രാജസ്ഥാൻ റോയൽസിൽ പുതിയ പ്രശ്നം? റിയാൻ പരാഗും തുഷാർ ദേഷ്പാണ്ടെയും തമ്മിൽ ടൈമൗട്ടിനിടെ ഉടക്ക്, വീഡിയോ വൈറൽ

Curated byഗോകുൽ എസ് | Samayam Malayalam | Updated: 30 Apr 2025, 1:43 am

2025 സീസൺ ഇന്ത്യൻ പ്രീമിയർ ലീഗിൽ നിരാശാജനകമായ പ്രകടനമാണ് രാജസ്ഥാൻ റോയൽസിന്റേത്‌ ( Rajasthan Royals ). ആദ്യ 10 കളികളിൽ ഏഴിലും തോറ്റ അവർ നിലവിൽ പോയിന്റ് പട്ടികയിൽ എട്ടാം സ്ഥാനത്താണ്. ടീമിന്റെ മോശം പ്രകടനങ്ങൾക്കിടെ ഇപ്പോളിതാ താരങ്ങൾ തമ്മിലുള്ള ബന്ധവും അത്ര സുഖകരമല്ല എന്ന സൂചനകൾ പുറത്തുവന്നിരിക്കുന്നു. രാജസ്ഥാൻ റോയൽസും ഗുജറാത്ത് ടൈറ്റൻസും തമ്മിൽ നടന്ന കളിയുടെ ടൈമൗട്ടിനിടെ നടന്ന ഒരു സംഭവമാണ് ഇപ്പോൾ ക്രിക്കറ്റ് ലോകത്ത് ചർച്ചയാകുന്നത്. ടീമിന്റെ താൽക്കാലിക നായകനായ റിയാൻ പരാഗും ( Riyan Parag ), തുഷാർ ദേഷ്പാണ്ടെയും തമ്മിലുള്ള സംഭാഷണത്തിന്റെ വീഡിയോ ആണ് ഇപ്പോൾ പുറത്തു വന്നിരിക്കുന്നത്. പരാഗ്, ദേഷ്പാണ്ടെയുടെ നേർക്ക് വിരൽ ചൂണ്ടി ദേഷ്യത്തോടെ സംസാരിക്കുന്നത് പുറത്തുവന്ന വീഡിയോയിൽ കാണാം. എന്നാൽ രാജസ്ഥാൻ റോയൽസിന്റെ ബൗളിങ് പരിശീലകനായ ഷെയിൻ ബോണ്ട് ഇടപെടുകയും പരാഗിനെ വിളിച്ചുകൊണ്ട് പോവുകയുമായിരുന്നു. സംഭവത്തിന് പിന്നിലെ കാരണം എന്താണെന്ന കാര്യത്തിൽ ഇതുവരെ പക്ഷേ വ്യക്തത വന്നിട്ടില്ല. എന്നാൽ മോശം പ്രകടനങ്ങൾക്കിടെ ടീമിന് കൂടുതൽ തലവേദന സമ്മാനിക്കുന്നതാണ് ഇത്തരം സംഭവങ്ങൾ.

അതേ സമയം സഞ്ജു സാംസൺ പരിക്കേറ്റ് പുറത്തായതിനാൽ നിലവിൽ രാജസ്ഥാൻ റോയൽസിനെ നയിക്കുന്നത് റിയാൻ പരാഗാണ്. ഈ സീസണിൽ റോയൽസ് കളിച്ച 10 മത്സരങ്ങളിൽ ആറിലും ടീമിനെ നയിച്ചത് അദ്ദേഹമാണ്. ഈ സീസണിൽ 33.25 ബാറ്റിങ് ശരാശരിയിൽ 266 റൺസാണ് താരത്തിന്റെ സമ്പാദ്യം.

അടുത്ത കളിക്ക് മുൻപ് രാജസ്ഥാൻ റോയൽസിന് കനത്ത തിരിച്ചടി; സൂപ്പർ താരത്തിന്റെ കാര്യത്തിൽ സുപ്രധാന അപ്ഡേറ്റ് പുറത്ത്
തുഷാർ ദേഷ്പാണ്ടെയാകട്ടെ ഇക്കഴിഞ്ഞ ഐപിഎൽ മെഗാ ലേലത്തിൽ വമ്പൻ തുകക്ക് രാജസ്ഥാൻ റോയൽസിലെത്തിയ താരമാണ്. എന്നാൽ ടീമിന്റെ പ്രതീക്ഷകൾക്കൊത്ത് ഉയരാൻ ഇതുവരെ താരത്തിന് സാധിച്ചിട്ടില്ല. എട്ട് കളികളിൽ ആറ് വിക്കറ്റുകൾ മാത്രമാണ് ഈ സീസണിൽ ദേഷ്പാണ്ടെക്ക്‌ വീഴ്ത്താനായത്. 11.25 ആണ് താരത്തിന്റെ എക്കോണമി.

വൈഭവ് സൂര്യവംശി ഉടൻ ഇന്ത്യയുടെ ടി20 ടീമിലെത്തും, കിടിലൻ സെഞ്ചുറിക്ക് പിന്നാലെ പ്രതീക്ഷകളുമായി താരത്തിന്റെ പരിശീലകൻ
ഐപിഎല്ലിൽ ഇക്കുറി തുടർച്ചയായ അഞ്ച് മത്സരങ്ങളിൽ തോറ്റ രാജസ്ഥാൻ റോയൽസ് അവസാന മത്സരത്തിൽ ഗുജറാത്ത് ടൈറ്റൻസിനെ വീഴ്ത്തി വിജയവഴിയിലേക്ക് തിരിച്ചെത്തിയിരുന്നു. കൗമാര താരം വൈഭവ് സൂര്യവംശി നിറഞ്ഞാടിയ മത്സരത്തിൽ എട്ട് വിക്കറ്റിനായിരുന്നു റോയൽസിന്റെ വിജയം. മെയ് ഒന്നാം തീയതിയാണ് റോയൽസിന്റെ അടുത്ത മത്സരം. മിന്നും ഫോമിലുള്ള മുംബൈ ഇന്ത്യൻസാണ് എതിരാളികൾ.