രാജസ്ഥാൻ റോയൽസ് ടീമിൽ ഒരു വമ്പൻ മാറ്റം വരും, പുറത്താവുക ഈ താരം; അടുത്ത കളിക്ക് ടീം രണ്ടും കൽപ്പിച്ച്

Curated byഗോകുൽ എസ് | Samayam Malayalam | Updated: 12 May 2025, 11:44 pm

ഇന്ത്യ - പാക് സംഘർഷങ്ങളുടെ പശ്ചാത്തലത്തിൽ 2025 സീസൺ ഐപിഎൽ നിലവിൽ ഒരാഴ്ചത്തേക്ക് നിർത്തിവെച്ചിരിക്കുകയാണ്. ഈ മാസം 17 ന് ടൂർണമെന്റ് പുനരാരംഭിക്കുമെന്നുള്ള ബിസിസിഐയുടെ പ്രഖ്യാപനം തിങ്കളാഴ്ച എത്തിയിട്ടുണ്ട്. . പ്ലേ ഓഫ് അടക്കം ആകെ 17 മത്സരങ്ങളാണ് 2025 സീസൺ ഐപിഎല്ലിൽ ബാക്കിയുള്ളത്. ഐപിഎൽ, ചെറിയൊരു ഇടവേളക്ക് ശേഷം പുനരാരംഭിക്കുമ്പോൾ രാജസ്ഥാൻ റോയൽസ് ആരാധകർ വലിയ ആശ്വാസത്തിലാണ്. പരിക്കിനെ തുടർന്ന് പുറത്ത് നിൽക്കുകയായിരുന്ന നായകൻ സഞ്ജു സാംസണിന്റെ തിരിച്ചുവരവാണ് റോയൽസ് ആരാധകരെ ആവേശം കൊള്ളിക്കുന്നത്. പരിക്ക് മൂലം കഴിഞ്ഞ അഞ്ച് മത്സരങ്ങൾ നഷ്ടമായ സഞ്ജു പരിശീലനം പുനരാരംഭിച്ചിട്ടുണ്ട്. അടുത്ത മത്സരത്തിൽ താരം കളിക്കുമെന്നാണ് സൂചനകൾ. സഞ്ജു തിരിച്ചെത്തുന്നത് ടീമിന്റെ കരുത്ത് വർധിപ്പിക്കും. നിലവിൽ പോയിന്റ് പട്ടികയിൽ ഒൻപതാം സ്ഥാനത്താണ് രാജസ്ഥാൻ റോയൽസ്. പ്ലേ ഓഫ് സാധ്യതകൾ അവസാനിച്ചു കഴിഞ്ഞ അവർ ശേഷിക്കുന്ന രണ്ട് കളികളിൽ ജയം നേടി അഭിമാനത്തോടെ സീസൺ അവസാനിപ്പിക്കുകയാ വും ലക്ഷ്യമിടുന്നത്. സഞ്ജുവിന്റെ തിരിച്ചുവരവ് അതിന് സഹായിക്കുമെന്നാണ് ആരാധക പ്രതീക്ഷ.


പുതുക്കിയ ഫിക്സ്ചർ പ്രകാരം പഞ്ചാബ് കിങ്സിന് എതിരെയാണ് ഐപിഎല്ലിൽ രാജസ്ഥാൻ റോയൽസിന്റെ അടുത്ത മത്സരം. സഞ്ജു തിരിച്ചെത്തുന്ന പശ്ചാത്തലത്തിൽ ഈ കളിയിൽ റോയൽസിന്റെ പ്ലേയിങ് ഇലവനിൽ ചില സുപ്രധാന മാറ്റങ്ങൾ വരുമെന്ന കാര്യം ഉറപ്പാണ്‌. ഐപിഎല്ലിലെ അടുത്ത മത്സരത്തിൽ രാജസ്ഥാൻ നിരയിൽ വരാൻ സാധ്യതയുള്ള മാറ്റവും ടീമിന്റെ പ്ലേയിങ് ഇലവൻ സാധ്യതയും നോക്കാം.

യശസ്വി ജയ്സ്വാൾ, വൈഭവ് സൂര്യവംശി, സഞ്ജു സാംസൺ എന്നിവരാകും അടുത്ത കളിയിൽ രാജസ്ഥാൻ റോയൽസിന്റെ ടോപ് ഓർഡറിൽ ഇറങ്ങുക. ഇതിൽ സഞ്ജു, വൈഭവ് എന്നിവരിൽ ഒരാളാകും ജയ്സ്വാളിനൊപ്പം ഓപ്പൺ ചെയ്യുക. ഇതാരായിരിക്കുമെന്ന കാര്യത്തിൽ ആരാധകർക്ക് ആകാംക്ഷയുണ്ട്. നേരത്തെ സഞ്ജുവിന് പരിക്കേറ്റ പശ്ചാത്തലത്തിൽ ഓപ്പണിങ്ങിലേക്ക് വന്ന വൈഭവ് സൂര്യവംശി ഏതാനും കിടിലൻ ഇന്നിങ്സുകൾ ടീമിനായി കാഴ്ച വെച്ചിരുന്നു.

സഞ്ജു സാംസൺ തിരിച്ചെത്തി; രാജസ്ഥാൻ റോയൽസ് ടീമിൽ ഇനി നിർണായക മാറ്റങ്ങൾ; തകൃതിയായി ബാറ്റിങ് പരിശീലനം
സഞ്ജു തിരിച്ചെത്തുന്നതോടെ യുവ താരം കുനാൽ സിങ്ങ് റാത്തോർ ടീമിൽ നിന്ന് പുറത്താകും. കെകെആറിന് എതിരെ കളിക്കാനുണ്ടായിരുന്ന കുനാൽ സിങ്, അക്കൗണ്ട് തുറക്കാതെയായിരുന്നു പുറത്തായത്. റിയാൻ പരാഗ് തന്നെയാകും നാലാം നമ്പരിൽ. കഴിഞ്ഞ കളിയിൽ 95 റൺസെടുത്ത് കിടിലൻ പ്രകടനമായിരുന്നു പരാഗ് കാഴ്ച വെച്ചത്‌. പതിവുപോലെ ധ്രുവ് ജൂറലും, ഷിംറോൺ ഹെറ്റ്മെയറും മധ്യനിരയിലുണ്ടാകും. ഈ സീസണിൽ നിരാശാജനകമായ പ്രകടനമാണ് ഇരുവരുടേതും.

ജോഫ്ര ആർച്ചറാകും പേസ് നിരയെ നയിക്കുക. ഈ സീസണിൽ റോയൽസിന്റെ ബൗളിങ് നിരയിൽ മാന്യമായ പ്രകടനം കാഴ്ച വെച്ച താരമാണ് ഇംഗ്ലീഷ് പേസറായ ജോഫ്ര ആർച്ചർ. ആർച്ചറിന് കൂട്ടായി യുധ്വീർ സിങ്ങും ആകാശ് മധ്വാലുമാകും പേസ് നിരയിലുണ്ടാവുക. കഴിഞ്ഞ മത്സരത്തിൽ നിരാശാജനകമായ പ്രകടനമായിരുന്നു ഇരുവരുടേയും. സ്പിൻ നിരയിൽ ശ്രീലങ്കൻ താരങ്ങളായ മഹീഷ് തീക്ഷണ, വനിന്ദു ഹസരംഗ എന്നിവരാകും ഉണ്ടാവുക. വലിയ പ്രതീക്ഷകളോടെ ഇക്കുറി റോയൽസ് സ്വന്തമാക്കിയ താരങ്ങളാണ് ഇവർ. എന്നാൽ പ്രതീക്ഷിച്ച പ്രകടനം കാഴ്ച വെക്കാൻ ഇവർക്ക് സാധിച്ചിട്ടില്ല.

ആ ഐപിഎൽ നിയമം കൃത്യമായി ഉപയോഗിച്ച് സഞ്ജുവിന്റെ രാജസ്ഥാൻ റോയൽസ്; അടുത്ത സീസണിൽ ഇക്കാര്യം ടീമിന് ഗുണം ചെയ്യും
രാജസ്ഥാൻ റോയൽസിന്റെ സാധ്യത പ്ലേയിങ് ഇലവൻ ഇങ്ങനെ: യശസ്വി ജയ്സ്വാൾ, വൈഭവ് സൂര്യവംശി, സഞ്ജു സാംസൺ ( ക്യാപ്റ്റൻ ), റിയാൻ പരാഗ്, ധ്രുവ് ജൂറൽ, ഷിംറോൺ ഹെറ്റ്മെയർ, ജോഫ്ര ആർച്ചർ, വനിന്ദു ഹസരംഗ, മഹീഷ് തീക്ഷണ, യുധ്വീർ സിങ്, ആകാശ് മധ്വാൽ.