യുകെയില്‍ ജനിച്ചുവളര്‍ന്ന പെണ്‍കുട്ടി, കോടികളുടെ ആസ്തി; ആരാണ് വിജയ് യുടെ ഭാര്യ സംഗീത സ്വര്‍ണലിംഗം?

അങ്ങനെ ഒരു വിവാഹ ബന്ധം കൂടെ അവസാനിക്കുകയാണ്. 25 വര്‍ഷത്തെ ദാമ്പത്യ ജീവിതത്തിന് ശേഷമാണ് വിജയ് യും സംഗീത സ്വര്‍ണ ലിംഗവും തമ്മിലുള്ള വിവാഹ ബന്ധം അവസാനിക്കാന്‍ പോകുന്നത്. മക്കള്‍ക്ക് 25 ഉം 20 ഉം വയസ്സായി നില്‍ക്കെ, അച്ഛന്റെ അവിഹിത ബന്ധത്തെ തുടര്‍ന്നാണ് അമ്മ കോടതിയില്‍ കേസ് നല്‍കിയിരിക്കുന്നത്. മറ്റൊരു നടിയുമായുള്ള ബന്ധം തനിക്ക് മാനസിക വേദനയും മക്കള്‍ക്ക് നാണക്കേടും ഉണ്ടാക്കുന്നു എന്ന് ഹര്‍ജിയില്‍ സംഗീത പറയുന്നു

ഇത്രയും കാലം എല്ലാം സഹിച്ച് മൗനം പാലിച്ചത് സോഷ്യല്‍ മീഡിയയില്‍ ഇതൊരു ചര്‍ച്ചയാവരുത് എന്ന് കരുതിയാണ്. വിജയ് യുടെ രാഷ്ട്രീയ ഭാവിയും സമൂഹത്തിലെ സ്റ്റാര്‍ഡവും കണക്കിലെടുത്ത് ഒരു മ്യൂച്വല്‍ ഡിവോഴ്‌സിന് ശ്രമിച്ചുവെങ്കിലും, വിജയ് അതിനോട് പ്രതികരിക്കാത്തതിനാലും കൂടുതല്‍ മാനസിക സമ്മര്‍ദ്ദത്തിലേക്ക് നയിക്കുകയും ചെയ്തതിനാലാണ് സംഗീതയ്ക്ക് ഇപ്പോള്‍ ഇങ്ങനെ ഒരു തീരുമാനം എടുക്കേണ്ടി വന്നത്.

ഹര്‍ജിയില്‍ വ്യക്തമായി പറയുന്ന ഒന്നാണ് യുകെ പൗരത്വമുള്ള ആളാണ് സംഗീത സ്വര്‍ണലിംഗം എന്ന്. യുകെയില്‍ വച്ചായിരുന്നു ഇരുവരുടെയും ആദ്യത്തെ വിവാഹം. പിന്നീട് ചെന്നൈയില്‍ വച്ച് ഹിന്ദു ആക്ട് പ്രകാരവും വിവാഹം നടന്നു. ഇത്രയധികം ബോള്‍ഡ് ആയി ഇങ്ങനെ ഒരു തീരുമാനം എടുക്കാന്‍ തുനിഞ്ഞ സംഗീത ശരിക്കും ആരാണ് എന്ന് സോഷ്യല്‍ മീഡിയ ഇപ്പോള്‍ തിരയുന്നു.

Also Read: ആ നടിയുമായുള്ള ബന്ധം അവസാനിപ്പിക്കും എന്ന് വാക്ക് നല്‍കിയിട്ടും ചെയ്തില്ല, മാനസികമായി പീഡിപ്പിച്ചു; സംഗീതയുടെ ആരോപണങ്ങള്‍

48 വയസ്സാണ് ഇന്ന് സംഗീതയുടെ പ്രായം, കോടികള്‍ ആസ്തിയുമുണ്ട്. ശ്രീലങ്കന്‍ തമിഴ് വംശജരാണ് സംഗീതയുടെ കുടുംബം. അറിയപ്പെടുന്ന ഇന്റസ്ട്രിയലിസ്റ്റാണ് സംഗീതയുടെ അച്ഛന്‍. ചെന്നൈയിലും ശ്രീലങ്കയിലും എല്ലാം ബിസിനസ്സ് ഉണ്ടെങ്കിലും കുടുംബത്തിന്റെ പ്രധാന ബിസിനസ്സുകള്‍ എല്ലാം ലണ്ടനിലാണ്. സംഗീത ജനിച്ചതും വളര്‍ന്നതും, ഇപ്പോള്‍ ജീവിക്കുന്നതും ലണ്ടനില്‍ തന്നെയാണ്. മകള്‍ സാഷ സംഗീതയ്‌ക്കൊപ്പം ലണ്ടനില്‍ നിന്നാണ് പഠിക്കുന്നത്. മകന്‍ സഞ്ജയും അമ്മയ്‌ക്കൊപ്പം തന്നെയാണ്. സംവിധായകനായ സഞ്ജയ് സിനിമ ആവശ്യങ്ങള്‍ക്ക് വേണ്ടി ഇന്ത്യയിലും നില്‍ക്കാറുണ്ട്.

സംഗീതയുടെ പേരില്‍ അച്ഛന്‍ സ്വര്‍ണലിംഗത്തിന് ലണ്ടനില്‍ നാനൂറ് കോടി രൂപയുടെ ബിസിനസ്സുണ്ടെന്നാണ് റിപ്പോര്‍ട്ടുകള്‍. അഞ്ച് വര്‍ഷമായി വിജയില്‍ നിന്ന് വേര്‍പിരിഞ്ഞ് കഴിയുന്ന സംഗീത ആ ബിസിനസ്സുകള്‍ നോക്കി നടത്തുകയായിരുന്നു ഇതുവരെ. ഇനി അങ്ങോട്ടും ബിസിനസ്സുമായി സംഗീത മുന്നോട്ടുപോകും. വിജയ് യുടെ രാഷ്ട്രീയത്തിലോ സ്റ്റാര്‍ഡത്തിലോ ഒന്നും സംഗീതയ്ക്ക് താത്പര്യമില്ല, അതിന്റെ പേരിലുള്ള ന്യൂസ് ഹെഡ്‌ലൈന്‍സിനും താത്പര്യമില്ല.

വിജയ് യുടെ കടുത്ത ആരാധികയായിരുന്നു സംഗീത. ആദ്യ സിനിമയായ പൂവെ ഉനക്കാകെ കണ്ടപ്പോള്‍ മുതല്‍ ആ ഇഷ്ടം തോന്നി. വിജയിയെ കാണാന്‍ വേണ്ടി മാത്രം സംഗീത ഇന്ത്യയിലെത്തി, ചെന്നൈ ഫിലിം സിറ്റിയില്‍ വച്ച് ആദ്യമായി കണ്ടുമുട്ടുകയും ചെയ്തു. ആദ്യ കൂടിക്കാഴ്ചയില്‍ തന്നെ സംഗീതയുടെ പെരുമാറ്റവും സംസാരവും ഇഷ്ടപ്പെട്ട വിജയ് സംഗീതയെ വീട്ടിലേക്ക് ക്ഷണിച്ചു. വിജയ് യുടെ അച്ഛനും അമ്മയ്ക്കും സംഗീതയോട് ഒരു ഇഷ്ടം തോന്നി. വിജയ് യുടെയും ഇഷ്ടം തിരിച്ചറിഞ്ഞ് അച്ഛനും അമ്മയും അതൊരു അറേഞ്ച്ഡ് മാര്യേജിലേക്ക് എത്തിക്കുകയായിരുന്നു. 1998 ല്‍ യുകെയില്‍ വച്ച് ക്രിസ്ത്യന്‍ ആചാര പ്രകാരവും, ഒന്‍പത് മാസങ്ങള്‍ക്ക് ശേഷം 1999 ല്‍ ഇന്ത്യയില്‍ വച്ച് ഹിന്ദു ആചാര പ്രകാരവും വിവാഹം നടന്നു.