രാജസ്ഥാൻ റോയൽസ് ടീമിൽ നിന്ന് ഈ മൂന്ന് താരങ്ങളെ പുറത്താക്കണം; സഞ്ജുവിന്റെ ടീമിൽ വമ്പൻ മാറ്റങ്ങൾ അനിവാര്യം

Curated byഗോകുൽ എസ് | Samayam Malayalam | Updated: 25 Apr 2025, 1:46 am

2025 സീസൺ ഇന്ത്യൻ പ്രീമിയർ ലീഗിൽ തുടർച്ചയായ അഞ്ചാം പരാജയം ഏറ്റുവാങ്ങിയിരിക്കുകയാണ് രാജസ്ഥാൻ റോയൽസ് ( Rajasthan Royals) . വ്യാഴാഴ്ച നടന്ന മത്സരത്തിൽ കരുത്തരായ റോയൽ ചലഞ്ചേഴ്സ് ബംഗളൂരുവിനോട് 11 റൺസിന്റെ തോൽവിയാണ് റോയൽസ് ഏറ്റുവാങ്ങിയത്. ഇതോടെ ടീമിന്റെ പ്ലേ ഓഫ് പ്രതീക്ഷകളും ഏറെക്കുറെ അവസാനിച്ചു. ആർസിബിക്ക് എതിരെ ജയിക്കാമായിരുന്ന കളിയാണ് മധ്യനിര ബാറ്റർമാരുടെ ദയനീയ പ്രകടനം കൊണ്ട് രാജസ്ഥാൻ റോയൽസ് തോറ്റത്. ഇത് തുടർച്ചയായ മൂന്നാമത്തെ കളിയാണ് ജയിക്കാമായിരുന്ന നിലയിൽ നിന്ന് റോയൽസ് തോറ്റത്. ടീമിന്റെ ഈ ദയനീയ പ്രകടനത്തിൽ ആരാധകർ കട്ടകലിപ്പിലാണ് എന്നത് ഉറപ്പ്. രാജസ്ഥാൻ റോയൽസ് തുടർച്ചയായി പരാജയപ്പെടുമ്പോൾ ടീമിന്റെ മോശം ടീം സെലക്ഷൻ തന്നെയാണ് ആരാധകർ കാരണങ്ങളിലൊന്നായി ചൂണ്ടിക്കാട്ടുന്നത്.

തുടർച്ചയായി ഫ്ലോപ്പാകുന്ന ചില‌ താരങ്ങളെ പ്ലേയിങ് ഇലവനിൽ നിന്ന് മാറ്റാൻ തയ്യാറാകാത്ത പരിശീലകൻ രാഹുൽ ദ്രാവിഡിന്റെ മണ്ടത്തരം ടീമിന്റെ തോൽവിക്ക് പ്രധാന കാരണമാണെന്ന് സമൂഹ മാധ്യമങ്ങളിൽ അവർ ആഞ്ഞടിക്കുന്നു.‌ മികവുറ്റ ചില താരങ്ങളെ പുറത്തിരുത്തിയാണ് മോശം ഫോമിലുള്ള കളിക്കാരെ റോയൽസ് വീണ്ടും വീണ്ടും കളിപ്പിക്കുന്നത്. ഇവരെ മാറ്റാതെ ടീം രക്ഷപ്പെടില്ലെന്നാണ് ആരാധക‌പക്ഷം.

ഈ മാസം 28 ന് ഗുജറാത്ത് ടൈറ്റൻസിന് എതിരെയാണ് രാജസ്ഥാൻ റോയൽസിന്റെ അടുത്ത മത്സരം. മോശം ഫോമിലുള്ള മൂന്ന് താരങ്ങളെ ഈ കളിയിൽ രാജസ്ഥാൻ റോയൽസ് ടീമിൽ നിന്ന് ഒഴിവാക്കേണ്ടതുണ്ട്. അത്തരത്തിൽ റോയൽസ് ടീമിൽ നിന്ന് പുറത്താക്കേണ്ട മൂന്ന് കളിക്കാർ ആരൊക്കെയെന്ന് നോക്കാം.

കഴിഞ്ഞ ഐപിഎൽ മെഗാലേലത്തിൽ രാജസ്ഥാൻ റോയൽസ് വലിയ പ്രതീക്ഷയോടെ സ്വന്തമാക്കിയ താരമാണ് തുഷാർ ദേഷ്പാണ്ടെ. എന്നാൽ താരം വൻ ഫ്ലോപ്പാകുന്നതാണ് ഇക്കുറി കണ്ടത്. എട്ട് കളികളിൽ നിന്ന് ആറ് വിക്കറ്റുകൾ മാത്രമാണ് താരം വീഴ്ത്തിയത്. റൺസ് വിട്ടു കൊടുക്കുന്ന തിലും താരം പിശുക്ക് കാണിക്കുന്നില്ല.

ആർസിബിക്ക് എതിരായ കളിയിൽ രണ്ടോവർ മാത്രമെറിഞ്ഞ ദേഷ്പാണ്ടെ 36 റൺസാണ് വിട്ടുകൊടുത്തത്. ആകാശ് മധ്വാലിനെപ്പോലെ മികച്ച ബോളർമാർ പുറത്തിരിക്കുമ്പോളാണ് ദേഷ്പാ‌‌ണ്ടെക്ക് റോയൽസ് വീ‌ണ്ടും വീണ്ടും അവസരം നൽകുന്നത്. അടുത്ത കളിയിലെങ്കിലും തുഷാറിനെ മാറ്റി ആകാശ് മധ്വാലിനെ കളിപ്പിക്കാൻ റോയൽസ് തയ്യാറാവണം.

ഇത്തവണ രാജസ്ഥാൻ റോയൽസിൽ ദയനീയ ഫോമിൽ കളിക്കുന്ന മറ്റൊരു താരം ധ്രുവ് ജൂറലാണ്. 14 കോടി രൂപക്ക് റോയൽസ് റിട്ടെയിൻ ചെയ്ത ജൂറലിന് ആദ്യ ഒമ്പത് കളികളിൽ ആകെ ഒരു അർധസെഞ്ചുറി മാത്രമാണ് സ്കോർ ചെയ്യാൻ സാധിച്ചത്. ഇതിൽ പല കളികളിലും താരത്തിന്റെ ഇന്നിങ്സുകൾ ടീമിനെ പിന്നോട്ടടിച്ചിരുന്നു.

ആർസിബിക്ക് എതിരായ കളിയിൽ 34 പന്തിൽ 47 റൺസ് നേടിയെങ്കിലും ഒരു ഘട്ടത്തിൽ 23 പന്തിൽ 18 റൺസെന്ന നിലയിലായിരുന്നു ജൂറൽ. ഈ മെല്ലെപ്പോക്ക് തന്നെയാണ് റോയൽസിന്റെ റിക്വയേഡ് റൺ റേറ്റ് ഉയർത്തിയത്. മോശം ഫോമിലുള്ള ജൂറലിനെ അടുത്ത കളിയിൽ ടീമിൽ നിന്ന് മാറ്റി പകരം കുനാൽ സിങ് റാത്തോറിന് ഒരവസരം നൽകാൻ റോയൽസ് തയ്യാറാകണം.

രാജസ്ഥാൻ റോയൽസ് ടീമിൽ നിന്ന് പുറത്താക്കേണ്ട മറ്റൊരു താരം വെസ്റ്റിൻഡീസ് ബാറ്റർ ഷിംറോൺ ഹെറ്റ്മെയറാണ്. റോയൽസ് ടീമിൽ റിട്ടെയിൻ ചെയ്ത താരം ആദ്യ ഒൻപത് കളികളിൽ നിന്ന് ആകെ ഒരു അർധസെഞ്ചുറി മാത്രമാണ് നേടിയത്. കഴിഞ്ഞ മൂന്ന് കളികളിലും ചേസിങ്ങിൽ റോയൽസ് തോറ്റപ്പോൾ ഹെറ്റ്മെയർക്ക് ടീമിനായി ഒന്നും ചെയ്യാനായില്ല. ദയനീയ ഫോമിലുള്ള ഹെറ്റിയെ മാറ്റാൻ ദ്രാവിഡ് അടുത്ത കളിയിലെങ്കിലും തയ്യറാകണം.