത്‌. ഒട്ടും ടച്ചിൽ അല്ലാതിരുന്ന അദ്ദേഹം സ്ട്രൈക്ക് റൊട്ടേറ്റ് ചെയ്യാൻ പോലും ബുദ്ധിമുട്ടി. ഇത് മറുവശത്ത് സൂര്യകുമാർ യാദവിനെ സമ്മർദ്ദത്തിലാക്കുകയും, മുംബൈയുടെ റിക്വയേഡ് റൺ റേറ്റ് ഉയർത്തുകയും ചെയ്തു.


മത്സരത്തിന്റെ പത്തൊൻപതാം ഓവറിനിടെ തിലക് വർമ റിട്ടയേഡ് ഔട്ടാവാൻ തീരുമാനിക്കുകയായിരുന്നു. ഈ സമയം 23 പന്തിൽ 25 റൺസ് മാത്രമായിരുന്നു അദ്ദേഹത്തിന്റെ സമ്പാദ്യം. സ്വയം ഔട്ടായ തിലക് വർമക്ക് പകരം ക്രീസിലേക്ക് വന്നത് മിച്ചൽ സാന്റ്നർ. ക്യാപ്റ്റൻ ഹാർദിക് പാണ്ഡ്യ അവസാന ഓവറിൽ ജയിക്കാനുള്ള ശ്രമം നടത്തിയെങ്കിലും ലക്ഷ്യത്തിൽ എത്തിയില്ല.

Also Read: അടുത്ത കളിക്ക് മുൻപ് സഞ്ജുവിന്റെ രാജസ്ഥാൻ റോയൽസിന് തലവേദന നൽകി ഇക്കാര്യങ്ങൾ; ടീമിന്റെ പ്രധാന ആശങ്ക ഇങ്ങനെ

നേരത്തെ 24 പന്തിൽ 46 റൺസ് നേടിയ നമൻ ധിറും, 43 പന്തിൽ 67 റൺസ് നേടിയ സൂര്യകുമാർ യാദവും ചേർന്ന് ഡ്രൈവിങ് സീറ്റിലെത്തിച്ച കളിയാണ് തിലകിന്റെ മോശം ഇന്നിങ്സ് മൂലം മുംബൈക്ക് കൈവിടേണ്ടി വന്നത്.

Also Read: അടുത്ത കളിയിൽ രാജസ്ഥാൻ റോയൽസിൽ ഈ നിർണായക മാറ്റങ്ങൾ വരും; സഞ്ജുവിന്റെ ടീം ഡബിൾ സ്ട്രോങ്ങാവാൻ പോകുന്നു

നേരത്തെ മത്സരത്തിൽ ആദ്യം ബാറ്റ് ചെയ്ത ലക്നൗ സൂപ്പർ ജയന്റ്സ് ഓപ്പണർമാരായ മിച്ചൽ മാർഷിന്റെയും ഐഡൻ മാർക്രത്തിന്റെയും അർധസെഞ്ചുറികളുടെ മികവിലായിരുന്നു കൂറ്റൻ സ്കോറിലേക്ക് കുതിച്ചത്. മാർഷ് 31 പന്തിൽ 60 റൺസും, മാർക്രം 38 പന്തിൽ 53 റൺസും നേടി. 19 പന്തിൽ 30 റൺസെടുത്ത ആയുഷ് ബഡോനിയും, 14 പന്തിൽ 27 റൺസ് നേടിയ ഡേവിഡ് മില്ലറും ‌ലക്നൗ‌ സ്കോർ 200 കടക്കുന്നതിൽ സുപ്രധാന പങ്ക് വഹിച്ചു.