രാജസ്ഥാൻ റോയൽസിൽ വമ്പൻ മാറ്റം വരും, ഈ അഞ്ച് സൂപ്പർ താരങ്ങൾ ടീമിൽ നിന്ന് പുറത്താകാൻ സാധ്യത

Curated byഗോകുൽ എസ് | Samayam Malayalam | Updated: 3 May 2025, 1:31 am

2025 സീസൺ ഇന്ത്യൻ പ്രീമിയർ ലീഗിൽ പ്ലേ ഓഫ് കാണാതെ പുറത്തായ രണ്ടാമത്തെ ടീമാണ് രാജസ്ഥാൻ റോയൽസ്. കഴിഞ്ഞ ദിവസം നടന്ന മത്സരത്തിൽ മുംബൈ ഇന്ത്യൻസിനോട് കനത്ത തോൽവി ഏറ്റുവാങ്ങിയതോടെയാണ് ടീമിന്റെ പ്ലേ ഓഫ് പ്രതീക്ഷകൾ അവസാനിച്ചത്. 11 കളികളിൽ മൂന്ന് വിജയങ്ങൾ മാത്രം നേടിയ രാജസ്ഥാൻ റോയൽസിന് ആകെ ആറ് പോയിന്റുകൾ മാത്രമാണ് ഇതുവരെ നേടാനായത്. കഴിഞ്ഞ സീസൺ വരെ കിടിലൻ സ്ക്വാഡ് ഒപ്പമുണ്ടായിരുന്ന റോയൽസ് മെഗാ ലേലത്തോടെയാണ് തകർന്നത്. മെഗാ ലേലത്തിന് മു‌ൻപുള്ള റിട്ടൻഷൻ സമയത്ത് ടീമെടുത്ത പല തീരുമാനങ്ങളും അബദ്ധമെന്ന് അന്നേ വിലയിരുത്തപ്പെട്ടിരുന്നു. മെഗാ ലേലത്തിലും ടീമെടുത്ത തീരുമാനങ്ങൾ പലതും അബദ്ധമായി. ഈ സീസണിൽ സംഭവിച്ച തെറ്റുകളിൽ നിന്ന് പാഠമുൾക്കൊണ്ടാകും രാജസ്ഥാൻ റോയൽസ് അടുത്ത സീസണ് ഇറങ്ങുക. ഇക്കുറി വൻ ഫ്ലോപ്പായ ചില കളിക്കാർ ടീമിൽ നിന്ന് പുറത്താകുമെന്ന കാര്യം ഏറെക്കുറെ ഉറപ്പാണ്. അത്തരത്തിൽ റോയൽസിൽ നിന്ന് ഒഴിവാക്കേണ്ട / ഒഴിവാക്കാൻ സാധ്യതയുള്ള അഞ്ച് താരങ്ങളെ നോക്കാം.


ഈ സീസണ് മുൻപ് രാജസ്ഥാൻ റോയൽസെടുത്ത ഏറ്റവും മോശം തീരുമാനമാണ് ഷിംറോൺ ഹെറ്റ്മെയറെ ടീമിൽ നിലനിർത്തിയത്. 11 കോടി രൂപക്ക് റിട്ടെയിൻ ചെയ്ത ഹെറ്റി ഈ സീസണിൽ വൻ ഫ്ലോപ്പായി. ടീമിന്റെ പ്രധാന ഫിനിഷറായി കളിച്ച ഹെറ്റ്മെയർ ആദ്യ 11 കളികളിൽ നിന്ന് 187 റൺസ് മാത്രമാണ് സ്വന്തമാക്കിയത്.

പല കളികളിലും ചേസിങ്ങ് സമയത്ത് ഹെറ്റ്മെയറുടെ പ്രകടനം ദയനീയമായി. കഴിഞ്ഞ സീസണിലും നിരാശപ്പെടുത്തുന്ന പ്രകടനമായിരുന്നു ഈ വിൻഡീസ് താരത്തിന്റേത്. നിലവിൽ ടീമിന്റെ ബാധ്യതയായി മാറിക്കഴിഞ്ഞ ഹെറ്റ്മെയർ അടുത്ത സീസണിൽ റോയൽസിനൊപ്പമുണ്ടാകാൻ സാധ്യതയില്ല.

രാജസ്ഥാൻ റോയൽസ് ഇക്കുറി വൻ തുകക്ക് ടീമിൽ നിലനിർത്തിയ മറ്റൊരു സൂപ്പർ താരമാണ് ധ്രുവ് ജൂറൽ. 14 കോടി രൂപക്കാണ് ജൂറലിനെ അവർ റിട്ടെയിൻ ചെയ്തത്. എന്നാൽ ഈ സീസണിൽ താരത്തിന്റെ പ്രകടനം പ്രതീക്ഷക്ക് ഒത്തുയർന്നില്ല. 11 കളികളിൽ നിന്ന് ആകെ 249 റൺസ് മാത്രമാണ് ഈ യുവ വിക്കറ്റ് കീപ്പർ ബാറ്റർക്ക്‌ നേടാനായത്. 14 കോടി രൂപ വിലയുള്ള ജൂറലിനെ ഒഴിവാക്കിയാൽ ലേലത്തിൽ റോയൽസിന്റെ പേഴ്സ് ബാലൻസും മികച്ചതാകും.

തെരുവ് ക്രിക്കറ്റ് വൈബ്: പന്ത് കാണാനില്ല...! മുംബൈ കളിക്കാരും ക്യാമറാമാന്‍മാരും തിരച്ചിലില്‍; ആറ് റണ്‍സ് കൂടി നല്‍കണമെന്ന് ഗവാസ്‌കര്‍
കഴിഞ്ഞ ഐപിഎൽ മെഗാ ലേലത്തിൽ രാജസ്ഥാൻ റോയൽസ് വലിയ പ്രതീക്ഷകളോടെ സ്വന്തമാക്കിയ താരങ്ങളിൽ ഒരാളാണ് തുഷാർ ദേഷ്പാണ്ടെ. ഇന്ത്യൻ പേസറായ താരത്തെ സ്വന്തമാക്കാൻ 6.5 കോടി രൂപയാണ് റോയൽസ് മുടക്കിയത്. മുൻ സീസണുകളിൽ ചെന്നൈ സൂപ്പർ കിങ്സിന് വേണ്ടി കാഴ്ച വെച്ച മികച്ച പ്രകടനമായിരുന്നു താരത്തിൽ രാജസ്ഥാൻ റോയൽസിന്റെ കണ്ണുടക്കാൻ കാരണം. എന്നാൽ ഈ സീസണിൽ താരം ഫ്ലോപ്പായി. എട്ട് കളികളിൽ നിന്ന് ആറ് വിക്കറ്റുകൾ മാത്രമാണ് താരത്തിന് നേടാനായത്. എക്കോണമിയാകട്ടെ 11 ന് മുകളിലും. ടീമിനായി ഇക്കുറി ഒരു സംഭാവനയും നൽകാത്ത ഈ ഇന്ത്യൻ ഫാസ്റ്റ് ബൗളറെ അടുത്ത സീസണിൽ രാജസ്ഥാൻ റോയൽസ് ഒഴിവാക്കിയില്ലെങ്കിലാണ് അത്ഭുതം.

എന്തൊരു പതനം...! രാജസ്ഥാന്‍ റോയല്‍സ് നാണംകെട്ടു; റെക്കോഡ് തോല്‍വിയുമായി ഐപിഎല്ലില്‍ നിന്ന് പുറത്ത്
ദക്ഷിണാഫ്രിക്കൻ പേസ് ബൗളറായ ക്വെന മഫാക്കയേയും രാജസ്ഥാൻ റോയൽസ് ടീമിൽ നിന്ന് ഒഴിവാക്കാനാണ് സാധ്യത. മെഗാ ലേലത്തിൽ ഒന്നരക്കോടി രൂപക്ക് റോയൽസ് സ്വന്തമാക്കിയ താരമാണ് ദക്ഷിണാഫ്രിക്കൻ യുവ പേസറായ മഫാക്ക. എന്നാൽ ഒരവസരം പോലും റോയൽസ് താരത്തിന് നൽകിയില്ല. ടീമിന്റെ പദ്ധതികളിൽ ഇടമില്ലാത്ത മഫാക്ക ഒരു സീസൺ കൂടി റോയൽസിന് ഒപ്പമുണ്ടാകാൻ സാധ്യതയില്ല. അഫ്ഗാനിസ്താൻ പേസറായ ഫസൽഹഖ് ഫാറൂഖിക്കും ടീമിലെ സ്ഥാനം നഷ്ടമായേക്കും. ഈ സീസണിൽ കളിച്ച നാല് മത്സരങ്ങളിൽ ഒരു വിക്കറ്റ് പോലും താരത്തിന് നേടാനായില്ല.