രാജസ്ഥാൻ റോയൽസിന്റെ വമ്പൻ റെക്കോഡ് തകർത്ത് ഗുജറാത്ത് ടൈറ്റൻസ്; ഐപിഎല്ലിൽ കുറിച്ചത് പുതുചരിത്രം

Samayam Malayalam | Updated: 3 Apr 2025, 1:34 am

Samayam Malayalamഗുജറാത്ത് ടൈറ്റൻസ്

2025 സീസൺ ഇന്ത്യൻ പ്രീമിയർ ലീഗിൽ ( IPL 2025 ) തോറ്റുകൊണ്ടു തുടങ്ങിയ ഗുജറാത്ത് ടൈറ്റൻസ് പിന്നീട് കളിച്ച രണ്ട് മത്സരങ്ങളിലും ജയിച്ചുനിൽക്കുകയാണ്. ബുധനാഴ്ച നടന്ന മത്സരത്തിൽ കരുത്തരായ റോയൽ ചലഞ്ചേഴ്സ് ബംഗളൂരുവിനെയാണ്, ശുഭ്മാൻ ഗില്ലിന്റെ ഗുജറാത്ത് തകർത്തത്. എട്ട് വിക്കറ്റിന്റെ ആധികാരിക ജയമാണ് ഈ കളിയിൽ അവർ നേടിയത്. മത്സരത്തിൽ ആദ്യം ബാറ്റ് ചെയ്ത ആർസിബി ഉയർത്തിയ 170 റൺസ് വിജയലക്ഷ്യം വെറും 17.5 ഓവറുകളിൽ ഗുജറാത്ത് മറികടന്നു. ജയത്തോടെ ഐപിഎൽ പോയി‌ന്റ് പട്ടികയിൽ നാലാം സ്ഥാനത്തേക്ക് കയറാനും ഗുജറാത്തിനായി.അതേ സമയം ആർസിബിക്ക് എതിരായ ജയത്തോടെ ഐപിഎല്ലിലെ ഒരു കിടിലൻ റെക്കോഡും ഗുജറാത്ത് ടൈറ്റൻസ് സ്വന്തമാക്കി. ഇന്ത്യൻ പ്രീമിയർ ലീഗിൽ ഏറ്റവും വേഗത്തിൽ 30 വിജയങ്ങൾ നേടുന്ന ടീമെന്ന റെക്കോഡാണ് ഇപ്പോൾ ഗുജറാത്ത് ടൈറ്റൻസ് സ്വന്തമാക്കിയിരിക്കുന്നത്. ഇതിഹാസ താരം ഷെയ്ൻ വോണിന് കീഴിൽ രാജസ്ഥാൻ റോയൽസ് സ്വന്തമാക്കിയ 14 വർഷം പഴക്കമുള്ള റെക്കോഡാണ് ഇപ്പോൾ പഴങ്കഥയായിരിക്കുന്നത്.


വെറും 48 മത്സരങ്ങളിൽ നിന്ന് 30 ജയം നേടിയാണ് ഗുജറാത്ത് ഐപിഎൽ റെക്കോഡ് സ്വന്തമാക്കിയത്. 51 കളികളിൽ 30 ജയം സ്വന്തമാക്കിയ രാജസ്ഥാൻ റോയൽസിന്റെ പേരിലായിരുന്നു ഇത്രയും നാൾ ഇക്കാര്യത്തിലെ റെക്കോഡ്. 2011 സീസൺ ഐപിഎല്ലി ലായിരുന്നു ഷെയ്‌ൻ വോണിന്റെ രാജസ്ഥാൻ റോയൽസ് ഈ നേട്ടം സ്വന്തമാക്കിയത്. 52 കളികളിൽ നിന്ന് 30 ജയം നേടിയ മുംബൈ ഇന്ത്യൻസ്, 53 കളികളിൽ 30 ജയം സ്വന്തമാക്കിയ ചെന്നൈ സൂപ്പർ കിങ്സ് എന്നിവരാണ് ഈ ലിസ്റ്റിൽ പിന്നാലെയുള്ളത്.

Also Read: രാജസ്ഥാൻ റോയൽസ് കാണിച്ച ഏറ്റവും വലിയ മണ്ടത്തരം, നേട്ടമായത് ഗുജറാത്ത് ടൈറ്റൻസിന്; ഇത്തവണ മിന്നും ഫോമിൽ ജോസ് ബട്ലർ

കിടില‌ൻ ജയം നേടി ഗുജറാത്ത് ടൈറ്റൻസ്: റോയൽ ചലഞ്ചേഴ്സ് ബംഗളൂരുവിന് എതിരായ കളിയിൽ ആധികാരിക ജയമായിരുന്നു ഗുജറാത്ത് ടൈറ്റൻസിന്റേത്. മത്സരത്തിൽ ആദ്യം ബാറ്റ് ചെയ്ത ആർസിബി നിശ്ചിത 20 ഓവറുകളിൽ 169/8 എന്ന സ്കോറാണ് നേടിയത്. 54 റ‌ൺസ് നേടിയ ലിയാം ലിവിങ്സ്റ്റണാണ് അവരുടെ ടോപ് സ്കോറർ. ജിതേഷ് ശർമ 33 റൺസും ടിം ഡേവിഡ് 32 റൺസും നേടി. ഗുജറാത്ത് ടൈറ്റൻസിന് വേണ്ടി മുഹമ്മദ് സിറാജ് മൂന്ന് വിക്കറ്റുകൾ വീഴ്ത്തി.

170 റൺസ് വിജയലക്ഷ്യം പി‌ന്തുടർന്ന ഗുജറാത്ത് ടൈറ്റൻസ് വെറും 17.5 ഓവറുകളിൽ വിജയത്തിലേക്ക് എത്തുകയായിരുന്നു. 14 റൺസെടുത്ത ശുഭ്മാൻ ഗില്ലിന്റെ വിക്കറ്റ് ഗുജറാത്തിന് പെട്ടെന്ന് തന്നെ നഷ്ടമായെങ്കിലും സായ് സുദർശനും, ജോസ് ബട്ലറും ചേർന്ന് ടീമിന്റെ ജയം അനായാസമാക്കുകയായിരുന്നു‌.

സായ് സുദർശൻ 36 പന്തുകളിൽ 49 റൺസ് നേടിയപ്പോൾ ജോസ് ബട്ലർ 39 പന്തിൽ 73 റൺസ് നേടി പുറത്താകാതെ നിന്നു‌. അഞ്ച് ഫോറുകളും ആറ് സിക്സറുകളും ബട്ലറുടെ ബാറ്റിൽ നി‌‌ന്ന് പിറന്നു. നാലാം നമ്പരിൽ ഇറങ്ങിയ റൂതർഫോഡ് 18 പന്തിൽ 30 റൺസെടുത്ത് മിന്നിയതോടെ ഗുജറാത്ത് 13 പന്തുകൾ ബാക്കി നിൽക്കെ കളി ജയിക്കുകയായിരുന്നു.