'രാജസ്ഥാൻ താരങ്ങൾ കളിക്കുന്നത് ബുദ്ധി ഉപയോഗിക്കാതെ, ദ്രാവിഡ് പരിശീലകനായിട്ടും ഗുണമുണ്ടായില്ല'; വിമർശിച്ച് ഇതിഹാസം

Edited byഅനുഷ ഗംഗാധരൻ | Samayam Malayalam | Updated: 25 Apr 2025, 4:20 pm

കഴിഞ്ഞ ദിവസം റോയൽ ചലഞ്ചേഴ്‌സ് ബാംഗ്ലൂരുവിനോടും പരാജയപ്പെട്ട രാജസ്ഥാൻ റോയൽസിന് നേരെ വിമർശങ്ങൾ ഉയരുകയാണ്. ജയം ഉറപ്പിച്ച ഘട്ടം ഉണ്ടായിരുന്നിട്ടും വീണ്ടും മധ്യനിരയുടെ താളം തെറ്റിയുള്ള പ്രകടനം രാജസ്ഥാൻ റോയൽസിന് വിനയായി, മുൻ ഇന്ത്യൻ ക്രിക്കറ്റ് താരങ്ങൾ വരെ റോയൽസിനെ വിമർശിച്ച് രംഗത്തെത്തി.
ചരിത്രത്തിൽ ഇടം പിടിക്കാൻ ധോണിയും; ഇന്ന് സ്വന്തമാക്കുക മറ്റൊരു പൊൻതൂവൽഇപ്പോഴിതാ രാജസ്ഥാൻ റോയൽസിനെതിരെ രൂക്ഷ വിമർശനം ഉയർത്തി രംഗത്തെത്തിയിരിക്കുകയാണ് ഇന്ത്യൻ ക്രിക്കറ്റ് ഇതിഹാസം സുനിൽ ഗവാസ്‌കർ. ഇതുവരെ കളിച്ച ഒൻപത് മത്സരങ്ങളിൽ ഏഴിലും തോറ്റ രാജസ്ഥാൻ റോയൽസിന് പ്ലേ ഓഫ് സാധ്യത പോലും മങ്ങിയിരിക്കുകയാണ്. ഈ സാഹചര്യത്തിലാണ് വിമർശനവുമായി ഇതിഹാസം തന്നെ രംഗത്തെത്തുന്നത്.
രാഹുൽ ദ്രാവിഡിനെ പോലൊരു പ്രതിഭ പരിശീലകൻറെ റോളിൽ കൂടെയുണ്ടായിട്ടും റോയൽസ് കളിക്കുന്നത് ബുദ്ധിരഹിതമായ ക്രിക്കറ്റാണ് എന്ന് ഗവാസ്‌കർ കുറ്റപ്പെടുത്തി. 'റോയൽ ചലഞ്ചേഴ്സ് ബെംഗളൂരുവിന് എതിരായ രാജസ്ഥാൻ റോയൽസിൻറെ മത്സരം കാണാൻ ഞാൻ മൈതാനത്തുണ്ടായിരുന്നു. ഏത് തരം ക്രിക്കറ്റാണ് അവർ കളിക്കുന്നതെന്ന് അതിനാൽ തന്നെ നേരിട്ട് കാണാനായി. രാഹുൽ ദ്രാവിഡിനെ പോലൊരാൾ കോച്ചായിട്ടും ബുദ്ധിശൂന്യമായ ക്രിക്കറ്റാണ് രാജസ്ഥാൻ റോയൽസ് കളിക്കുന്നത്, ദ്രാവിഡ് പരിശീലകനായി ടീമിലുള്ളപ്പോൾ അത് ചിന്തിക്കാൻ പോലും കഴിയാത്ത കാര്യമാണ്.

ദ്രാവിഡ് കൃത്യതയോടെ ചിന്തിക്കുന്നയാളാണ്. എന്നാലത് ചില രാജസ്ഥാൻ റോയൽസ് താരങ്ങളിലേക്ക് എത്തിയിട്ടില്ല എന്നാണ് എനിക്ക് തോന്നുന്നത്. രാജസ്ഥാൻ റോയൽസിൽ ചിന്താ പ്രക്രിയ എവിടെയാണ്. പരിചയസമ്പത്തില്ലാത്ത താരങ്ങൾ എപ്പോഴും ശരിയായ കാര്യങ്ങൾ ചെയ്യുമെന്ന് പ്രതീക്ഷിക്കാനാവില്ല' എന്നും സുനിൽ ഗവാസ്‌കർ പറഞ്ഞു.

അതേസമയം പരിശീലകൻ രാഹുൽ ദ്രാവിഡിനെ വിമർശിച്ച് സോഷ്യൽ മീഡിയയിൽ പ്രതികരിക്കുന്ന ആരാധകരെയും കാണാൻ സാധിക്കും. സഞ്ജു സാംസണും രാഹുൽ ദ്രാവിഡും നല്ല ബന്ധത്തിൽ അല്ലന്നും പല തീരുമാനങ്ങളും സഞ്ജു അറിയുന്നില്ല എന്നും ഇതിന് കാരണം പരിശീലകൻ രാഹുൽ ദ്രാവിഡ് ആണെന്നുമാണ് ആരാധകരിൽ ചിലർ സമൂഹമാധ്യമങ്ങളിൽ കുറിച്ചത്. എന്നാൽ വാർത്ത സമ്മേളനത്തിൽ ഇതിനെ കുറിച്ച് ചോദിച്ചപ്പോൾ അത്തരം ആരോപണങ്ങൾ എല്ലാം രാഹുൽ ദ്രാവിഡ് തള്ളി.

താനും സഞ്ജുവുമായി നല്ല ബന്ധത്തിൽ ആണെന്നും ടീമിന്റെ എല്ലാ തീരുമാനങ്ങളിലും സഞ്ജുവിന്റെ അറിവുണ്ട് എന്നും ദ്രാവിഡ് വാർത്താസമ്മേളനത്തിൽ പറഞ്ഞു. അതേസമയം കഴിഞ്ഞ ദിവസം ചിന്നസ്വാമി സ്റ്റേഡിയത്തിൽ റോയൽ ചലഞ്ചേഴ്സ് ബെംഗളൂരുവിനോട് 11 റൺസിൻറെ തോൽവി വഴങ്ങിയതോടെ ഐപിഎൽ പതിനെട്ടാം സീസണിൽ ഏഴാം പരാജയമാണ് രാജസ്ഥാൻ റോയൽസ് നേരിട്ടത്. തുടർച്ചയായി അഞ്ച് മത്സരങ്ങളിൽ ഈ സീസണിൽ റോയൽസ് തോറ്റു. ഇനി അഞ്ച് മത്സരങ്ങൾ കൂടിയാണ് റോയൽസിന് ഈ സീസണിൽ ബാക്കിയുള്ളത്. ഇതിൽ എല്ലാം ഉയർന്ന റൺ റേറ്റിൽ ജയിക്കാൻ സാധിച്ചാൽ മാത്രമേ പ്ലേ ഓഫിലേക്ക് കടക്കാൻ സാധ്യതയുള്ളു.