രോഹിത് ശർമ രക്ഷപെട്ടു, ഐപിഎല്ലിലെ നാണം കെട്ട റെക്കോഡിൽ ഒന്നാമനായി ഗ്ലെൻ മാക്സ്‌വെൽ

Curated byഗോകുൽ എസ് | Samayam Malayalam | Updated: 26 Mar 2025, 12:26 pm

Samayam Malayalamഗ്ലെൻ മാക്സ്‌വെൽ, രോഹിത് ശർമ

ഐപിഎല്ലിൽ ഇന്നലെ ഗുജറാത്ത് ടൈറ്റൻസിന് എതിരെ നടന്ന മത്സരത്തിൽ അക്കൗണ്ട് തുറക്കാതെയാണ് പഞ്ചാബ് കിങ്സ് താരം ഗ്ലെൻ മാക്സ്‌വെൽ പുറത്തായത്. സ്പിന്നർ ആർ സായികിഷോറിന്റെ പന്തിൽ അദ്ദേഹം വിക്കറ്റിന് മുന്നിൽ കുടുങ്ങുകയായിരുന്നു. ഇതോടെ ഐപിഎല്ലിലെ നാണംകെട്ട ഒരു റെക്കോഡും ഈ ഓസ്ട്രേലിയൻ താരത്തിന്റെ പേരിലായി.ഐപിഎല്ലിൽ ഇത് പത്തൊൻപതാമത്തെ തവണയായിരുന്നു ഗ്ലെൻ മാക്സ്‌വെൽ പൂജ്യത്തിന് പുറത്തായത്‌. ഇതോടെ ലീഗിൽ ഏറ്റവും കൂടുതൽ തവണ പൂജ്യത്തിന് പുറത്തായ താരമെന്ന നാണക്കേട് മാക്സ്‌വെല്ലിന്റെ പേരിലായി. 130 ഐപിഎൽ ഇന്നിങ്സുകൾ കളിച്ചപ്പോളാണ് മാക്സ്‌വെൽ 19 തവണ അക്കൗണ്ട് തുറക്കാതെ വീണത്.


അതേ സമയം ഗ്ലെൻ മാക്സ്‌വെൽ പത്തൊൻപതാം തവണ ഡക്കായതോടെ നാണക്കേടിൽ നിന്ന് രക്ഷപെട്ടത് മുംബൈ ഇന്ത്യൻസ് താരം രോഹിത് ശർമയാണ്. നേരത്തെ ഐപിഎല്ലിൽ കൂടുതൽ തവണ പൂജ്യത്തിന് പുറത്തായ താരമെന്ന നാണക്കേടിൽ ഒന്നാം സ്ഥാനത്ത് രോഹിത് ശർമയുമുണ്ടായിരുന്നു. അതാണിപ്പോൾ ഗ്ലെൻ മാക്സ്‌വെല്ലിന്റെ‌ പേരിൽ മാത്രമായിരിക്കുന്നത്. 18 തവണയാണ് രോഹിത് ശർമ ഐപിഎല്ലിൽ ഒരു റൺസ് പോലും നേടാതെ വീണത്. 2025 സീസണിലെ ആദ്യ കളിയിലും രോഹിത് പൂജ്യത്തിന് പുറത്തായിരുന്നു.

Also Read: അടുത്ത കളിക്ക് മുൻപ് സഞ്ജുവിന്റെ രാജസ്ഥാൻ റോയൽസിന് ആശങ്ക നൽകി അക്കാര്യം; മാറ്റം വന്നില്ലെങ്കിൽ തിരിച്ചടി ഉറപ്പ്

രോഹിത് ശർമക്ക് പുറമെ മുൻ ഇന്ത്യൻ താരം ദിനേഷ് കാർത്തിക്കും ഐപിഎല്ലിൽ 18 തവണ പൂജ്യത്തിന് പുറത്തായിട്ടുണ്ട്. പീയൂഷ് ചൗള, സുനിൽ നരൈൻ എന്നിവർ 16 തവണ വീതം പൂജ്യത്തിന് പുറത്തായി ഈ മോശം ലിസ്റ്റിൽ പിന്നാലെയുണ്ട്.

Also Read: അടുത്ത കളിയിൽ രാജസ്ഥാൻ റോയൽസ് ടീമിൽ ആ വമ്പൻ മാറ്റം വന്നേക്കും, പുറത്താവുക ഈ താരം; സഞ്ജുവും സംഘവും രണ്ടും കൽപ്പിച്ച്

അതേ സമയം ഐപിഎല്ലിൽ 19 തവണ ഡക്കായ ഗ്ലെൻ മാക്സ്‌വെൽ ടി20 യിൽ മൊത്തം 35 കളികളിലാണ് പൂജ്യത്തിന് പുറത്തായത്. ഇക്കാര്യത്തിൽ സുനിൽ നരൈൻ, റാഷിദ് ഖാൻ, അലക്സ് ഹെയിൽസ് എന്നിവർക്ക് പിന്നിൽ നാലാമതാണ് അദ്ദേഹം. ഇത് മൂന്നാം തവണയാണ് മാക്സ്‌വെൽ പഞ്ചാബ് ഫ്രാഞ്ചൈസിക്കായി ഐപിഎല്ലിൽ കളിക്കുന്നത്. നേരത്തെ 2014 മുതൽ 2017 വരെയും, 2020 സീസണിലുമാണ് മാക്സ്‌വെൽ പഞ്ചാബ് ഫ്രാഞ്ചൈസിയുടെ ഭാഗമായിരുന്നത്. ഇതിൽ 2017 ൽ ടീമിന്റെ നായകനുമായിരുന്നു അദ്ദേഹം. 2013 ൽ മുംബൈ ഇന്ത്യൻസിന് ഒപ്പം ഐപിഎല്ലിൽ കിരീടം ചൂടിയ മാക്സ്‌വെൽ, ഡെൽഹി ക്യാപിറ്റൽസ്, റോയൽ ചലഞ്ചേഴ്സ് ബംഗളൂരു എന്നിവർക്കായും കളിച്ചിട്ടുണ്ട്.